EP RELIJIONETIKE tsots skʼoplal chil ti chotolutik, nijilutik o vaʼalutik skʼan jpastik orasione, ti tʼujbil xa tajek li kʼusitik chkaltike, jech xtok tsots skʼoplal chilik ti oy kʼusitik tspasik sventa tskʼoponik li Diose. Pe li Vivliae, maʼuk tsots skʼoplal chil taje, moʼoj, oy yan kʼusitik mas tsots skʼoplal chalbe smelolal.

Jech, li Vivliae chalbe skʼoplal tukʼil yajtuneltak Dios ti vaʼal o kejelik la spasik orasione. Ta skoj li kʼusi snupojike, jlome ta yoʼontonik noʼox la skʼoponik Dios, li yane tsots ikʼopojik. Jlome la stoy muyel satik ta vinajel, li yane la snijan sbaik. Pe muʼyuk chal mi la stunesik lokʼoletik, rosario, mi jaʼuk slivroal orasionetik. Jaʼ noʼox chal ti laj yalik li kʼusi oy ta yoʼontonike. ¿Kʼu yuʼun aʼibat li s-orasionike?

Yuʼun jaʼ la skʼoponik li Jeovae, jtos ti kʼusi tsots skʼoplal skʼan pasel kʼuchaʼal laj xa kiltike. Pe li ta 1 Juan 5:14 chalbe yan srasonal: «Jtaoj xa spatubil coʼntontic ta stojol li Diose, jech cʼalal oy cʼusi ta jcʼanbetic jech chac cʼu chaʼal tscʼan stuque, ta jnaʼtic ti ta xaʼay jcʼoptique». Jech, li kʼusitik ta jkʼantike skʼan jechuk kʼuchaʼal tskʼan yoʼonton li Diose. ¿Kʼusi skʼan xal taje?

Baʼyel, skʼan jnaʼtik kʼusi tskʼan yoʼonton. Jech oxal, skʼan jchanbetik li sKʼope. Pe li Jeovae maʼuk smalaoj ti jnaʼtikuk xa skotol li kʼusitik chal ta sKʼope. Li kʼusi tskʼane, jaʼ ti xkakʼbetik yipal yojtikinel li kʼusi tskʼan tspase, vaʼun jech jpastik batel mi jnaʼtik xaʼoxe (Mateo 7:21-23). Li kʼusitik ta jchantik ta Vivliae vinajuk ta j-orasiontik.

Jech, mas chchʼi xchʼunel koʼontontik mi ta xkojtikintik mas li Jeovae xchiʼuk li kʼusi tskʼan yoʼontone. Yuʼun li xchʼunel oʼontonale tsots skʼoplal xtok yoʼ xaʼibutik li Diose. Li Jesuse xi laj yale: «Scotol li cʼusi chacʼanic cʼalal chacʼopanic Diose, me chachʼunic ti chataique, ta onoʼox xataic» (Mateo 21:22). Li xchʼunel oʼontonale jaʼ smakoj ti jchʼuntik li kʼusi mu xkiltike, pe maʼuk skʼan xal ti jech noʼox ta jovil jchʼuntike: li xchʼunel oʼontonal laj yalbe skʼoplal Jesuse oy lek sprevailtak (Hebreos 11:1). Melel onoʼox ti mu xkiltik li Jeovae, pe li Vivliae chakʼ ta ilel ti kuxule, ti xuʼ jpat-o koʼontontike xchiʼuk ti tstakʼ j-orasiontik mi oy xchʼunel koʼontontike. Mu chopoluk chaʼi ti ta jkʼanbetik ti akʼo chʼiuk li xchʼunel koʼontontike. Li stuke oy tajek ta yoʼonton chakʼbutik ti kʼuyepal chtun kuʼuntike (Lucas 17:5; Santiago 1:17).

Jech xtok, oy to yan kʼusi tsots skʼoplal skʼan jpastik sventa xaʼi j-orasiontik li Diose. Li Jesuse xi laj yale: «Muʼyuc bochʼo xuʼ chbat ta stojol Jtot ti me mu xtal ta jtojole» (Juan 14:6). Jaʼ xkaltik, jaʼ noʼox ta stojolal xNichʼon Dios ti xuʼ xi jnopaj ta stojolal li Totile. Jaʼ yuʼun li Jesuse  laj yalbe yajtsʼaklomtak ti skʼan spasik orasion ta sbie (Juan 14:13; 15:16). Kʼalal chal ti ta sbi Jesús ta jpastik orasione, maʼuk skʼan xal ti jaʼ xa ta jkʼopontike. Moʼoj, jaʼ skʼan xal ti te ta joltik ti jaʼ noʼox ta stojolal xuʼ xi jnopaj ta stojolal li jTotik ta vinajele, jun Dios ti tukʼ xchiʼuk chʼule.

Jun veltae, xi albat yuʼun jun yajtsʼaklom li Jesuse: «Cajval, chanubtasuncutic ta scʼopanel Dios» (Lucas 11:1). ¿Kʼu yuʼun jech laj yal? Yuʼun tskʼan tsnaʼik li kʼusitik xuʼ skʼanik o xalik li ta s-orasionike. Maʼuk ti mu snaʼik kʼuxi tskʼoponik li Diose.