IPAN miak religiones kiijtouaj kenijkatsa moneki timoketstos, tlen tikijtos uan tlen moneki tijchijtos kema timomaijtos. Maske kiampa kiijtouaj, Biblia tlamachtia sekinok tlamantli.

Nopaya kiijtoua se keskij toTeotsij itekipanojkauaj momaijtojkej uan amo sanse kichijkej. Kemantika momaijtojkej ichtakatsi, uan kemantika chikauak kamanaltikej. Sekij ajkotlachixkej uan sekij mouijtsonkej. Maske kiampa kichijkej, amo kema kitekiuijkej tlaixkopinkayomej, rosarios yon amochtli. San kiijtojkej tlen kiyolmatiyayaj. ¿Kenke toTeotsij kintlakakilik?

Pampa kinojnotskej Jehová. Kichijkej kej tikitakej ipan tlamachtili ome. Nojkia, 1 Juan 5:14, kiijtoua seyok tlamantli tlen kichijkej: “Uan tijmatij temachtli intla tijtlajtlaniaj toTeko tlen kinamiki ika tlen yajaya kineki, yajaya techtlakakilia”. Uajka, kema timomaijtouaj moneki tikijtosej tlen ya kiyolpakiltis toTeotsij. ¿Tlake kiijtosneki ni tlamantli?

Achtoui, moneki tijmatisej tlake kiyolpakiltia. Yeka, moneki timomachtisej Biblia. Maske Jehová amo kineki ma tijtsontekontlalikaj nochi tlen uala ipan Biblia, kena kiijtoua moneki tijchiuasej kampeka tijmatisej tlake kiyolpakiltia uan tijchiuasej (Mateo 7:​21-23). Tlen tikijtouaj kema timomaijtouaj, moneki kinextis nelia timomachtiaj Biblia.

Kema kuali tikixmatij toTeotsij uan tijmatij tlen ya kineki, kichiua nojua kuali ma titlaneltokakaj. Uajka tlaj tijnekij toTeotsij ma techtlakakili, moneki kuali titlaneltokasej. Jesús kiijtok: “Nochi tlen inkitlajtlanisej toTeko uan inkineltokasej temachtli toTeko inmechmakas, inkiselisej” (Mateo 21:22). Maske titlaneltokaj ipan tlen amo tikitaj, nopa amo kiijtosneki tiuiuitikej pampa Jesús kiijtok moneki kuali tijmatisej kenke tijneltokaj se tlamantli (Hebreos 11:⁠1). Maske amo ueli tikitaj Jehová, Biblia kiijtoua miak tlamantli tlen kinextia nelia itstok, uelis ipan timotemachisej uan technankilia tlaj motemachiaj ipan ya. Ya amo kualani tlaj tikiljuiaj ma techpaleui nojua kuali titlaneltokasej pampa ya nochipa kineki techpaleuis (Lucas 17:5; Santiago 1:17).

Ma tikitakaj seyok tlamantli tlen moneki tijchiuasej tlaj tijnekij ma techtlakakili toTeotsij. Jesús kiijtok: “Axaka uelis asis kampa itstok noTata [...] tlaj axnechneltoka” (Juan 14:⁠6). Ni kiijtosneki san Jesús uelis techpaleuis ma timonechkauikaj ika toTeotsij. Yeka kiniljuik itokilijkauaj kema kitlajtlaniskiaj toTeotsij se tlamantli, monekiyaya kichiuasej ika itoka (Juan 14:13; 15:16). Uan maske nojkia timomaijtouaj ika Jesús itoka, amo kiijtosneki ya tijnojnotsaj. Kiijtosneki tijpatiitaj pampa ya techpaleuia ma tijnechkauikaj toTeotsij Jehová katli eli xitlauak uan tlatsejtseloltik.

Se tonali, se Jesús itokilijka kiiljuik: “ToueyiTeko, xitechmachti kejatsa ma timomaijtokaj” (Lucas 11:⁠1). ¿Kenke kiampa kiijtok? Inijuantij ya kimatiyayaj kenijkatsa momaijtosej. Uajka, kema tlajtlanki nopa, kinekiyaya kimatis tlake ueliskia tlajtlanis.