KYAHIKA aha nshonga y’okushaba, abantu omu diini nyingi nibata omutima aha by’omubiri nk’oku baine kuba bari baaba nibashaba, ebigambo ebi baine kukoresa, n’emigyenzo. Kwonka, Baibuli neetuhwera kukwetantara ebintu ebyo reero tute omutima aha birikutwarirwa omu kibuuzo eki, “Twine kushaba tuta?”

Baibuli neeyoreka ngu abaheereza ba Ruhanga abeesigwa bakaba nibashaba bari omu mbeera zitari zimwe na zimwe. Bakaba nibashaba bahunami nari barikugamba omu iraka eririkuhurirwa kurugiirira aha mwanya ogu barimu. Bakaba nibashaba barikureeba aha iguru nari batsimbire amaju. Omu mwanya gw’okukoresa ebishushani, enkwanzi, n’ebitabo by’okushaba, bakaba nibashaba kuruga aha mutima barikukoresa ebigambo ebyabo. Niki ekyareeteire okushaba kwabo kugarukamu?

Nk’oku kyorekirwe omu kicweka eky’enyima, bakaba nibashaba Ruhanga omwe wenka, Yehova. Kwonka hariho enshonga endiijo enkuru. Neegambwaho omuri 1 Yohaana 5:14: ‘Obu nibwo bumanzi obu twine omuriwe, ngu ku turikushaba ekintu kyona nk’oku arikukunda, naatuhurira.’ Okushaba kwaitu kwine kuba nikuhikaana n’ebi Ruhanga arikukunda. Ekyo nikimanyisa ki?

Kubaasa kushaba ebirikuhikaana n’ekigyendererwa kya Ruhanga, twine kubanza kumanya ekigyendererwa kye. Okwega Baibuli, n’ekintu kikuru omu kushaba. Mbwenu shi eki nikimanyisa ngu Ruhanga tarikwija kuhurira okushaba kwaitu twaba tuteegire Baibuli? Ngaaha, kwonka Ruhanga naayenda ngu tuteereho kumanya ekigyendererwa kye kandi tukikorereho. (Matayo 7:21-23) Twine kushaba ebiine akakwate n’ebi turikwega.

Twaba nitwega ebirikukwata ahari Yehova n’ekigyendererwa kye okwikiriza kwaitu ni kukura, kandi egi n’enshonga endiijo nkuru ei twine kumanya aha kushaba. Yesu akagira ngu, ‘byona ebi murikwenda omu kushaba kwanyu, mubishabe mwine okwikiriza nimwija kubiheebwa.’ (Matayo 21:22) Titwine kwikiririza eryo. Kureka, nikimanyisa okwikiririza omu kintu n’obu kyakuba kitarikureebwa, kyaba kiine obuhame obuhikire. (Abaheburaayo 11:1) Baibuli erimu obuhame bwingi oburikworeka ngu Yehova, ou tutarikubaasa kureeba ariho, n’owaabuzima, kandi ayeteekateekire kugarukamu okushaba kw’abarikumwikiririzamu. Ekindi, nitubaasa kumushaba kutwongyera okwikiriza, kandi Yehova naakunda kutuha ebi turikwetenga.—Luka 17:5; Yakobo 1:17.

Hariho endiijo nshonga erikutuhwera kumanya oku twine kushaba. Yesu akagira ati: ‘Tihariho orikwija ahari Isheboona, atarabire omuriinye.’ (Yohaana 14:6) N’ahabw’ekyo Yesu niwe twine kurabiramu kuhika ahari Isheboona. Kandi, Yesu akagambira abakuratsi be kushaba omu iziina rye. (Yohaana 14:13; 15:16) Kwonka ekyo tikirikumanyisa ngu twine kushaba Yesu. Kureka, nitushaba omu iziina rya Yesu, turikwijuka ngu Yesu niwe arikubaasa kutuhwera kutuhitsya ahari Tataitwe orikwera kandi ohikiriire.

Eizooba rimwe abakuratsi ba Yesu bakamubuuza bati: “Mukama waitu, twegyese okushaba.” (Luka 11:1) Amazima gari ngu, bakaba batarikumushaba kubagambira enshonga ezi twaheza kushwijuma. Buzima bakaba nibenda ebirikutwarirwa omu kibuuzo, ‘twine kugamba ki omu kushaba?’