PA NKHANI ya pempheru,visopa vinandi vididimizga ukongwa mo munthu wangamiya pakupemphera, malu ngo wangapemphere, vo watenere kuchita ndipuso mazu ngo wangakamba. Kweni Bayibolu lilongo kuti venivi vilivi ntchitu ukongwa. Ndipu lititichiska kuti tiŵanaŵaniyengi chinthu chinyaki chakukhumbika ukongwa pa fumbu lakuti, “Kumbi tingapemphera wuli?”

Bayibolu lizumbuwa ateŵeti anyaki aku Chiuta wo apempheriyanga mumalu ngakupambanapambana ndipuso amanga mwakupambanapambana pakupemphera. Anyaki apempheranga chamumtima ndipu anyaki atuzganga mazu mwakukoliyana ndi mo vinthu venge achipemphera. Anyaki alereskanga kuchanya pakupemphera penipo anyaki asindamanga. Mumalu mwakugwiriskiya ntchitu vikozgu, mikanda pamwenga kuchita kuŵerenga mapempheru kutuliya mumabuku, yiwu apempheranga kutuliya mumtima. Ntchinthu wuli chachitiskanga kuti Chiuta wavwengi mapempheru ngawu?

Nge po takambiyapu kali mu nkhani yajumpha, yiwu apempheranga kwaku Chiuta yumoza pe, Yehova. Kweniso pe chinthu chinyaki chakukhumbika ukongwa. Chinthu ichi chisanirika pa 1 Yohane 5:14 po patiti: “Te ndi chigomezgu mwaku iyu, kuti chechosi cho tingapempha mwakukoliyana ndi khumbu laki watitivwa.” Mapempheru ngidu ngakhumbika kukoliyana ndi khumbu laku Chiuta. Kumbi venivi ving’anamuwanji?

Kuti tipempherengi mwakukoliyana ndi khumbu laku Chiuta, ndikuti tikhumbika dankha kuziŵa vo iyu wakhumba. Yapa viwoneke limu kuti kusambira Bayibolu nkhwakukhumbika ukongwa kuti mapempheru ngidu ngaje ngakuzomerezeka. Kweni kumbi venivi ving’anamuwa kuti Chiuta wavwisiya mapempheru nga akaswiri a Bayibolu pe? Awa. Kweni Chiuta wakhumba kuti tisambirengi Bayibolu kuti tiziŵi khumbu laki ndipuso kuti tichitengi vo iyu wakhumba. (Mateyu 7:21-23) Pavuli paki, tikhumbika kupemphera mwakukoliyana ndi vo tisambira.

Asani tisambira vakukwaskana ndi Yehova ndipuso khumbu laki, chivwanu chidu chikuwa. Chivwanu ntchinthu chakukhumbika so ukongwa pa nkhani ya pempheru. Yesu wangukamba kuti: “Vinthu vosi vo mwazamupempha mwachivwanu, mwazamupaskika.” (Mateyu 21:22) Kuja ndi chivwanu kung’anamuwa kugomezga waka vinthu mwachipulamutu cha. Kweni kung’anamuwa kugomezga chinthu cho che ndi ukaboni wanthazi wambula kukayikisa chinanga kuti chiwoneka cha. (Aheberi 11:1) Mu Bayibolu mwe maukaboni nganandi ngo ngalongo kuti Yehova waliku nadi chinanga kuti tingamuwona cha. Iyu ngwakuthembeka kweniso ngwakunozgeka kumuka mapempheru nga ŵanthu wo ŵe ndi chivwanu mwaku iyu. Chinyaki ntchakuti tingapempha Yehova kuti watisazgiyeku chivwanu, ndipu iyu ngwakunozgeka kuchita venivi.—Luka 17:5; Yakobe 1:17.

Sonu wonani so chinthu chinyaki chakukhumbika ukongwa pa nkhani ya mo tingapemphere. Yesu wangukamba kuti: “Palivi munthu yo watuza kwa Ada kwambula kuziya mwaku ini.” (Yohane 14:6) Yapa tingakamba kuti Yesu ndiyu nthowa yo isi tingafikiya kwa Ada Yehova. Ndichu chifukwa chaki Yesu wangukambiya akusambira ŵaki kuti apempherengi mu zina laki. (Yohane 14:13; 15:16) Sonu kumbi venivi ving’anamuwa kuti tikhumbika kupemphera kwaku Yesu? Awa! Mumalu mwaki munthu yo wapemphera mu zina laku Yesu walongo kuti waziŵa kuti chifukwa chaku Yesu, tifiska kulongoro ndi Ada akuchanya wo mbakufikapu ndipuso akupaturika.

Nyengu yinyaki akusambira aku Yesu angumupempha kuti: “Ambuya, tisambizeni kupemphera.” (Luka 11:1) Yapa viwoneke limu kuti anganya yaŵa apenjanga kuti Yesu waŵasambizi fundu zo takambiskana mu nkhani iyi cha. Mumalu mwaki yiwu afumbanga vinthu vo akhumbikanga kuzumbuwa pakupemphera. Mwaviyo tingakamba kuti afumbanga kuti, ‘Kumbi tikhumbika kupemphere vinthu wuli?’