WAKIN religionkunachö rurayanqampitaqa, Biblia manam willakuntsu imanö churakëkur, ima palabrakunawan, ni imakunata rurar Diosman mañakunapaq kaqta. Antis más precisaq kaqkunallatam willakun.

Rasun kaqchöqa, Bibliaqa rikätsikun mëchöpis këkar y tukïnöpa churakëkur Diospa sirveqninkuna mañakuyanqantam. Höraqa shonqunkunallachö, sinchipa o jinchipa. Wakinnam ciëloman ñukirkur y wakinkunanam patsaman  rikarëkar mañakuyarqan. Pero imägenkunata, rosariokunata y rezakuyänan librokunataqa manam imëpis utilizäyarqantsu. Shonqunkunachö sienteyanqanllatam Diosta musyatsiyarqan. ¿Imanirtaq Diosqa mañakuyanqanta kushishqa wiyarqan?

Rikanqantsiknöpis, kikin Jehoväman mañakuyaptinmi, tsënö mañakïqa alläpam precisan. Pero manam tsëllatsu precisan, 1 Juan 5:14 textochömi kënö nimantsik: “Quemi noqantsicpa marcäquinintsic: Sitsun pe munashqanno imatapis mañacushun, wiyamäshunmi”. Kë texto ninqannöpis, mañakïnintsikqa Diospa munëninmannömi kanan. ¿Ima ninantaq tsëqa?

Puntataqa, Diospa munënin ima kanqantaran musyanantsik. Y tsëpaqqa Diospa Palabranta estudiananmi alläpa precisan. Jehoväqa manam Biblia ninqanta paqwë musyanataraqtsu shuyaran. Pero ima munënin kanqanta y yachakunqantsiknölla kawanatam sïqa munan (Mateo 7:21-23). Tsëmi Bibliapita yachakunqantsikmannö mañakunantsik.

Hinamampis, Jehoväpita y munënimpita más yachakurqa, masmi pëman markäkushun o yärakushun. Tsëmi alläpa precisan mañakunqantsikta Dios wiyamänapaqqa. Jesusmi kënö nirqan: “Llapan shonqiquicunawan marcäcur imatapis mañacorqa, chasquiyanquim” (Mateo 21:22). Markäkï mana rikanqantsikman crei kaptimpis, manam wisku cuenta creinanllatsu. Jesusqa rasumpa kaqta alli musyar-raq markäkïpaq o yärakuypämi parlëkarqan (Hebreus 11:1). Jehoväta rikëta mana puëdishqapis, Bibliaqa tukïnöpam rikätsimantsik rasumpa kawanqanta, markäkïpaq kanqanta y mañakunqantsikta wiyamänapaq listo këkanqanta. Pëqa manam piñakuntsu más markäkïyoq kanapaq mañakushqa, antis listom këkan yanapamänapaq (Lucas 17:5; Santiagu 1:17).

Tsënö kaptimpis, huk alläpa precisaqraqmi kan Diosnintsik wiyamänapaq. “Nogallawan[mi] quiquin Tayta Diosmanga chayta puediyanqui” nirqanmi Jesus (Juan 14:6 NTCN). Tsëmi, Jesuspa shutinllachö Diosmanqa witita puëdentsik. ¡Tsëchi qateqninkunata yachatsirqan shutinchö Diosman mañakuyänampaq! (Juan 14:13; 15:16.) Pero, Jesuspa shutinchö mañakurqa, manam pëmantsu mañakïkantsik. Antis pëpa shutinchö mañakunqantsik Diosman chëta puëdenqantam rikätsikïkantsik.

Huk kutim, “Diosman mañacuyänäpaq, noqacunatapis yachecatsiyämë” nirqan Jesusta huk qateqnin (Lucas 11:1). ¿Imanirtaq tsënö tapurqan? Pëkunaqa musyayarqannam imanö mañakuna kanqanta. Antis imakunapaq mañakuna kanqantam tapukïkäyarqan.