HOPI tradishon religioso ta pone énfasis riba postura òf posishon, e palabranan i sierto ritonan ora di hasi orashon. Sinembargo, Beibel ta yuda nos pa no enfoká riba e aspektonan físiko ei, sino riba aspektonan mas importante di e pregunta, “Kon nos mester hasi orashon?”

Beibel ta mustra ku sirbidónan fiel di Dios a hasi orashon na vários lugá i den diferente posishon. Nan a hasi orashon sea den silensio òf na bos haltu, segun e sirkunstansia. Tin biaha nan a hasi orashon sea kara na laira òf kabes abou. Nan tabata hasi orashon for di nan kurason i no a usa imágen, rosario i buki di orashon. Kon bin Dios a skucha nan orashon?

Wèl, manera nos a mira den e artíkulo anterior, esei ta pasobra nan tabata hasi orashon solamente na ún Dios: Yehova. Ademas, tin un otro motibu importante. Nos ta lesa na 1 Juan 5:14: “Esaki ta e konfiansa ku nos tin su dilanti, ku si nos pidi kualke kos konforme su boluntat, e ta tende nos.” (Lèter skùin ta di nos.) Pues, pa Dios skucha nos orashon e mester ta di akuerdo ku Dios su boluntat. Kiko esei ta enserá?

Pa nos hasi orashon di akuerdo ku Dios su boluntat, nos mester sa kiko ta su boluntat. E úniko manera ku nos por haña sa esei ta ora nos studia Beibel. Esei ke men ku nos mester ta eksperto riba tereno di Beibel pa Dios skucha nos orashon? Nò, loke Dios ta rekerí di nos ta pa nos siña kiko ta su boluntat, komprondé esaki i aktua na armonia kuné. (Mateo 7:​21-23) Pues, nos orashon mester kuadra ku loke nos ta siña.

Segun ku nos ta siña tokante Yehova i su boluntat, nos fe ta oumentá. Fe ta un otro kos esensial ku nos tin mester pa Dios skucha nos orashon. Hesus a bisa: “Tur loke boso pidi den orashon, ku fe, boso lo risibí.” (Lèter skùin ta di nos; Mateo 21:22) Fe no ta nifiká kere siegamente den algu. Mas bien, e ta nifiká kere den un “realidat,” esta, algu ku tin evidensia sólido p’e maske nos no ta mir’é. (Hebreonan 11:1, BPK) Beibel ta yen di evidensia ku Yehova, kende nos no por mira, ta real, konfiabel i dispuesto pa kontestá e orashonnan di esnan ku tin fe den dje. Ademas, semper nos por pidi pa mas fe, i Yehova gustosamente ta duna nos loke nos tin mester.​—Lukas 17:5; Santiago 1:17.

At’akí un punto importante mas ku nos mester tene kuenta kuné ora nos ta hasi orashon. Hesus a bisa: “Ni un hende no ta bin serka e Tata, sino pa medio di mi.” (Juan 14:6) Pues, ta via di Hesus nos por aserká e Tata: Yehova.  P’esei, Hesus a bisa su siguidónan pa hasi orashon den su nòmber. (Juan 14:13; 15:16) Pero, esei no ta nifiká ku nos mester hasi orashon na Hesus. Mas bien, nos ta resa den nòmber di Hesus, kòrdando ku ta Hesus ta esun ku ta hasi posibel pa nos aserká nos Tata perfekto i santu.

Un biaha Hesus su siguidónan mas íntimo a pidié: “Señor, siña nos hasi orashon.” (Lukas 11:1) Opviamente, nan no tabata ke sa e rekisitonan básiko ku nos a kaba di menshoná. Loke eigenlijk nan tabata ke men ta, ‘Tokante kiko nos por hasi orashon?’