PA nkhani ya lurombo, visopa vinandi vikudidimizga comene pa umo munthu wakwenera kukhalira para wakulomba, mazgu agho wakwenera kuyowoya, ndiposo tumaluso tunyake uto wakwenera kulondezga. Kweni Baibolo likutovwira kuti tileke kuŵika comene mahara pa umo takhalira pakulomba kweni pa fumbo lakuzirwa comene lakuti “Kasi tikwenera kulomba wuli?”

Baibolo likulongosora za ŵateŵeti ŵanandi ŵa Ciuta awo ŵakalomberanga pa malo ghakupambana ndiposo ŵakakhala mwakupambanapambana. Ŵakalombanga camumtima panji mwakukwezga mazgu kuyana na umo vinthu viliri. Ŵanyake ŵakalombanga uku ŵakulaŵiska kucanya, ŵanyake cakugwada. Pakulomba ŵakagwiliskiranga nchito vikozgo panji majuda yayi, nesi mabuku gha malurombo ghakulembekerathu, kweni ŵakalombanga ivyo vili mu mtima, ŵakayowoyanga mazgu ghawo na ghawo. Kasi nchivici cikapangiska kuti Ciuta wapulike malurombo ghawo?

Nga umo nkhani iyo yajumpha yayowoyera, pakulomba ŵakalombanga kwa Ciuta uyo zina lake ni Yehova. Paliso fundo yinyake yakuzirwa. Tikuyiŵazga pa 1 Yohane 5:14, yikuti: “Ici nchigomezgo ico tili naco mwa iyo, cakuti kanthu kalikose ako tingalomba mwakuyana na khumbo lake, wakutipulika.” Malurombo ghithu ghakwenera kukolerana na khumbo la Ciuta. Kasi fundo iyi yikung’anamuraci?

Kuti tilombe mwakukolerana na khumbo la Ciuta, tikwenera kulimanya dankha khumbo lake. Ipo nchakukhumbikwa kuti tiŵazgenge Baibolo kuti malurombo ghithu ghaŵenge ghakwenelera. Kasi ici cikung’anamura kuti Ciuta wapulikenge yayi malurombo ghithu mpaka tiŵe dankha nkhwantha pa Baibolo? Yayi, kweni Ciuta wakukhumba kuti tisambire khumbo lake, kuyezgayezga kulipulikiska na kulilondezga. (Mateyu 7:21-23) Tikwenera kulomba mwakukolerana na ivyo tikusambira.

Apo tikusambira za Yehova na khumbo lake, cipulikano cithu cikukhora, ndipo ici naco nchakukhumbikwa comene kuti malurombo ghithu ghazgorekenge. Yesu wakati: “Vinthu vyose ivyo mukupempha mu lurombo, pakuŵa na cipulikano, mupokerenge.” (Mateyu 21:22) Cipulikano cikung’anamura kugomezga waka vilivyose yayi. Kweni cikung’anamura kugomezga cinthu ico nangauli cikuwoneka yayi, kweni pali ukaboni wankhongono wakuti ciliko. (Ŵahebere 11:1) Mu Baibolo muli ukaboni wakukwana wakuti Yehova, uyo tingamuwona yayi, waliko nadi, ngwanadi, ndipo ngwakunozgeka kuzgora malurombo gha awo ŵali na cipulikano mwa iyo. Kweniso, tingamulomba kuti wasazgireko cipulikano cithu, ndipo Yehova ngwakunozgeka kutipa ivyo tikusoŵa.—Luka 17:5; Yakobe 1:17.

Paliso fundo yinyake yakuzirwa comene yakukhwaskana na umo tikwenera kulombera. Yesu wakati: “Palije uyo wakwiza ku Ŵadada kweni kwizira mwa ine.” (Yohane 14:6) Ntheura, pakulomba kwa Ŵadada ŵithu Yehova, tikwenera kwizira mwa Yesu. Ndico cifukwa  Yesu wakaphalira ŵalondezgi ŵake kuti ŵalombenge mu zina lake. (Yohane 14:13; 15:16) Ici kuti cikung’anamura kuti tikwenera kulomba kwa Yesu yayi. Kweni tikulomba mu zina la Yesu, cifukwa tikumanya kuti Yesu ndiyo wali kutijulira nthowa yakuti tilombenge kwa Adada ŵithu ŵakufikapo ndiposo ŵatuŵa.

Nyengo yinyake ŵasambiri ŵa Yesu ŵakamupempha kuti: “Fumu, mutisambizge kulomba.” (Luka 11:1) Apa nchakuwonekerathu kuti ŵakamupemphanga kuti ŵamanye waka vinthu nga ni ivyo tadumbiskana waka yayi. Ŵakakhumbanga kumanya ivyo ŵangayowoya pakulomba. Tingati ŵakamufumbanga kuti, ‘Kasi ni vinthu wuli ivyo tingalomba?’