Pikakasi

3 Panon so Pampikasi?

NO NIPAAKAR ed sayan tepet, say importante ed dakel a relihyon et say posisyon sano manpipikasi, saray salitan usaren, tan saray seremonya. Balet ta ibabaga na Biblia ya aliwan saratan so ikdan tayoy imano, noagta wala ni ray mas importantin nepeg ya ikonsidera.

Nabasa ed Biblia a saray matoor a lingkor na Dios et nampikasi ed nanduruman pasen tan posisyon. Makalna odino maksil so impanpikasi ra, depende ed sirkumstansya. Say arum et nampikasin akatangay ed tawen tan say arum et akatuek. Ag-ira angusar na saray imahen, rosaryo, odino libro na dasal, noagta no antoy walad puso ra et sikatoy imbesngaw da. Akin a dinengel na Dios so pikakasi ra?

Singa nibaga la ed akaunan artikulo, say nampikasian da labat et say Dios a si Jehova. Balet ta wala ni sananey ya importantin rason. Oniay nabasa tayo ed 1 Juan 5:14: “Makapanmatalek itayo ed sikato ya antokaman so kerewen tayo unong ed linawa to, dengelen to itayo.” On, dedengelen na Dios iramay pikakasin unong ed linawa to. Antoy gawaen tayo pian say pikakasi tayo et unong ed linawa to?

Kaukolan ya amtaen tayo nin unona no anto so linawa na Dios, a nabasa ed Biblia. Importante sirin ed pikakasi so panaral na Biblia. Kasin labay ya ibaga na saya a say dengelen labat na Dios et saramay kabkabisado dan maong so Biblia? Andi met, balet ta labay na Dios ya amtaen tayoy linawa to, tan pansagpotan tayon talosan tan gawaen itan. (Mateo 7:21-23) Kaukolan a say pikakasi tayo et unong ed saray nanaaralan tayo ed Biblia.

Legan ya nanaaralan tayoy nipaakar ed si Jehova tan ed linawa to, ombiskeg so pananisia tayo​—tan importante met iya ed pikakasi. Imbaga nen Jesus ya: “Amin a kerewen yo ed pikakasi et naawat yo no walay pananisia yo.” (Mateo 21:22) Say pananisia et aliwan basta-basta panigsisia. Imbes, satan et panisia ed sakey a bengatla anggano agnanengneng ta susuportaan na makakombinsin ebidensya. (Hebreos 11:1) Anggano agtayo nanengneng si Jehova, dakel so ebidensya ed Biblia a sikatoy talagan wala, napanmatalkan, tan maliket ya mangebat ed saray pikakasi na saramay walaan na pananisia ed sikato. Sarag tayo met a kerewen ed sikato ya aruman toy pananisia tayo. On, labalabay nen Jehova ya iter iray nakaukolan tayo.​—Lucas 17:5; Santiago 1:17.

Nia ni sakey ya importantin bengatla ed no panon so pampikasi. Imbaga nen Jesus ya: “Anggapo so makasabi ed Ama no aliwan diad panamegley ko.” (Juan 14:6) Makaasingger itayo ed Ama, si Jehova, dia labat ed panamegley nen Jesus. Kanian imbaga nen Jesus ed saray patumbok to a manpikasi  ira diad ngaran to. (Juan 14:13; 15:16) Agto labay balet ya ibagan si Jesus so nepeg tayon pampikasian. Imbes, manpikasi itayo diad ngaran nen Jesus, ya isipen tayon si Jesus so rason no akin ya makaasingger itayo ed perpekto tan masanton Ama tayo.

Aminsan et oniay imbaga na saray papatumbok nen Jesus: “Katawan, ibangat mo kamin manpikasi.” (Lucas 11:1) Mapatnag ya say labay dan naamtaan et aliwan no panon so pampikasi. Imbes, singa da itetepet ya, ‘Antoy nepeg min ipikasi?’

[Blurb ed pahina 6]

Dengelen na Dios iray pikakasi tayo no satan et unong ed linawa to, atekepay pananisia, tan diad panamegley na ngaran nen Jesus