КАЛА дума жал пала молитва, бут мануша гиндон, сар вонэ када трэбуй тэ терэн, тэ бэшэн или тэ тердён. Ай кадяжэ гиндон, савэ алава трэбуй тэ ԥэнэн и кай када тэ сжалпэ лэндиря вераса. Но и Библия поможый амэнди май бут тэ шас сама най пэ кадэла маменторя, ай пэ кода, со май важно. Например: «Сар амэ трэбуй тэ мангаспэ?»

Андэ Библия ԥэнэнпэ пала преданни лэ Иеговастирэ служытеля, савэ мангэнаспэ андэ разни ҭана. Вонэ терэнас када по разному, ко бэшэлас, ко тердёлас, ай варико мангэласпэ инке варисар. Андэ разни ситуацыи, вонэ мангэнаспэ андо гиндо или вслух. Ай инке вонэ мангэнаспэ, кала диқэнас по нэбо или аравэнас о шэро. Вонэ мангэнаспэ анда вся оди и вонэ важ када на лэнас нисави картина, нисавэ чотки андэ вас и нисави книжка, андэ сави запистромэ и молитвы. Тоди сар лэндирэ молитвы о Дэл ашунэлас?

Сар сас ԥэндо андэ статья май англал, кадэла преданни лэ Иеговастирэ служытеля мангэнаспэ кати еқэ Дэвлэсти, лэ Иеговасти. Но исин инке ек маменто. Андэ 1 Иоанна 5:14 ԥэнэнпэ: «И акэ андэр со амэ патяс, со бы амэ тэ на мангас лэ Дэвлэстар, во ашунэл амэн, если мангас кода, со сжалпэ лэстиря времяса». Амарэ молитвы трэбуй тэ сжанпэ лэ Иеговастиря времяса. Со када значит?

Кай тэ мангаспэ кадя, кай тэ сжалпэ лэ Дэвлэстиря времяса, трэбуй тэ ӷанас, со када за время? Кай тэ полас када, трэбуй тэ изучаем и Библия. Сыкавэл када, кай о Дэл амэн на лэла тэ ашунэл, если амэ найдраго ӷанас и Библия? Канешно най. Но о Дэл аштярэл, кай амэ ласа тэ уӷанас лэстири время, тэ стас зор тэ полас ла и тэ терас кадя, сар уӷанглям (Матфея 7:21—23). Кадяжэ амари молитва трэбуй тэ сжалпэ кодэлэса, пала со амэ уӷанглям.

Кала амэ май бут уӷанас пала Иегова и пала лэстири время, амэ лас май фартэ тэ патяс лэсти. Ай када фартэ важно маменто. О Иисусо ԥэндя: «Вся, со бы тэ на мангэн андэ молитва, важ кода кай патян, тумэнди авэла дино» (Матфея 21:22). Кала лэ манушэстэ исин вера, када на сыкавэл, кай во патял кажнонэ алавэсти. Кай и чачуни вера андэ кода, со на дицол, трэбуй тэ авэн доказательства (Евреям 11:1). Например, андэ Библия исин бут со до ԥэнэн, кай о Иегова, савэс амэ нэ можэм тэ диқас, па чачимастэ исин. Во подритярэл амэн андэ любо время и виашунэл и молитвы кодэлэндирэ, ко патял лэсти. Амэ можэм вся время тэ мангас лэ Иеговастар, кай май фартэ тэ патяс лэсти, ай о Иегова радосавэл тэ дэл кода, со амэнди трэбуй (Луки 17:5; Иакова 1:17).

Исин инке ек важно маменто. О Иисусо ԥэндя: «Нико на авэл каринг мэрно Дад па аврятэ, сар кати через мандэ» (Иоанна 14:6). Амэ можэм тэ авас май пашэ каринг амаро Дад, каринг о Иегова, через о Иисусо. Важ када о Иисусо сытярэлас пэстирэ учениконэн, кай вонэ тэ мангэнпэ через лэско алав (Иоанна 14:13; 15:16). Но када на сыкавэл, кай амэ мангаспэ лэ Иисусости. Амэ мангаспэ через лэ Иисусоско алав. Кадя амэ сыкавас, кай блаӷодаря лэсти амэ можэм тэ пашувас каринг амаро совершэно и свынто Дад.

Лэ Иисусостирэ пашутнэ ученикоря еқвар манглэ лэс: «Ӷосподо, сытяр амэн тэ мангаспэ» (Луки 11:1). Канешно, вонэ на пушэнас, сар тэ мангэспэ. Па чачимастэ, вонэ камэнас тэ уӷанэн, пала со трэбуй тэ мангэспэ.