ASHTACA religioncunapica oracionda ruragrijushpaca imashina shayarina cashcata ali yachana, imacunatalla rurashpa mañana cashcata yachanami ashtahuan importante can nin. Shinapash Bibliapica na chaita yachachinllu.

Bibliapica Taita Diosta sirvijcuna imashina mañashcatami ricuchin. Huaquingunaca shayarishpa, cungurishpa shinallata shungu ucupilla, sinllita caparishpa, jahua cielota ricushpa, urai cumurishpa mañashcatami parlan. Shinapash paicunaca mana imapash imagencunata, rosariocunata o librocunata utilizashpa mañarcachu. Paicuna imashina sintirishcata villashpami mañashca. Shinaca ¿imamandata paicunapa oraciondaca Taita Diosca uyarca?

Paicunaca oracionda ruranajushpaca Jehová Diostami mañanajurca. Jehová Diospa shutipi mañanaca importantepachami can. Pero Bibliapica caitapashmi nin. 1 Juan 5:14​pica “Pai munashcashna ñucanchi imaguta mañajujtapash, Diosca uyanllami” ninmi. Shinaca ñucanchi mañaicunata pai uyachunga Dios munashcashnami mañana capanchi. Pai munashcashna mañana nishpaca ¿imatata ningapaj munan?

Pundapica Diospa munai maijan cashcatami yachana canchi. Chaipaca Bibliatami estudiana capanchi. Taita Diosca ñucanchicuna Bibliamanda tucui tucuita yachachunga na shuyanllu. Shinapash paipa munai maijan cashcata yachachun, paipa munaita pactachingapaj esforzarichunmi munan (Mateo 7:21-23). Shinaca Bibliapi yachajushcashnami mañai ushapanchi.

Shinallata Jehovamanda ashtahuan yachajushpaca ñucanchi femi ashtahuan shinlliyanga. Jehová Dios ñucanchi mañashcacunata uyachunga feta charinaca importantemi can. Chaimandami Jesusca nirca: “Tucui shunguhuan crishpa, Taita Diosta mañashpaca, imagutapash japinguichipachami nijurcami” (Mateo 21:22). Feta charinamanda parlashpaca Jesusca ruraicunahuanmi ricuchina canguichi nircami (Hebreos 11:1). Ciertomi can Jehová Diostaca nunca na ricui ushashcanchichu. Shinapash Bibliapica pai ciertopacha tiashcata, paipi confiai ushashcata shinallata paipi feta charijpi pai ñucanchita uyashcatapashmi yachachin. Chaimanda Jehová Diostaca ashtahuan feta carahuai nishpa mañanallami capanchi. Paica siempremi ñucanchi ima minishtirishcata carangapaj listo can (Lucas 17:5; Santiago 1:17).

Shinallata Taita Dios ñucanchi mañashcacunata uyachunga Jesuspa shutipimi mañana capanchi. Jesusca “Ñuca Taitapajman ñuca na pushajpica, pipash na paillata chayaita ushanllu” nircami (Juan 14:6). Shinaca Jesus ayudajpillami Jehová Diosmanga quimirita ushapanchi. Chaimandami Jesusca paipa catijcunataca Taita Diosta mañashpaca ñuca shutipi mañanguichi nishpa yachachirca (Juan 14:13; 15:16.) Jesuspa shutipi mañashpapash Jesustapachaca na mañanajunchichu. Ashtahuangarin Jesuspa shutipi mañai ushashcamandami ñucanchi oraciongunaca Jehová Diosman chayai ushan.

Shuj punllaca Jesuspa shuj discipulomi Taita Diosta “imashna mañanata yachachihuai, Apunchi Jesús” nishpa quimirirca (Lucas 11:1). ¿Imamandashi chashna nirca? Paicunaca Taita Diosta mañanataca yacharcami. Shinapash, imacunamandalla mañana cashcatami tapujurca.