REʼ SANTO LAJ HUUJ maʼ iruqʼor ta mi naqaxuk’aam qiib’ oon hoj pa’alkooj noq ne inqab’an qatiij, ma’ iruq’or ta wo’ taqeh qʼorik naqaqʼorom noq naqab’anam qatiij. Ma’ jenaj ta wach ruuk’ inkik’uhtaaj taqeh tokoom nimanik. Re’ Santo Laj Huuj iruq’or qeh i ko ruman chi ne inqab’an.

Inq’orik chi riij taqeh rajkamanoon i Dios, iruq’or chi inkibʼan naq kitiij pan reh reh wach yeʼaabʼ, wilik pech xkibʼan kitiij chi maʼ xiqʼorik ta eh wilik pech xkibʼan kitiij chi xkikʼer kichiiʼ. Juʼjun xitzʼehtanik johtoq pan taxaaj eh wilik i xkiqahsaj kiwach wach akʼal. Maʼ nikʼ ta xkikoj jenoʼ tyoox ni xata jenoʼ rosario reh rub’anariik i kitiij. Pan kanima xelik cho i tiij xkibʼan. ¿Chaaj woʼ reet i Dios xponik chuwach i tiij xkibʼan?

Ruum chi, peet, chuwach i Jehová xkibʼan kitiij, eh reʼ wilih i xti aajwaal wach jeʼ rukabʼ xqil chik. Pan 1 Juan 5:14 iruqʼor jenaj chik ruwiiʼ: «Reʼ hoj chʼiklik qakʼux ruukʼ i Dios, ruum chibʼih jariik neenqapahqaaj reh pan qatiij ruukʼ rubʼehel jeʼ rukabʼ iraaj i reh, qehtʼal chi nee qoh ribʼiraj». Jeʼ reʼ noq, naqabʼanam qatiij pan rubʼehel, jeʼ rukabʼ iraaj i Dios. ¿Chajariik iraaj ruqʼorom i wilih?

Ko ruman chi naqanabʼeem chajariik imponik chuwach i Dios. Ruum aj reʼ, ko ruman chi ne inqatz’ir riij i ruqʼorbʼal. Korik chi reʼ Jehová maʼ iruyʼeej ta chi inqeht’aliij chu’nchel chi riij i Santo Laj Huuj. Reʼ reh iraaj chi reʼ hoj ne inqakoj qakʼux chi rureqariik chi riij chajariik iraaj chi ne inqab’an eh chi ne inqakoj pan qak’achariik inqatijej (Mateo 7:​21-23). Reʼ inqatijej pan Santo Laj Huuj narukʼutiniik ruukʼ taqeh inqaq’or pan qatiij.

Eh, noq inqatijej chi riij i Jehová eh chi riij imponik chuwach, inkʼihik i qakojbʼaal. Reʼ wilih aajwaal woʼ wach reh chi reʼ Dios ne qojrubʼiraj, eh ruum ajreʼ re’ Jesús xuqʼor: «Eh chuʼnchel chibʼih taq na-apahqaam chipaam i tiij ruukʼ chuʼnchel taq akojbʼaal, na taq akʼulum» (Mateo 21:22, RLLH). Atoob’ ta reʼ qakojbʼaal iraaj ruqʼorom chi naqakojom wach reʼ maʼ inqil ta wach, maʼ iraaj ta ruqʼorom chi naqanimam chuʼnchel. Je’ rukab’ xuk’uhtaaj i Jesús, wilik ruwii’ chaaj wo’ reet inqanimaj i ma’ inqil ta wach. (Hebreos 11:1). Korik chi maʼ inqil ta wach i Jehová, xa reʼ laʼ pan Santo Laj Huuj wilik kʼih taqeh ehtalil irukʼuhtaaj chi wilik jenaj Dios, chi ne irub’an chi ne inqachʼikaaʼ qakʼux ruukʼ eh chi irubʼiraj taqeh ajwach wilik kikojbʼaal. Reʼ reh ma’ inqaqrik ta mi inqapahqaaj ruman i qakojbʼaal, insuqb’ik la’ ruk’ux chi ruye’ariik qeh (Lucas 17:5; Santiago 1:17).

Jeʼ reʼ noq, wilik jenaj chik i aajwaal wach chi ne inqab’an reh chi reʼ Dios ne irub’iraj i qatiij. Reʼ Jesús xuqʼor: «Xa wuum i hin naa rubʼaan ponik ruukʼ i WaJaaw wilik pan taxaaj» (Juan 14:6). Pan rubʼihnaal i Jesús ne irubʼan chi ne inqajil qiibʼ ruukʼ i Ajabʼees. Ruum ajreʼ, re’ Jesús xukʼuhtaaj keh taqeh rajtahqaneel chi nakibʼanam kitiij pan rubʼihnaal i reh (Juan 14:13; 15:16.) Jeʼ reʼ noq, reʼ tiij pan rubʼihnaal i Jesús maʼ iraaj ta ruqʼorom chi naqab’anam qatiij chuwach. Iraaj laʼ ruqʼorom chi inqatyooxeej i xubʼan chi qiij reh chi ne inqabʼan qʼorik ruukʼ i Qajaaw wilik cho pan taxaaj, jenaj Dios korik wach eh santo.

Jenaj pech, jenaj rajtahqaneel i Jesús xuqʼor reh: «Jaaw, inqaaj i hoj chi neenakʼuhtaaj qeh i tiij» (Lucas 11:1). ¿Chajariik xraaj ruqʼorom? Reʼ keh inkibʼan naq kitiij, xa reʼ laʼ inkaaj naq kinabʼeem chajariik naq i nakipahqaam pan kitiij.