Orasaun

3 Oinsá?

RELIJIAUN barak hanorin buat oioin kona-ba orasaun, porezemplu oinsá atu hamriik ka hakruʼuk, liafuan neʼebé sira tenke uza, no buat seluk tan neʼebé ema tenke halo tuir. Tuir loloos, Bíblia esplika kona-ba buat hirak-neʼe, no mós esplika buat neʼebé importante liu kona-ba pergunta: “Oinsá mak ita halo orasaun ba Maromak?”

Bíblia hatudu katak Maromak nia atan sira halo orasaun ho pozisaun oioin no iha situasaun oioin. Sira halo orasaun iha laran ka ho lian makaʼas tuir situasaun. Sira harohan hodi hateke ba lalehan ka hodi hakruʼuk. Sira la uza imajen, tersu, ka livru orasaun, maibé sira halo orasaun husi laran no ho sira-nia liafuan rasik. Tansá mak Maromak rona ba sira-nia orasaun?

Hanesan temi tiha ona, sira hatoʼo orasaun ba Maromak Jeová deʼit. Maibé iha buat ida tan neʼebé importante. Hanoin toʼok saida mak 1 Joao 5:14 hatete: “Ita laran-metin iha Maromak futar oin, katak wainhira ita husu buat ruma tuir nia hakarak, nia rona ita.” Sin, ita tenke halo orasaun hodi tuir Maromak nia hakarak. Atu halo nuneʼe, ita presiza halo saida?

Atu halo orasaun hodi tuir Maromak nia hakarak, ita presiza hatene saida mak Maromak nia hakarak. Tan neʼe, importante tebes atu estuda Bíblia. Ida-neʼe katak ita tenkesér bá eskola boot atu sai matenek kona-ba Bíblia ka lae? Lae. Maromak hakarak ita atu buka-hatene ninia hakarak no halo tuir. (Mateus 7:21-23) Sin, atu Maromak rona ita-nia orasaun, ita presiza halo orasaun hodi tuir buat neʼebé ita aprende ona.

Nuʼudar ita aprende kona-ba Maromak Jeová no ninia hakarak, ita-nia fiar sai metin liután. Ida-neʼe mak buat ida tan neʼebé importante tebes kuandu ita halo orasaun. Jesus hatete: “Imi fiar karik, buat hotu neʼebé imi husu iha orasaun, imi sei simu.” (Mateus 21:22) Fiar neʼe laʼós katak naran fiar deʼit. Kuandu Bíblia uza liafuan “fiar”, neʼe katak ema tau fiar ba buat ruma tanba nia iha ona evidénsia, ka buat ruma neʼebé hatudu ho klaru katak ninia fiar neʼe mak tebes duni. (Ebreu 11:1) Bíblia nakonu ho evidénsia neʼebé hatudu ho klaru katak, maski ita la bele haree Maromak, maibé nia iha duni no nia prontu atu rona fiar-naʼin sira-nia orasaun. Laʼós neʼe deʼit, ita mós bele husu Maromak Jeová nia ajuda atu hametin ita-nia fiar, no nia hakarak duni atu ajuda ita.—Lucas 17:5; Tiago 1:17.

Jesus mós koʼalia kona-ba buat seluk tan neʼebé ita tenke halo kuandu ita halo orasaun. Nia hatete: “Ema ida la liu karik husi haʼu, nia la bele hakbesik haʼu Aman.” (Joao 14:6) Sin, liuhusi Jesus deʼit mak ita bele hakbesik ba Aman Jeová. Tan neʼe, Jesus hanorin ninia dixípulu sira atu halo orasaun  hodi ninia naran. (Joao 14:13; 15:16) Neʼe la dehan katak ita tenke halo orasaun ba Jesus. Maibé ita halo orasaun hodi Jesus nia naran tanba ita rekoñese katak Jesus deʼit mak loke dalan mai ita atu bele hakbesik ba ita-nia Aman santu.

Jesus nia dixípulu balu husu ba nia: “Naʼi, hanorin ami atu harohan.” (Lucas 11:1) Klaru katak sira la husu kona-ba oinsá atu halo orasaun. Tuir loloos, sira husu kona-ba buat saida deʼit mak sira bele temi iha orasaun.

[Liafuan neʼebé foti husi pájina 6]

Atu Maromak rona ema nia orasaun, importante atu halo orasaun tuir ninia hakarak, hodi fiar, no liuhusi Jesus nia naran