GE GO tliwa tabeng ya thapelo, madumedi a mantši a šetša kudu dika tšeo di bonagalago tše bjalo ka go ema, mantšu le ditirelo. Lega go le bjalo, Beibele e re thuša go beela ditaba tše bjalo ka thoko gomme re lebiše tlhokomelo dikarolong tše bohlokwa kudu tša potšišo e rego, “Re swanetše go rapela bjang?”

Beibele e bontšha bahlanka ba botegago ba Modimo ba rapela mafelong a mantši a fapa-fapanego e bile ba eme ka ditsela tše sa swanego. Ba be ba rapela ka setu goba ka go hlaboša go ya ka maemo. Ba be ba rapela ba lebeletše godimo goba ba inamile. Go e na le go diriša diswantšho, dipheta, goba dipuku tša dithapelo bakeng sa go ba thuša go rapela, ba be ba fo rapela go tšwa pelong ka mantšu a bona. Ke’ng seo se bego se dira gore dithapelo tša bona di kwewe ke Modimo?

Bjalo ka ge go bontšhitšwe sehlogong se se fetilego, ba ile ba lebiša dithapelo tša bona go Modimo o tee—Jehofa. Go na le lebaka le lengwe le bohlokwa. Re bala go 1 Johane 5:14 gore: “Ye ke kgodišego ye re nago le yona go yena ya gore go sa šetšwe seo re se kgopelago go ya ka thato ya gagwe, o a re kwa.” Dithapelo tša rena di swanetše go dumelelana le thato ya Modimo. Seo se ra gore’ng?

Gore re rapele ka go dumelelana le thato ya Modimo, re swanetše go tseba seo thato ya gagwe e lego sona. Ka gona, go ithuta Beibele ke karolo e bohlokwa ya thapelo. Na se se bolela gore Modimo o tla gana go kwa dithapelo tša rena ntle le ge re le diithuti tša Beibele? Aowa, eupša Modimo o letetše gore re ithute ka thato ya gagwe, re tsome go e kwešiša le go dira dilo ka go dumelelana le yona. (Mateo 7:21-23) Re swanetše go rapela ka go dumelelana le seo re ithutago sona.

Ge re ithuta ka Jehofa le thato ya gagwe, re gola tumelong—seka se sengwe seo se tswalanago le thapelo. Jesu o itše: “Dilo tšohle tšeo le di kgopelago ka thapelo le e-na le tumelo le tla di hwetša.” (Mateo 21:22) Tumelo ga e bolele go ba madumela-tšohle. Go e na le moo, e bolela go dumela selong seo se nago le bohlatse bjo bo tiilego, gaešita le ge se sa bonwe. (Baheberu 11:1) Beibele e na le bohlatse bjo bontši bja gore Jehofa, yo re ka se mmonego, ke wa kgonthe, o a botega le gore o ikemišeditše go araba dithapelo tša bao ba dumelago go yena. Go feta moo, re ka kgopela tumelo e oketšegilego, gomme Jehofa o rata go re nea seo re se nyakago.—Luka 17:5; Jakobo 1:17.

Se se latelago ke seka se sengwe se bohlokwa sa ka moo re ka rapelago ka gona. Jesu o itše: “Ga go yo a tlago go Tate ge e se ka nna.” (Johane 14:6) Ka gona, Jesu ke tsela yeo re ka batamelago Tate, Jehofa,  ka yona. Ka baka leo, Jesu o boditše balatedi ba gagwe gore ba rapele ka leina la gagwe. (Johane 14:13; 15:16) Seo ga se bolele gore re swanetše go rapela Jesu. Go e na le moo, re rapela ka leina la Jesu, re gopola gore Jesu ke yena a dirago gore re kgone go batamela Tatago rena yo a phethagetšego le yo mokgethwa.

Balatedi ba Jesu ba kgaufsi ba kile ba mo kgopela, ba re: “Morena, re rute go rapela.” (Luka 11:1) Ka ntle le pelaelo, ba be ba sa kgopele dilo tša motheo tše re sa tšwago go di ahla-ahla. Ba be ba nyaka go tseba seo ba swanetšego go se rapelela—ge e le gabotse ba be ba re, ‘Re swanetše go rapelela eng?’