എങ്ങനെ പ്രാർഥിക്കാം?
പ്രാർഥനയുടെ കാര്യത്തിൽ മിക്ക മതങ്ങളും പുറമേയുള്ള കാര്യങ്ങളിലാണ് ശ്രദ്ധിക്കുന്നത്. നിന്നാണോ ഇരുന്നാണോ പ്രാർഥിക്കേണ്ടത്? ഏതൊക്കെ വാക്കുകളാണ് ഉപയോഗിക്കേണ്ടത്? എന്തൊക്കെ ആചാരങ്ങളാണ് ചെയ്തുപോരേണ്ടത്? ഇങ്ങനെയൊക്കെ. എന്നാൽ ഇതിനൊന്നുമല്ല ബൈബിൾ പ്രാധാന്യം കൊടുക്കുന്നത്. ബൈബിൾ പറയുന്ന പ്രധാനപ്പെട്ട കാര്യമെന്താണെന്നു നമുക്കു നോക്കാം: “ഏതുവിധത്തിലാണ് നമ്മൾ പ്രാർഥിക്കേണ്ടത്?”
ദൈവത്തിന്റെ വിശ്വസ്തരായ ദാസർ വ്യത്യസ്ത സ്ഥലങ്ങളിൽ, വ്യത്യസ്ത രീതികളിൽ പ്രാർഥിച്ചതായി ബൈബിളിൽ കാണാം. ചിലർ മൗനമായി പ്രാർഥിച്ചു, ചിലർ ഉറക്കെ പ്രാർഥിച്ചു. ചിലർ ആകാശത്തേക്കു നോക്കി പ്രാർഥിച്ചു, ചിലർ തല കുമ്പിട്ടു പ്രാർഥിച്ചു. പ്രതിമകളോ ജപമാലമണികളോ പ്രാർഥനാപുസ്തകങ്ങളോ ഒന്നും ഉപയോഗിക്കാതെ ഉള്ളുതുറന്ന് മനസ്സിലുള്ളതെല്ലാം അവർ ദൈവത്തോടു പറഞ്ഞു. ഈ പ്രാർഥനകളൊക്കെ ദൈവം കേൾക്കാൻ കാരണമെന്താണ്?
കഴിഞ്ഞ ലേഖനത്തിൽ നമ്മൾ മനസ്സിലാക്കിയതുപോലെ ഈ ദൈവദാസർ യഹോവ എന്ന ദൈവത്തോടു മാത്രമാണ് പ്രാർഥിച്ചത്. പ്രധാനപ്പെട്ട മറ്റൊരു കാര്യത്തെക്കുറിച്ച് 1 യോഹന്നാൻ 5:14-ൽ പറയുന്നു: “ദൈവത്തിന്റെ ഇഷ്ടത്തിനു ചേർച്ചയിൽ എന്ത് അപേക്ഷിച്ചാലും ദൈവം നമ്മുടെ അപേക്ഷ കേൾക്കും എന്നു നമുക്ക് ഉറപ്പാണ്.” അതിനർഥം ദൈവം ഇഷ്ടപ്പെടുന്ന രീതിയിലായിരിക്കണം നമ്മുടെ പ്രാർഥനകൾ എന്നാണ്. എന്നു പറഞ്ഞാൽ എന്താണ്?
ദൈവം ഇഷ്ടപ്പെടുന്ന രീതിയിൽ പ്രാർഥിക്കണമെങ്കിൽ ദൈവത്തിന്റെ ഇഷ്ടം എന്താണെന്ന് നമ്മൾ അറിയണം. പ്രാർഥനയുടെ ഒരു ഭാഗമാണ് ബൈബിൾപഠനം. എന്നുവെച്ച് ബൈബിൾ പണ്ഡിതനായാലേ ദൈവം നമ്മുടെ പ്രാർഥന കേൾക്കൂ എന്നാണോ? അല്ല. ബൈബിളിൽനിന്നു മനസ്സിലാക്കിയ കാര്യങ്ങൾക്കനുസരിച്ച് നമ്മൾ പ്രാർഥിച്ചാൽ മതി. നമ്മൾ ദൈവത്തിന്റെ ഇഷ്ടം മനസ്സിലാക്കാനും അതുപോലെ പ്രവർത്തിക്കാനും ആണ് ദൈവം ആഗ്രഹിക്കുന്നുത്—മത്തായി 7:21-23
ദൈവം നമ്മുടെ പ്രാർഥന കേൾക്കണമെങ്കിൽ ദൈവത്തിന്റെ ഇഷ്ടമനുസരിച്ച്, വിശ്വാസത്തോടെ, യേശുവിന്റെ നാമത്തിൽ പ്രാർഥിക്കണം
യഹോവയെക്കുറിച്ചും യഹോവയുടെ ഇഷ്ടത്തെക്കുറിച്ചും പഠിക്കുമ്പോൾ നമ്മുടെ വിശ്വാസം കൂടും. പ്രാർഥനയ്ക്കുവേണ്ട അടുത്ത പ്രധാനപ്പെട്ട കാര്യം വിശ്വാസമാണ്. യേശു പറഞ്ഞു: “വിശ്വാസത്തോടെ നിങ്ങൾ പ്രാർഥനയിൽ ചോദിക്കുന്നതെല്ലാം നിങ്ങൾക്കു കിട്ടും.” (മത്തായി 21:22) കേൾക്കുന്നതെല്ലാം കണ്ണുമടച്ച് അംഗീകരിക്കുന്നതല്ല വിശ്വാസം. മറിച്ച് ഒരു കാര്യം നമുക്കു കാണാൻ കഴിയുന്നില്ലെങ്കിലും അതു വിശ്വസിക്കണമെങ്കിൽ ശക്തമായ തെളിവു വേണം. (എബ്രായർ 11:1) യഹോവയെ നമുക്കു കാണാൻ കഴിയില്ലെങ്കിലും യഹോവയുണ്ട് എന്നുള്ളതിന്റെ ധാരാളം തെളിവുകൾ നമുക്കു ബൈബിളിൽ കാണാം. അങ്ങനെ യഹോവ ഒരു യഥാർഥ വ്യക്തിയാണെന്നും വിശ്വസിക്കാൻ കഴിയുന്ന ഒരാളാണെന്നും വിശ്വാസത്തോടെ പ്രാർഥിച്ചാൽ അതിന് ഉത്തരം തരുന്ന ദൈവം ആണെന്നും ഉള്ള കാര്യം നമുക്ക് ഉറപ്പിക്കാം. വിശ്വാസം കൂടുതൽ തരാൻ നമുക്ക് പ്രാർഥിക്കാൻ കഴിയും. ഇങ്ങനെ നമുക്കു വേണ്ടതെല്ലാം നൽകാൻ യഹോവയ്ക്കു നൂറു മനസ്സാണ്.—ലൂക്കോസ് 17:5; യാക്കോബ് 1:17.
അടുത്ത കാര്യം നമുക്ക് നോക്കാം. തന്റെ നാമത്തിൽ പ്രാർഥിക്കാൻ യേശു അനുഗാമികളെ പഠിപ്പിച്ചു. (യോഹന്നാൻ 14:13; 15:16) യേശു പറഞ്ഞു: “എന്നിലൂടെയല്ലാതെ ആരും പിതാവിന്റെ അടുത്തേക്കു വരുന്നില്ല.” (യോഹന്നാൻ 14:6) അതിനർഥം നമ്മൾ യേശുവിനോടു പ്രാർഥിക്കണം എന്നല്ല, യേശുവിന്റെ നാമത്തിൽ പ്രാർഥിക്കണം എന്നാണ്. നമ്മൾ ഓർക്കേണ്ട കാര്യം ഇതാണ്: പരിപൂർണനും പരിശുദ്ധനും ആയ പിതാവിന്റെ അടുത്ത് പ്രാർഥനയിൽ ചെല്ലാൻ യേശുവിലൂടെ മാത്രമേ കഴിയൂ.
യേശുവിന്റെ അടുത്ത അനുഗാമികൾ യേശുവിനോട് ഇങ്ങനെ ചോദിച്ചു: ‘കർത്താവേ, ഞങ്ങളെയും പ്രാർഥിക്കാൻ പഠിപ്പിക്കേണമേ’ (ലൂക്കോസ് 11:1) നമ്മൾ ഇപ്പോൾ മനസ്സിലാക്കിയതുപോലുള്ള സാധാരണ കാര്യങ്ങളായിരുന്നില്ല ശിഷ്യന്മാർ യേശുവിനോട് ചോദിച്ചത്. ‘എന്തിനെക്കുറിച്ചെല്ലാം പ്രാർഥിക്കാം’ എന്ന് അറിയാനായിരുന്നു അവർ ശരിക്കും ആഗ്രഹിച്ചത്.