BAYAL religionetik jaʼ mukʼ skʼoplal ya yilik te bin-utʼil ya yichʼ pasel te oración, te kʼopetik ya yichʼ alel sok te bintik ya yichʼ tuuntesele, pero te Biblia ma jaʼuk mukʼ skʼoplal ya yal-abi.

Te Biblia ya scholbey skʼoplal j-abatetik yuʼun Dios te la spasik oración ta yanyantik lugar sok yanyantik bin-utʼil ayik-a. Jaʼ chikan te bin yak ta kʼaxel ta skuxlejalik-ae ta yoʼtaniknax la skʼoponik te Diose, pero ay yantik te tulan kʼopojik. Ay machʼatik la stoy sitik ta chʼulchan sok ay yantik te la skejan sbaik ta lum. Pero maba la stuuntesik lokʼombaetik, cruz o libroetik yuʼun oración. Te bin la spasike jaʼ te la yalbeyik Dios te bin yaʼiyel ya yaʼiy sbaike. ¿Bin yuʼun te Dios lek la yil te oración la spasike?

Jaʼ yuʼun te jaʼ la skʼoponik te Jehová, melel jaʼ te bin mukʼ skʼoplal ya skʼan spasele. Pero ay yanxan te bin mukʼ skʼoplale, jaʼ te bin ya yal 1 Juan 5:14: «Ha smucʼul coʼtantic ini ta stojol Dios: teme hich ya jcʼambetic te bin ya scʼan yoʼtan stuquel, ya yaʼiyotic». Jichnix-a, kʼalal ya jkʼopontik te Dios, ya skʼan ya jkʼopontik jich te bitʼil lek ya yil stukele. ¿Bin ya skʼan ya yal-abi?

Ta nail, ya skʼan ya jnaʼtik bin-a te skʼanojel yoʼtan te Diose. Jaʼ yuʼun ya skʼan ya jnoptik te Bibliae. Te Jehová maba ya skʼanbotik te ya jnaʼbeytik skʼoplal spajkal te Bibliae, te bin ya skʼanbotike jaʼ te ya jpastik tulan te yakuk xkʼot ta koʼtantik te skʼanojel yoʼtan sok te ya jpastike (Mateo 7:21-23). Te bin ya jnoptik ta Biblia ya skʼan ya xchiknaj ta oración ya jpastike.

Jaʼnix jich, kʼalal ya jnoptikxan ta swenta te Jehová sok te skʼanojel yoʼtan, ya stsakxan yip te schʼuunel koʼtantike. Mukʼ skʼoplal te ay schʼuunel koʼtantik swenta ya yaʼiy jkʼoptik te Diose. Jich la yal te Jesús: «Spisil te bin yac acʼanic ta scʼoponel Dios, teme ya xchʼuhun awoʼtanic, ya me xʼaʼbotex» (Mateo 21:22). Te machʼa ay schʼuunel yoʼtan ya schʼuun te bin ma chikan ta ilel, pero ma jichuknax ya schʼuun, te chʼuunel oʼtanil la yal te Jesús ay banti stsakoj yip (Hebreos 11:1). Melelnix-a te ma xjuʼ ya kiltik te Jehová, pero ta Biblia ya yalbey skʼoplal bayal pruebaetik te yuʼun-nix ay-a te Diose, te ya xjuʼ ya kakʼtik smukʼul koʼtantik ta stojol sok te ya yaʼiybey skʼop te machʼa ay schʼuunel yoʼtane. Te Dios maba ya x-ilin te kʼalal ya jkʼanbeytik schʼuunel koʼtantik sok spisil-ora ya skʼan ya yakʼbotik (Lucas 17:5; Santiago 1:17).

Ay yan te bin mukʼ skʼoplal te ya skʼan ya kichʼtik ta wenta yuʼun jich ya yaʼiy jkʼoptik-a te Diose. Te Jesús jich la yal: «Mayuc machʼa ya xtal ta stojol te Tatil teme ma haʼucon ta jcuenta» (Juan 14:6). Te bin ya skʼan ya yale, jaʼ te ya xjuʼ ya xnoptsajotik ta stojol te Tatil ta swenta te Nichʼanile. Jaʼ yuʼun te Jesús la snojpteslan te jnopojeletik yuʼun ta skʼoponel Dios ta swenta te sbiile (Juan 14:13; 15:16). Te skʼoponel Dios ta swenta sbiil te Jesús ma skʼan ya yal te jaʼ ya jkʼopontik te Jesuse. Te bin ya skʼan ya yale jaʼ te ya jnaʼtik te ta swenta te Jesús ya xjuʼ ya jkʼopontik te jTatik ay ta chʼulchan te jaʼ tojil Dios sok te chʼultesbile.

Ta jun buelta jtul jnopojel la yalbey te Jesús: «Cajwal, acʼa jnopcotic scʼoponel Dios» (Lucas 11:1). ¿Bin yuʼun te jich la yal manchukme snaʼojix te bitʼil ta kʼoponel-a te Diose? Chikan ta ilel te jaʼ yak ta sjojkʼoyel bin ya xjuʼ ya yal te kʼalal ya skʼopon te Diose.