‵Talo

3 E ‵Tau o Fai Pefea?

KAFAI ko ‵talo atu, e fakatāua ne lotu e uke a mea faka-te-foitino i olotou ‵talo, e pelā mo te auala e ‵tau o ‵tu ei, pati mo tuu fakalotu. Kae e fesoasoani mai a te Tusi Tapu ke mo a ma ‵saga atu tatou ki vaega konei kae ke ‵saga atu ki se vaega tāua ‵ki o te fesili tenei, “E ‵tau o ‵talo atu pefea tatou?”

E fakamatala mai i te Tusi Tapu me e ‵talo atu a tavini fakamaoni a te Atua i auala mo tulaga kese‵kese. E ‵talo atu latou i se leo malalo io me maluga māfai e fetaui ‵lei mo olotou fakanofonofoga. E ‵talo atu latou kae ‵kilo ki te lagi io me punou ifo. I lo te fakaaoga ne latou a mea faite, malele, io me ko tusi ‵talo e pelā me ne auala ke ‵talo atu i ei, e ‵talo atu fua latou mai te olotou loto i olotou pati totino eiloa. Se a te mea e fai ei ke ma‵goi olotou ‵talo?

E pelā mo te mea e fakaasi mai i te mataupu muamua, e ‵talo atu eiloa latou ki te Atua e tokotasi​—ko Ieova. E isi aka foki se vaega tāua. E fai‵tau tatou i te 1 Ioane 5:14 penei: “Tenei te pogai e maua ei ne tatou te loto malosi i mua o te Atua; e tali‵tonu foki tatou me e talia ne ia manafai e fakatagi tatou ki so se mea e ‵tusa mo tena loto.” E ‵tau o fetaui ‵lei a ‵tou ‵talo mo te loto o te Atua. Se a te uiga o te mea tenā?

Ke ‵talo atu e ‵tusa mo te loto o te Atua, e ‵tau o iloa ne tatou a tena loto. A te sukesuke ki te Tusi Tapu, se vaega tāua o te ‵talo. E mata, e fakauiga eiloa me ka se lagona ne te Atua a ‵tou ‵talo seiloga ke fai tatou e pelā me ne tino ‵poto i te Tusi Tapu? Ikai, kae e manako te Atua ke iloa ne tatou tena loto, ‵sala atu ke malamalama i ei kae gasuesue o fai te mea tenā. (Mataio 7:21-23) E ‵tau o fetaui ‵lei a ‵tou ‵talo mo mea e tauloto ne tatou.

I te taimi e tauloto ei tatou e uiga ki a Ieova mo tena loto, ka gasolo ki mua te ‵tou fakatuanaki​—se vaega tāua i ‵talo. Ne fai mai a Iesu: “Kafai e fakatuanaki koutou, e maua ne koutou so se mea e fakatagi koutou ki ei i te ‵talo.” (Mataio 21:22) A te fakatuanaki e se fakauiga ki te talitonu valea. Kae e fakauiga ki te talitonu ki se mea faitalia me e se matea, kae e uke a fakamaoniga e uiga ki ei. (Epelu 11:1) E ‵fonu a te Tusi Tapu i fakamaoniga me i a Ieova, telā e se mafai o lavea ne tatou, e ola, e fakatuagagina, kae e toka o tali mai a ‵talo a tino kolā e fakatuanaki ki a ia. E se gata i ei, e mafai o akai atu faeloa tatou mō te fakatuanaki, kae e tuku mai eiloa ne Ieova mo te alofa a mea e ma‵nako tatou ki ei.​—Luka 17:5; Iakopo 1:17.

Kae tenei te suā vaega tāua ki te faiga o ‵talo. Ne fai mai a Iesu: “E seai se tino e fanatu ki te Tamana manafai e se alatu mai i a au.” (Ioane 14:6) Tela la, a Iesu ko te sokoga o ‵tou ‵talo ki te Tamana, ko Ieova. Tela la, ne fai atu a Iesu ki ana soko ke ‵talo atu i tena igoa. (Ioane 14:13; 15:16)  E se fakauiga a te mea tenā me e ‵tau o ‵talo atu tatou ki a Iesu. I lō te fai penā, e ‵talo atu tatou i te igoa o Iesu, me i a Iesu ko te pogai e mafai ei ne tatou o fakapili‵pili atu ki te ‵tou Tamana ‵lei katoatoa kae tapu.

Kae ne toe fai atu a soko kolā e ‵pili ki a ia penei: “Te Aliki, akoako mai matou ke iloa o ‵talo.” (Luka 11:1) E mautinoa eiloa me e seki akai atu latou ki mea tāua kolā ne fatoa fakamatala atu. E fia iloa ‵lei ne latou a mea e ‵tau o ‵talo atu ki ei​—telā ne fesili atu latou, ‘Se a te mea e ‵tau o ‵talo atu tatou ki ei?’

[Ata i te itulau e 6]

A ‵talo kolā e fai i se auala magoi e fetaui ‵lei mo te loto o te Atua, e fai atu e auala i te fakatuanaki, mo te igoa o Iesu