JA STUKIL ja jastal wa skʼulane jitsan relijyon, ja Biblia mini jel xyayi stʼilanil jastal ajyel, ja yaljeliki sok ja kostumbreʼik bʼa yajelyi orasyon. Jani mas wa xyayi stʼilanil sbʼaja sjobʼjelik mas tʼilani.

Ja smeranili ja Biblia wa xyala ke yaʼtijumik toj ja Dyos wane yaweyi orasyon bʼa tuktukil lugar sok tuktukil ja jastal aye. Jastalni ja bʼa wane taxeli, yaweyi orasyon jach chʼabʼan sok ekʼeleʼik jach tsats. Jujuntik skʼelawekʼe ja satkʼinali, sok tuk koʼye tinan bʼa luʼum. Mini jun ekʼele ya makunuke imajenik, rosarioʼik ma libroʼik bʼa orasyon. Kechantani yalawe jaman lek jastal ay xyabʼye ja bʼa skʼumale. ¿Jasa yaʼakan bʼa smaklay ja Dyos ja yorasyone?

Jastalni staʼa tiʼal ja bʼa artikulo ekʼta, jani yaweyi orasyon ja Jyoba jun jasunuk jel tʼilan. Pe ja 1 Juan 5:14 wa xchiktes pilan rason: «Ja keʼntiki wani xjipa jkʼujoltiksok ja yeʼn, ke wani xbʼobʼ jkʼantikyi chikan jasa bʼa akuerdo ay soka jas wa skʼana sok jaxa yeʼni wani smaklayotik». Jachukniʼa, ja korasyontiki tʼilani akuerdo ay soka jas wa skʼana ja Jyoba. ¿Jas wa stojolan ja it?

Ja jas bʼajtan oj kʼulaxuk, jani tʼilan oj natik jasunkiluk wa skʼana ja Dyos. Ja yujil, jelni tʼilan oj katikyi estudio ja Yabʼali. Ama ja Jyoba mi smajlay oj kʼotkotik june maʼ jel chapan sbʼaja Biblia. Pe wani skʼana oj kʼujoluktik yabʼjel stojol ja jastik wa skʼana sok skʼulajel (Mateo 7:​21-23). Ja jas wa xnebʼatik bʼa Biblia tʼilani oj chiknajuk ja bʼa korasyontiki.

Chomajkil, yajni mas wa xnebʼatik bʼa Jyoba soka jas wa skʼana, masni wa stsatsbʼi ja skʼuʼajel kiʼojtiki. Ja it juni pilan modo jel tʼilan bʼa oj smaklayotik ja Dyos, pes ja Jesús yala: «Yibʼanal ja jas waxa kʼanawex bʼa orasyon, ta aya wiʼojex skʼuʼajel, ojni ajukawilex» (Mateo 21:22). Ama ja ajyelkujtik skʼuʼajel ti chʼikan skʼuʼajel bʼa jun jasunuk mi x-ilxi, mini wa stojolan pasilxta skʼuʼajel bʼa jun jasunuk: ja skʼuʼajel staʼa tiʼal ja Jesús kujlajel lek yuj prebaʼik (Hebreos 11:1). Meran mi xbʼobʼ kiltik ja Jyoba, pe ja bʼa Biblia ayni jitsa preba bʼa sakʼan ay, bʼa wa xbʼobʼ jipxuk kʼujol sok wa sjakʼayi ja maʼ ayiʼoj skʼuʼajeli. Ja yeʼn mini tuk xyabʼ ja oj kʼantikyi skʼuʼajel; jaʼuktoma, tolabida xkʼankʼuniyuj yajelkitik ja jas wa xmakunikujtiki (Lucas 17:5; Santiago 1:17).

Pe aytoni pilan jasunuk jel tʼilan bʼa oj smaklayotik ja Dyos. «Mini maʼ xbʼobʼ kʼotuk soka Tatal ta mi jaʼuk ja keʼni», jach yala ja Jesús (Juan 14:6). Bʼa pilan yaljel, ja Yunin ja Dyos yeʼnani ja único wa xyaʼakan bʼa wa xbʼobʼ mojxukotik soka Tatal. ¡Jakʼa yuj ja Jesús sjeʼayi ja snebʼumanik ayaweyi orasyon bʼa sbʼiʼil! (Juan 14:13; 15:16). Pe yajelyi orasyon bʼa sbʼiʼil ja Jesús mini wa stojolan yajelyi orasyon yeʼna. Ja jas ti chikan jani oj natik ke stsʼakatal yuja yeʼn wani xbʼobʼ katikyi orasyon ja jTatik bʼa satkʼinal, jun Dyos mey yiʼoj mulal sok sak.

Jun ekʼele june ja bʼa snebʼumanik ja Jesús skʼana ja it: «Kajwal, je’akitikon yajelyi orasyon» (Lucas 11:1). ¿Bʼa jas wan stajel tiʼal? Waneni sjobʼjel sbʼaja jas ti chʼikan ja bʼa orasyoniki, bʼa jani kʼotel ja jastik oj k’anxuki. Chikani lek ja yeʼnle wanxani snaʼawe jastal yajelyi orasyon.