Mañakuy

3 ¿Imaynatá mañakuna?

BIBLIAQA mañakuymanta, mana religiones ruwasqankumanjinachu yachachiwanchik. Mañakunapaq qunqurikunatapunichus, sayarikunatapunichus, imatapunichus ninanchikta ima mana niwanchikchu. Astawanqa, ima ruwaychus sumaq kasqanta niwanchik.

Bibliaqa, Diospa kamachisnin maypichus, imaynatachus mañakusqankuta riqsichiwanchik. Wakinqa, maypichus tarikusqankumanjina, sunqunku ukhupi chayri parlarispa mañakurqanku. Wakintaq janaq pachata qhawarispa, pampaman kʼumuykukuspa mañakurqanku. Ni jaykʼaq paykunaqa lantiswan, rosarioswan mañakurqankuchu. Astawanqa, imachus sunqunkupi kasqallanta mañakurqanku. ¿Imatataq Dios mañakuyninkupi allinpaq qhawarqa?

Ñawpa yachaqanapi rikunchikjina, mañakuykunaqa Jehovap sutinpipuni ruwakunan karqa. Kaytawan ruwanata 1 Juan 5:14 nin: “Diospi tukuy sonqo atienekunchej. Chayrayku munayninman jinachus imallatapis mañakunchej chayqa, yachanchej pay uyarinawanchejta”, nispa. Arí, mañakuyninchik Diospa munayninmanjina kanan tiyan. ¿Ima ninayantaq chay?

Ñawpaqtaqa imachus Diospa munaynin kasqanta yachananchik tiyan. Chaypaqqa, Bibliamanta allinta yachakunanchik tiyan. Jehovaqa mana, Bibliamanta tukuy imata yachaqman, tukunanchiktachu munan. Astawanqa munayninta, allinta entiendenachikpaq, juntʼananchikpaq ima, kallpachakunanchikta munan (Mateo 7:21-23). Bibliamanta yachakusqanchikqa, mañakuyninchikpi rikukunan tiyan.

Jehovamanta, munayninmanta ima, yachakullasunpuni chayqa, iñiyninchik wiñallanqapuni. Chantapis, Dios uyarinanpaqqa, iñiyniyuqpuni kananchik tiyan. Jesús nirqa: “Creespatajchus tukuy imata mañakunkichej chayqa, mañakusqaykichejta japʼinkichej”, nispa (Mateo 21:22). Imapichus, iñisqanchikta chayri creesqanchikta mana rikuspapis, mana ninayanchu imallapipis creey, manaqa imaschus chiqapuni kasqanpi (Hebreos 11:1). Jehovata mana rikuspapis Bibliaqa achkhaniqmanta, Dios kasqantapuni, atienekunapaqjina kasqanta, iñiyniyuqkunaman kutichisqanta ima, sutʼimanta rikuchiwanchik. Payqa, iñiyta mañakuptinchik mana phiñakunchu, astawanqa necesitasqanchikmanjina, iñiyta quyta munawanchik (Lucas 17:5; Santiago 1:17).

Mana chayllachu, Dios chiqamanta uyarinawanchikpaq kaytawan ruwananchik tiyan. Jesús nirqa: “Mana pipis Dios Tataman chayayta  atinchu, mana noqanejta rispaqa” (Juan 14:6). Arí, Jesusniqllata Diosman qayllaykuyta atisunman. !Chayraykuchá Jesús, payniqta mañakunanchikta yachachirqa! (Juan 14:13; 15:16.) Jesuspa sutinniqta mañakuyqa, mana ninayanchu paymanta mañakuchkasqanchikta. Manachayqa, janaq pachapi kaq Tatanchik, mana pantaq, santo Diosman, Jesusniqllata parlayta atisqanchikta, niyta munawanchik.

Jesusta, juk discipulon nirqa: “Señor, yachachiwayku Dios Tatamanta mañakuyta”, nispa (Lucas 11:1). ¿Imamantá parlachkarqa? Paykunaqa, mañakuyta yacharqankuña, astawanqa imastachus mañakunankuta tapuchkarqa.

[6 paginapi sutʼinchaynin]

Dios uyarinawanchikpaq, munayninmanjina, iñiywan, Jesusniqta ima, mañakunanchik tiyan