3 Tu Likutilila

Ndati?

ATAVO alua, a siata oku longisa oviholo vimue viatiamẽla kolohutililo ndeci: Ndomo tu kala poku likutilila, olondaka tu popia volohutililo, kuenda oviholo vikuavo. Pole, Embimbiliya li tu vetiya oku yuvula ovina viaco okuti, tu kapako ovina vi kuete esilivilo lia velapo loku tambulula epulilo liokuti: “Ndamupi tu likutilila?”

Embimbiliya li tukula ovolandu afendeli va Suku vakuekolelo okuti, va likutilila poku liyaka lovitangi, kuenda ndomo va enda oku ci linga poku likutilila. Ovo va enda oku ci linga volonepa via litepa ndeci: Oku linga ohutililo yo vutima ale lolukandi. Handi vali, va enda oku luluvala kilu, kuenda oku petamela posi. Poku likutilila ka va endele oku ci linga lekuatiso lioviñumañuma, olotelusu, kuenda oku tanga valivulu olohutililo. Pole, va enda oku likutilila lutima wosi, loku situlula ovisimĩlo viavo. Nye ca vetiya Suku oku tava olohutililo viavo?

Ndomo ca lekisiwa vocipama cikuavo ovo va enda oku likutilila lika ku Suku okuti, Yehova. Kulivo esunga likuavo lia velapo. Kelivulu lia 1 Yoano 5:14 tu tangako ndoco: “Ekolelo tu . . . kuetele [Yehova Suku] lieli, nda tu pinga cimue ca sungulukila ocipango caye eye o tu yeva.” Omo liaco, tu sukila oku linga olohutililo vi litava locipango ca Suku. Eci ci lomboloka nye?

Oco tu linge olohutililo vi litava locipango ca Suku, tu sukila oku kũlĩha onjongole yaye. Elilongiso Liembimbiliya, li panga onepa kohutililo. Anga hẽ, eci ci lomboloka okuti, Suku o yeva lika olohutililo vietu nda tu kasi ndolonoño vina via siata oku konomuisa Embimbiliya? Sio hacoko. Pole, Suku o yongola okuti, tu kũlĩha ocipango caye, kuenda oku likolisilako oku ci tẽlisa. (Mateo 7:21-23) Tu sukila oku kapako ovina tua lilongisa.

Osimbu tu likolisilako oku kũlĩha ovina via tiamẽla ku Yehova kuenda kocipango caye, ekolelo lietu li livokiya. Oku ci linga, ci kuete esilivilo kolohutililo. Yesu wa popia hati: “Nda vu kuete ekolelo, cosi vu pinga poku likutilila vu ci tambula.” (Mateo 21:22) Oku kuata ekolelo, ka ci lomboloka oku tava kocina cimue ka ca kũlĩhĩwile. Pole, ci lomboloka oku tava kovina okuti, ndaño ka vi muiwa lovaso, pole, kuli uvangi u lekisa okuti, ovina viaco viocili. (Va Heveru 11:1) Vembimbiliya mu sangiwa uvangi wocili u lekisa okuti, ndaño ka tu pondola oku mola Yehova, pole o kasiko muẽle. Eye o kuete onjongole yoku yevelela olohutililo via vana vo kolela. Omo liaco, tu pondola oku pinga ku Yehova oco tu pamise ekolelo lietu. Momo eye o yongola oku tu ĩha ovina viosi tu sukila.—Luka 17:5; Tiago 1:17.

 Kuli ocina cikuavo ci kuete esilivilo ci lekisa ndomo tu sukila oku likutilila. Yesu wa popia hati: “Lomue iya ku Isia, te lame.” (Yoano 14:6) Yesu eye mitakati yetu yoku amẽla ku Isietu Yehova. Omo liaco, Yesu wa sapuila olondonge viaye oco vi likutilile vonduko yaye. (Yoano 14:13; 15:16) Pole, ka ci lomboloka okuti, tu sukila oku likutilila ku Yesu. Tu likutilila vonduko ya Yesu, poku ivaluka okuti eye mitakati yetu yoku amela ku Isietu wa lipua haeye o kola.

Eteke limue olondonge via Yesu via endele kokuaye, kuenje vio pinga hati: “A Ñala, tu longise oku likutilila.” (Luka 11:1) Ovo ka va yonguile oku kũlĩha lika ovina tua konomuisa ndeti. Pole, va yonguilevo oku kũlĩha ovina va sukilile oku tukula vohutililo.

[Etosi liavelapo kemẽla 6]

Oco olohutililo vi yeviwe la Suku, vi sukila oku li tava locipango Caye, loku lekisa ekolelo, kuenda oku vi lingila vonduko ya Yesu.