Nglunguuch

3 Ngmekerang a Doluluuch?

A BETOK el klechelid a melisiich a betok el rolel a omeluluuch el oltirakl a blekerdelel me a siukang er a beluu, me a dirrek el uleketmokl el tekoi me a omeruul el bla loterekokl el kirel a nglunguuch. Engdi a Biblia a ngosukid el mo diak domes el kirel a siukang me a omeruul, e bai mo melatk er a klou a ultutelel el ker el kmo, “Ngmekerang a doluluuch?”

A Biblia a ouchais el kirir a reblak a rengrir el mesiungel a Dios el milluluuch el mla er a betok el kakerous el basio me a omeruul. Te milluluuch el klou a ngerir me a lechub e te kuk di mlengelulau el di oltirakl er a blekeradel el le bla er ngii. Te dirrek el dilangesbab e meluluuch me a lechub e te mle terrob e meluluuch. Ngdirrek el dimlak lousbech a bilt me a olbiungel me a lechub e ngbabier er a nglunguuch, te bai di milluluuch el melekoi aike el mera el ngar a rengrir el ousbech a di tekingir me a uldesuir. Me ngmilekerang e mo sebechel a Dios el remenges a nglunguchir?

El ua dulsaod er sel mlo merek el suobel, a nglunguchir a di mle melemalt el mo er a Jehovah el Dios. Ngdirrek el ngar ngii a lmuut el ta er a klou a ultutelel el tekoi el kired el mo medengelii. Sel donguiu er a 1 Johanes 5:14 e ngkmo: “Sel doba lulterekokl kloumera el bedul a Dios a kmo, a dolengit a ngiidi le ngeral tekoi el oltirakl a uldesuel a Dios e ngrongesii ngiil ongtid.” Me ngkmal bleketakl el kmo a Dios a orrenges a nglunguuch el ngii a oltirakl a soal. Me tiang ngngera belkul?

Ngkmal kired el omuchel el mo medengei aike el soal a Dios me bo el sebeched el meluluuch el oltirakl a soal. A omengiuel me a omesubel a Biblia a kot el klou a ultutelel a lsekum e ngsoad el mo ungil el meluluuch. Me tiang belkul a kmo a Dios a diak el orrenges a nglunguched a lsekum e ngdimlak de tobed er a ngarbab el skuul er a omesubel a Biblia? Ngkmal diak, a Dios a bai mengerechir er kid el mo mesuub aike el soal, e dirrek el mo medengei a belkul a tekingel e oltaut er a chelsel a klengar er kid. (Matteus 7:21-23) Me ngkmal kired el mo meluluuch el oltirakl aike el tekoi el bla desuub.

Me sel dosuub el kirel a Jehovah me aike el soal e kede omekeroul er a klaumerang er kid, el ngii a klou a ultutelel el tedebechel a nglunguched. A Jesus a dilu el kmo: “Ma ikel ngiidi le ngerang el moumerang e olengit sel moluluuch, cho mngai.” (Matteus 21:22) A klaumerang a diak el belkul a kmo kede oumerang a bek el tekoi el dorrenges. Ngbai belkul a kmo kede oumerang a tekoi el ngar ngii a bleketakl el olechotel, alta e ngdiak desang er a medad. (Hebru 11:1) A Biblia a mui er a betok el bleketakl el olechotel a kmo alta e ngdiak el sebeched el mesang a Jehovah, engdi Ngii a mera el ngar ngii e sebeched el otuil a klaumerang er kid er ngii, e dirrek el kmal semeriar el orrenges a nglunguchir tirke el oba blakerreng el bedul Ngii. Me a lmuut el tang, ngkmal sebeched el olengit er ngii er a bek el taem el mo melisiich er tia el klaumerang er kid, e dirrek el Ngii el Jehovah a kmal dmeu a rengul el omeskid aike el dousbech.​—Lukas 17:5; Jakobus 1:17.

Tiakid a kuk ta er a klou a ultutelel el rolel a doluluuch.  A Jesus a dilu el kmo: “Ngdiak a chad el mora Chedam a lak lokiu ngak.” (Johanes 14:6) Me ngkired el okiu a Jesus, e ngmo sebeched el mo er a Demad, el Jehovah. Sei a uchul me a Jesus a dilu er a rulebengkel me lousbech er a ngklel el meluluuch el mo er a Dios. (Johanes 14:13; 15:16) Me tiang a diak el belkul a kmo ngkired el meluluuch el mo er a Jesus. Ngbai kired el meluluuch el okiu a ngklel a Jesus, e blechoel el melatk el kmo a Jesus a ngike el sebeched el okiu ngii el mo er a cherrungel e chedaol el Demad.

Tirke el ulebengkel a Jesus a mle ta el oker er ngii el kmo: “Rubak, mosisecheklemam er chomeluluuch.” (Lukas 11:1) Ngbleketakl el kmo ngdimlak loker el kirel aika el tekoi el dirk dulsaod. Ngbai mle sorir el mo medengei el kmo ngngera el tekoi a uldimukl er a omeruul, el ua dedu el kmo, ‘Kede meluluuch el kirel a ngerang?’

[Siasing el ngar er a 6 el llel]

A kot el ungil el nglunguuch a medung el oltirakl a soal a Dios, e dirrek el medung el okiu a klaumerang er a chad, e dirrek el meketmokl el okiu a ngklel a Jesus