Mupailo

3 Mbuti Mbotweelede Kupaila?

CABOOLA kumakani aakupaila, zilengwa zyamuzikombelo zinji zibikkila maano kapati kuzyintu zilibonya mbuli kukkala naa kwiimikila munzila iilibedelede, mabala aambwa atulengwa tumwi. Nokuba boobo, Bbaibbele lilatugwasya kuziyumbila ambali zyintu zili boobo akutugwasya kubikkila maano kapati kumubuzyo uuyandika wakuti, “Mbuti mbotweelede kupaila?”

Bbaibbele lilatwaambila kujatikizya babelesi ba Leza basyomeka mbubakali kupaila mumasena amuziimo ziindene-indene. Bakali kupaila cakaumu-umu naa cakupozya kweelana abukkale mbobwakabede aciindi eeco. Bakali kupaila kabalangide kujulu naa kabakoteme. Muciindi cakubelesya zikozyanyo, tulungu amabbuku aamipailo, bakali kupaila camoyo woonse. Ino ncinzi cakapa kuti Leza ayiingule mipailo yabo?

Mbubwenya mbokwaambwa kale mucibalo cainda, mipailo yabo yakagamikidwe kuli Leza omwe—Jehova. Kuli kaambo akamwi kayandika kapati. Kulugwalo lwa 1 Johane 5:14 tubala kuti: “Oolu ndolusinizyo ndotujisi mulinguwe, kuti kufwumbwa cintu ncotumulomba ceendelana akuyanda kwakwe, ulatumvwa.” Mipailo yesu yeelede kweendelana akuyanda kwa Leza. Ino eeco caamba nzi?

Kutegwa tupaile kweelana akuyanda kwa Leza, tweelede kuzyiba ncayanda. Aboobo, kwiiya Bbaibbele, ncibeela ciyandika kapati camupailo. Sena eeci caamba kuti Leza takatuswiilili kuti tiitwakaliiya kapati Bbaibbele? Peepe, Leza uyanda kuti tulwiiye luyando lwakwe, tuluteelele akulucita. (Matayo 7:21-23) Tweelede kupaila kweelana ancotwiiya.

Notuyaabwiiya kujatikizya Jehova aluyando lwakwe, tulakomena mulusyomo—oobu mbube abumbi buyandika kapati mumupailo. Jesu wakaamba kuti: “Zyintu zyoonse nzyomulomba mumupailo kamujisi lusyomo, muyoozitambula.” (Matayo 21:22) Kuba alusyomo takuli kwiile kusyoma buyo. Muciindi caboobo, caamba kuba alusyomo mucintu cimwi cakuti nokuba kuti tacilibonyi, pesi katujisi bumboni buzwide butupa kucisyoma. (Bahebulayo 11:1) Bbaibbele lilijisi bumboni buzwide bwakuti Jehova ngotutaboni, muntu mwini-mwini ngotukonzya kusyoma alimwi ulilibambilide kuswiilila baabo bajisi lusyomo mulinguwe. Kunze lyaboobo, tulakonzya kumulomba kuti atugwasye kuba alusyomo luyumu alimwi Jehova ulayanda kutupa nzyotuyandika.—Luka 17:5; Jakobo 1:17.

Njeeyi nzila aimwi iikonzya kutugwasya mbotukonzya kupaila. Jesu wakaamba kuti: “Kunyina uuboola kuli Taata ccita kuti wainda mulindime.” (Johane 14:6) Aboobo, Jesu nenzila njotukonzya  kubelesya kusikila Taateesu, Jehova. Nkakaambo kaako Jesu ncaakaambila basikumutobela kuti kabapaila muzyina lyakwe. (Johane 14:13; 15:16) Eeci tacaambi kuti tweelede kupaila kuli Jesu. Muciindi caboobo, tulapaila kwiinda muzyina lya Jesu, katuyeeyede kuti Jesu nguupa kuti cikonzyeke kumusikila Taateesu uulondokede alimwi uusalala.

Basikutobela ba Jesu mbaakali kumvwana limwi bakamubuzya kuti: “Mwami, kotuyiisya mbotweelede kupaila.” (Luka 11:1) Cilalibonya kuti tiibakali kubuzya makani mbuli yaaya ngotwabandika kale. Bakali kuyanda kuzyiba ncobakonzya kubikkilizya mumupailo—mubwini bakali kubuzya kuti, ‘Ncinzi ncotweelede kupailila?’

[Majwi aakwelelezya sikubala aali apeeji 6]

Mipailo njaingula Leza ileendelana akuyanda kwakwe, ilapailwa calusyomo alimwi ilaambwa kwiinda muzyina lya Jesu