Okulikuambela

3 Ñgeni?

KONTHELE yelikuambelo, onongeleya ononyingi mbusukalala vali no ñgeni omunthu ena okukala, netyi ena okupopia, noviso. Anthi, Ombimbiliya itukuatesako okuhasuku novipuka ovio, nokusuka nepulo eli liakolela vali, liati, “Oñgeni tuna okulikuambela?”

Ombimbiliya ipopia ovaumbili vekolelo va Huku velikuambelele mononkhalelo mbelikalaila no ponomphangu ononyingi. Velikuambelele momutima, ine okupopila peulu, tyitei konkhalelo yaapa vekahi. Velikuambelele otyo vatala peulu ine tyelinyongamena. Ankho kavaundapesa ovilolo, no notersu ine omikanda viomalikuambelo. Anthi, ankho valinga vala omalikuambelo atunda momutima, monondaka mbavo muene. Oityi ankho valinga opo Huku evetehelele?

Ngetyi tyalekesa onthele yokualamba, ankho velikuambela vala ku Huku wike—Jeova. Pena vali otyipuka otyikuavo tyakolela. Mu 1 João 5:14 tutangamo okuti: “Ei oyo onthumbi tuna mu Jeova, yokuti kese etyi tuita inkha tyelikuata nehando liae, oe metutehelela.” Omalikuambelo etu esukisa okulikuata nehando lia Huku. Otyo tyihangununa tyi?

Opo tulinge omalikuambelo elikuata nehando lia Huku, tuesukisa okunoñgonoka olipi ehando liae. Okulilongesa Ombimbiliya, otyisimbulo tyakolela pala okulikuambela. Okuti otyo tyilekesa okuti inkha katukala ovanongo konthele Yombimbiliya, Huku kametutehelela? Au, mahi Huku ukevelela tulilongese ehando liae, atulinoñgonoka, nokulilinga. (Mateus 7:21-23) Omalikuambelo etu esukisa okulikuata netyi tulilongesa.

Putyina tulilongesa konthele ya Jeova nehando liae, ekolelo lietu liliyawisa. Ekolelo, otyipuka otyikuavo tyakolela melikuambelo. Jesus wati: “Ovipuka aviho muiita melikuambelo nekolelo, mamuvipewa.” (Mateus 21:22) Ekolelo hakutavela vala. Anthi, ekolelo okutavela otyipuka alo umwe tyina tyihamoneka, mahi tyina omalekeso apama okuti otyotyili. (Hebreus 11:1) Ombimbiliya yeyula omalekeso okuti Jeova, una tuhapondola okumona, omunthu wotyotyili, nokuti oe uhanda okukumbulula omalikuambelo a vana vakolela mwe. Tupu, tupondola okuita vali apeho ekolelo, iya Jeova utyihole okutuavela etyi tuesukisa.—Lucas 17:5; Tiago 1:17.

Pena nkhele otyipuka otyikuavo tyakolela konthele yokulikuambela. Jesus wati: “Nawike uya ku Tate ahapiti puame.” (João 14:6) Ngotyo, Jesus  oe ondyila opo tuhike ku Tate, Jeova. Moluotyo, Jesus wapopila ovalanduli vae opo velikuambele menyina liae. (João 14:13; 15:16) Otyo katyilekesa okuti tuna okulikuambela ku Jesus. Anthi, tulikuambela menyina lia Jesus, okuhinangela okuti Jesus oe waikula ondyila opo tufuene ku Tate yetu uhena nkhali nomusukuke.

Ovalanduli va Jesus omapanga ae, vemuitile okuti: “Tatekulu, tulongese oñgeni matulikuambela.” (Lucas 11:1) Tyimoneka nawa okuti ankho kavekahi nokuita ovipuka tuapopiale pombanda. Anthi, ankho vahanda okunoñgonoka etyi mavaiti, mokonda vati, ‘Tuna okulikuambela konthele yatyi?’

[Onondaka Mbavilapo pefo 6]

Omalikuambelo aviuka, elikuata nehando lia Huku, alingwa nekolelo, no menyina lia Jesus