3 Faapefea Ona Tatalo?

PE A talanoa i le tatalo, o le tele o lotu e taulaʻi atu i gaoioiga e fai a o tatalo, e pei o le tulaga o le tino, o upu ma tū masani. Ae ua fesoasoani mai le Tusi Paia ia tatou lē taulaʻi atu i na mea, ae ia uaʻi atu i vala tāua o le fesili, “E faapefea ona tatalo?”

O loo faamatala i le Tusi Paia auauna faamaoni a le Atua o loo tatalo i le tele o nofoaga ma tulaga o le tino. Na latou tatalo lē leoa pe leotetele foʻi e fua i tulaga na iai. Na latou tatalo a o vaavaai atu i le lagi, pe a o punonou i lalo. Na tatalo atu mai i le loto i a latou lava upu, nai lo o le faaaogā o ni faatusa, ula e fai i lopā ninii po o ni tusi tatalo. Aiseā na faafofoga ai le Atua i a latou tatalo?

E pei ona taʻua i le mataupu ua mavae, na latou tatalo atu tau lava o le Atua e toʻatasi, o Ieova. E iai foʻi se isi mea tāua. Ua taʻua i le 1 Ioane 5:14: “O le mea lenei ua tatou mautinoa ai i le Atua, po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.” E ao ona ōgatusa a tatou tatalo ma le finagalo o le Atua. O le ā le uiga?

Ina ia tatalo e tusa ma le finagalo o le Atua, e ao ona tatou iloa lona finagalo. O le suʻesuʻeina la o le Tusi Paia, o se vaega e tāua tele i le tatalo. Po o le uiga o lenei mea o le a lē faafofoga mai le Atua pe a tatou lē popoto i le Tusi Paia? E leai, ua faatalitalia i tatou e le Atua ia saʻili lona finagalo, ia malamalama i ai ma faia. (Mataio 7:21-23) E ao ona tatou tatalo e tusa ai ma mea ua aʻoaʻoina.

A o tatou aʻoaʻoina e uiga iā Ieova ma lona finagalo, e faateleina ai lo tatou faatuatua, o se isi vaega e tāua tele i le tatalo. Na fetalai Iesu: “O mea uma e tou te talosaga atu ai i le faatuatua, tou te maua lava.” (Mataio 21:22) O le faatuatua, e lē o le talitonu lea i so o se mea e aunoa ma ni faamaoniga. Ae o le talitonu i se mea e ui e lē o vaaia, ma o loo lagolagoina i se faamaoniga mautinoa. (Eperu 11:1) E tele faamaoniga i le Tusi Paia e iloa ai, e ui e lē vaaia Ieova, ae e moni o ia ma maufaatuatuaina, ma e finagalo e tali mai i tatalo a ē e faatuatua iā te ia. E mafai foʻi ona talosaga atu ia faateleina lo tatou faatuatua, ma e finagalo Ieova e tali mai i a tatou tatalo.—Luka 17:5; Iakopo 1:17.

Ae o se isi nei o mea e tāua i le auala e tatalo ai. Na fetalai Iesu: “E leai se tasi e alu atu i le Tamā pe a lē ui mai iā te aʻu.” (Ioane 14:6) O Iesu la o le auala lea e tatou te tatalo atu ai i le Tamā, o Ieova. O lea na fetalai ai Iesu i  ona soo ia tatalo atu i lona igoa. (Ioane 14:13; 15:16) O lona uiga e lē faapea e tatau ona tatou tatalo atu iā Iesu. Ae e tatou te tatalo i le igoa o Iesu, i le manatua lea o ia ua mafai ai ona tatou tatalo atu i le Tamā lelei atoatoa ma paia.

Na talosaga atu iā Iesu ona soo pele: “Le Alii e, ia e aʻoaʻo mai iā i matou i le tatalo.” (Luka 11:1) E latou te leʻi talosaga atu e uiga i mea ia na tatou talanoaina. Na latou fia iloa mea e aofia ai i a latou tatalo, e pei o loo faapea atu, ‘O ā mea e tatalo atu ai?’

[Faamatalaga faaopoopo i le itulau 6]

O le a taliaina tatalo e tusa ma le finagalo o le Atua, faia i le faatuatua ma e ala atu i le suafa o Iesu