ШУКО религий кугу вниманийым ойыра, могай позым кумалме годым налаш, могай мутым кучылташ да могай религиозный йӱлам шукташ. Но Библий мемнам кумалтыш мут шотышто тыгай йодышлан вашмутым налаш кумылаҥда: «Кузе ме кумалшаш улына?»

Библийыште Юмын ӱшанле служитлышыже-влак нерген ойлалтеш, кудышт тӱрлӧ верыште да тӱрлӧ позым налын кумалыныт. Шке обстоятельствыштым шотыш налын, нуно йӱкын але йӱкым лукде кумалыныт. Нуно кавашке ончен але вуйым савен кумалыныт. Кумалтыш мутышт шӱм гыч лекше лийын. Нуно сӱретым, чёткым але кумалтыш книгам кучылтын огытыл. Молан кӧра Юмо нунын кумалтыш мутыштым колын?

Кузе ончычсо статьяште палдарыме лийын, нуно ик Юмылан веле, Иеговалан, кумалыныт. Но эше 1 Иоаннын 5:14 почеламутышто возымым шотыш налман: «Юмын ончылно теве могай ӱшанымашна уло: Тудын эрыкше почеш кунам ме иктаж-мом йодына, Юмо мемнам колеш». Мемнан кумалтыш мутна Юмын эрыкше почеш лийшаш. Кузе тидым умылаш?

Юмын эрыкше почеш кумалашлан тудын эрыкшым палаш кӱлеш, а тидлан Библийым шымлыман. Ончыкта мо тиде, пуйто Библийым сайын она пале гын, Юмо мемнам колышташ огеш тӱҥал? Уке, но Юмо мемнан деч тудын эрыкшым палаш да умылаш тыршымынам, тугак эрыкше почеш илымынам вуча (Матфейын 7:21—23). А эше ме пален налме дене келшышын кумалшаш улына.

Иегова да тудын эрыкше нерген шинчымашым налме дене ӱшанымашна пеҥгыдемеш. Тидат кумалтыш мутышто пеш кӱлешан. Иисус каласен: «Кумалмыда годым мом ӱшанен йодыда, чылажымат налыда» (Матфейын 21:22). Чын ӱшанымаш негыздыме огыл. Койдымылан ӱшанымаш пеҥгыде доказательствеш негызлалтшаш (Еврей-влаклан 11:1, УТ). Библийыште тыгай доказательстве пеш шуко. Мутлан, ме пален налын кертына: Иегова, тудым ужын она керт гынат, чынжымак уло, эре полшен шога да тудлан ӱшаныше-влакын кумалтыш мутыштым колыштеш. Тыгак ӱшанымашым шукемдаш чыла годымат йодын кертына, а Иегова уло кумылын пуа тудым, мо мыланна кӱлеш (Лукан 17:5; Иаковын 1:17).

Юмо мемнан кумалтыш мутнам колжо манын, теве эше могай Иисусын мутшым мондаш огеш кӱл: «Мыйын гоч огыл гын, Ача деке иктат миен огеш керт» (Иоаннын 14:6). Лектеш, Иегова Ачана деке Иисус гоч лишемын кертына. Сандене Иисус шке тунемшыж-влакым тудын лӱмжӧ дене кумалаш туныктен (Иоаннын 14:13; 15:16). Но тиде огеш ончыкто, пуйто ме Иисуслан кумалына. Иисусын лӱмжӧ дене кумалын, ме тудын рольжо нерген шарнымынам ончыктена, вет Иисуслан кӧра веле ме сулыкдымо да святой Ачана деке лишемын кертына.

Икана Иисусын тунемшыж-влак тудлан каласеныт: «Господь, кумалаш мемнам туныкто» (Лукан 11:1). Мутат уке, нуно йодын огытыл, кузе кумалаш. Нунын чынжымак палымышт шуын, мо нерген кумалаш кӱлеш.