Jar

3 Ewi Wãwen Jej Aikwij Jar?

IKIJEN jar, elõñ kabuñ ko rej lale bwe en emmõn wãwen an armij eo jar, einwõt barikrik ak bukwelõlõ, nan ko ej kajerbali, im bwe en lor manit ko an kabuñ eo. Bõtab, Baibel eo ej jibañ kij ñan ad lemnak wõt kin mõttan ko jet raurõklok ikijen kajitõk eo, “Ewi wãwen jej aikwij jar?”

Baibel eo ej kwalok bwe dri karejar ro retiljek an Anij rar jar ilo elõñ jikin ko im rar kõmmane men in ilo elõñ wãwen ko, einwõt ilo air jutak, jijõt, barikrik, ak ilo wãwen ko jet. Rar jar ilo burueir ak ilo juõn ainiken elaj elañe ear ekkar ñan wãwen eo. Rar jar ke rar ejjer ak ke rar barikrik. Jen air kajerbal ekjab ko, marmar ko, ak book in jar ko einwõt kein jibañ ko ñe rej jar, rein rar jar jen burueir im ilo nan ko air make. Ta eo ear kõmman bwe Anij en eoroñ jar ko air?

Einwõt kar kwalok kake ilo katak eo lok, rein retiljek rar jar ñan Jeova Anij wõt. Ewor bar juõn men eaurõk im ej alikar ilo 1 Jon 5:14: “Eñin beran eo iber ñõn E, bwe elañe jej kajitõk iben kin jabrewõt men eo ekar ñõn ankil An, Ej roñjake kij.” Jar ko ad rej aikwij ekkar ñan ankilan Anij. Ta melelen men in?

Ñan kõmman bwe jar ko ad ren ekkar ñan ankilan Anij, jej aikwij mokta jelã kin ta eo ej ankilan. Kin men in, ad katak kin Baibel eo ej mõttan eo eaurõk ikijen jar. Ej ke melelen bwe Anij enaj makoko in roñjake kij elañe ejjab lap ad jelã kobõn Baibel eo? Jaab, bõtab Anij ekõnan bwe jen katak kin ankilan, ñan ad melele kake im jerbale. (Matu 7:21-23) Jej aikwij jar ekkar ñan men ko jej katak kaki.

Ke jej kalaplok ad jelã kin Jeova im ankilan, tõmak eo ad enaj kajurlok, eo ej bar juõn mõttan eaurõk ikijen jar. Jisõs ear ba: “Jabrewõt men ko otemjej kom naj kajitõk ilo ami jar, im tõmak, kom naj bõki.” (Matu 21:22) Tõmak ejjab melelen bwe jej mõkõj im liki aolep men ko jej roñ ak loi. Jen men in, ej melelen bwe jej tõmak ilo juõn men jejjab loe, ak ewor juõn kein kamol elap ej rejetake. (Dri Hibru 11:1) Baibel eo eobrõk kin kein kamol ko me rej kwalok bwe Jeova, eo jejjab maroñ loe, ej juõn eo emol an bed im jemaroñ atartar ion, im ej mõnõnõ in uaki jar ko an aolep ro im ewor air tõmak ilo E. Bareinwõt, ien otemjej jemaroñ kajitõk ibben Jeova ñan an kakajurlok tõmak eo ad kinke ej mõnõnõ in letok ñan kij men ko jej aikwiji.—Luk 17:5; Jemes 1:17.

Bar juõn mõttan eaurõk kin kilen jar ej alikar ilo nan kein an Jisõs: “Ejelok armij ej itok ñõn Jema, elañe jab kin Iõ.” (Jon 14:6) Inem wãwen  eo jemaroñ kebake Jeova ej ikijen Jisõs. Kin men in, Jisõs ear jiroñ dri kalor ro an ñan air jar ilo etan. (Jon 14:13; 15:16) Men in ejjab melelen bwe jej aikwij jar ñan Jisõs. Jen an eindrein, jej jar ilo etan Jisõs, kinke Jisõs ej unjen ad maroñ kebake Jemeduij ilañ, eo ewãppen im ekwojarjar.

Juõn ien, dri kalor ro im rar ebake Jisõs rar kajitõk ibben: “Iroij, kwon katakin kim kin jar.” (Luk 11:1) Alikar, rein rar jab kajitõk kin kilen jar einwõt ej kab mwij ad etale kaki. Ak rein rar kõnan jelã kin ta ko remaroñ jar kaki, im ej einwõt ñe rej ba, ‘Ta ko jej aikwij jar kaki?’

[Pija ilo peij 6]

Anij enaj eoroñ jar ko an armij ro elañe rej jar ekkar ñan ankilan, ilo tõmak, im rej kwaloke ilo etan Jisõs