ΜΠΟΥΤ θρησκείες σικλιαρένα ότι μερικά πράγματα σαρ ισί ο τρόπος σο τραμπίνασα τι μπεσάς ή ο λάφια σο χρησιμοποιήνασα ισί μπουτ σημαντικά κάνα κεράσα προσευχή. Αλλά, η Αγία Γραφή βοηθίνελα-αμέν μα τι ντας αζόμ μπουτ σημασία ανταλέντε ντα τι σκεφτίνας κάτι πο σημαντικός: «Σαρ πρέπει τι προσευχίντιβας;»

Κι Αγία γραφή διαβάνασα ότι ο υπηρέτες ι Ντεβλέσκε κερένας προσευχή μπουτέ τθανέντε ντα τραμπίνενας τι μπεσέν διαφορετικέ τροπόντζαρ. Γιαβερά κερένας προσευχή αντρά-πουμένταρ ντα γιαβερά ζουρανές, γιαβερά κερένας προσευχή ντα ντικχένας ο ουρανός ντα γιαβερά τθερένας τελέ πουμαρό σορό. Να χρησιμοποιήνενας εικόνες, είδωλα, κομποσκοίνια ή γιαβερά πράγματα, αλλά κερένας προσευχή αντράλ πουμαρέ γκίσταρ ντα χρησιμοποιήνενας πουμαρέ λάφια. Σόσκε ο Ντεβέλ ασουντάς λένγκε προσευχές;

Σαρ ντικχλάμ κο προηγούμενος θέμας, βον κερένας προσευχή σάντε εκχέ Ντεβλέστε​—κο Ιεχωβά. Ισί, όμως, κάτι γιαβέρ-ντα. Κο εδάφιος 1 Ιωάννη 5:14 διαβάνασα: «Ανταγιά ισί η σιγουριά σο τθεράσα λέσκε, ότι σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα, βοβ ασουνέλα-αμέν». Αμαρέ προσευχές πρέπει τι συμφωνίνεν οντουλέσαρ σο μανγκέλα ο Ντεβέλ. Σο μανγκέλα τι βακερέλ ανταβά;

Για τι κέρας προσευχές σο συμφωνίνενα οντουλέσαρ σο μανγκέλα ο Ντεβέλ, πρέπει τι τζανάς καβά ισί οντουβά σο μανγκέλα. Οντουλέσκε, πρέπει τι διαβάνας ι Γραφή για τι τζανάς σο ισί οντουβά σο μανγκέλα ο Ντεβέλ ντα για τι τζανάς καλέ πραγματένγκε τι προσευχίντιβας. Μήπως, όμως, πρέπει τι τζανάς σαρί ι Γραφή για τι ασουνέλ ο Ντεβέλ αμαρέ προσευχές; Όχι. Ο Ντεβέλ μανγκέλα αμένταρ τι σικλιάς καβά ισί οντουβά σο μανγκέλα, τι προσπαθίνας τι αγαβάς-λες ντα τι κεράς οντουλά σο σικλιάσα. (Ματθαίος 7:21-23) Πρέπει τι κεράς προσευχές σο συμφωνίνενα οντουλέντζαρ σο σικλιάσα.

Καζόμ πο μπουτ σικλιάσα ι Ιεχωβάσκε ντα οντουλέσκε σο μανγκέλα, αμαρί πίστη αβέλα πο ζουρανί​—ντα ανταβά ισί μπουτ σημαντικός κανά κεράσα προσευχή. Ο Ιησούς βακερντάς «Σαρέ οντουλά σο μανγκένα κι προσευχή άμα τθερένα πίστη κα λεν-λεν». (Ματθαίος 21:22) Τι τθεράς πίστη να μανγκέλα τι βακερέλ ότι πακιάσα σαρέ ο πράγματα χωρίς αποδείξεις. Μανγκέλα τι βακερέλ τι τθεράς λόγος τι πακιάς κάτι, παρόλο σο ναστί ντικχάσα-λες. (Εβραίους 11:1) Η Γραφή τθερέλα μπουτ αποδείξεις ότι ο Ιεχωβά, σο ναστί ντικχάσα-λες, ισί πραγματικός, μπορίνασα τι ντας λέσκε μπέσα ντα μανγκέλα τι απαντίνελ κο προσευχές οντουλένγκε σο τθερένα πίστη λέστε. Επίσης, μπορίνασα κάθε στιγμή τι μανγκάς πο μπουτ πίστη, ντα ο Ιεχωβά χαιρίνελα τι ντελ-αμέν οντουβά σο τθεράσα ανάγκη.​—Λουκάς 17:5·Ιακώβου 1:17.

Ισί όμως εκ γιαβέρ-ντα σημαντικός πράγμας σο πρέπει τι σκεφτίνας κάνα κεράσα προσευχή. Ο Ιησούς βακερντάς: «Καέκ τζενό να αβέλα κο Ντατ άμα να αβέλα αντράλ μάνταρ». (Ιωάννης 14:6) Μπορίνασα τι κεράς προσευχή κο Ιεχωβά σάντε αντράλ κατά Ιησούς. Άκ’ σόσκε, ο Ιησούς βακερντάς πι μαθητένγκε τι κερέν προσευχή λέσκε ναβέστε. (Ιωάννης 14:13· 15:16) Ανταβά να μανγκέλα τι βακερέλ ότι κεράσα προσευχή κο Ιησούς, αλλά κεράσα προσευχή κο ναβ κι Ιησούσκο, ντα τθεράσα αμαρέ γκοντιάτε ότι χάρη λέσταρ μπορίνασα τι αβάς πασέ αμαρέ τέλειε ντα άγιε Νταντέστε.

Εκ φαρ, ο απόστολοι ι Ιησούσκε βακερντέ-λέσκε: «Κύριε, σίκλιαρ-αμέν σαρ τι προσευχίντιβας». (Λουκάς 11:1) Σίγουρα, να μανγκένας λέσταρ τι εξηγίνελ λένγκε βασικά πράγματα, σαρ οντουλά σο ντικχλάμ. Μανγκένας τι σικλιόν καλέ πραγματένγκε έπρεπε τι προσευχίντιβεν. Γιαβερέ λαφίντζαρ πουτσλέ: “Καλέ πραγματένγκε πρέπει τι κεράς προσευχή;”