Thabelo

3 Ri Fanela U Rabela Hani?

MUSI zwi tshi ḓa kha u rabela, vhurereli vhunzhi vhu livhisa nga maanḓa ṱhogomelo kha mbonalo ya muthu, u fana na nḓila ine a ima ngayo musi a tshi khou rabela, maipfi ane a a shumisa na zwine a zwi ita. Naho zwo ralo, Bivhili i ri thusa uri ri songo livhisa ṱhogomelo kha zwithu zwo raloho, fhedzi i ri thusa uri ri kone u livhisa ṱhogomelo kha zwithu zwa ndeme zwa uri, “Ri fanela u rabela hani?”

Bivhili i sumbedza uri vhashumeli vha Mudzimu vha fulufhedzeaho vho vha vha tshi rabela fhethu ho fhamba-fhambanaho nahone vho ima nga nḓila dzi sa fani. Vho vha vha tshi rabelela mbiluni kana vha tshi tou ambela nṱha zwi tshi ya nga zwiimo. Vho rabela vho sedza ṱaḓulu kana vho tou gwadama. Nṱhani ha u shumisa zwifanyiso, malungu, kana bugu dza thabelo sa zwithu zwine zwa nga vha thusa musi vha tshi rabela, vho vha vha tshi rabela zwi tshi bva mbiluni nahone nga maipfi avho. Ndi mini zwe zwa ita uri thabelo dzavho dzi pfiwe nga Mudzimu?

Samusi zwo ambiwa theroni yo fhiraho, vho vha vha tshi livhisa thabelo dzavho kha Mudzimu muthihi fhedzi ane a vha Yehova. Hu dovha ha vha na tshiṅwe tshiitisi tsha ndeme. Kha 1 Yohane 5:14 ri a vhala: “Fulufhelo asiḽi, ḽiné ra vha naḽo’ ró fulufhela Ene, ri ri: Arali ri tshi humbela tshithu tshiné Ene a funa tshi tshi vha hone, u a ri pfa.” (Maḽeḓeretsendama ndi ashu.) Thabelo dzashu dzi fanela u tendelana na zwine Mudzimu a funa zwi tshi itwa. Zwenezwo zwi amba mini?

U itela uri ri rabele u tendelana na zwine Mudzimu a funa zwi tshi itwa, ri fanela u zwi ḓivha. Ngauralo, u guda Bivhili ndi tshipiḓa tsha ndeme tsha uri ri kone u rabela. Naa zwenezwo zwi amba uri Mudzimu a nga si ri thetshelese arali ri sa gudi Bivhili? A zwo ngo ralo, fhedzi Mudzimu u lavhelela uri ri gude nga ha zwine a funa zwi tshi itwa, ri zwi pfesese, nahone ri ite zwithu u tendelana na zwe ra zwi guda. (Mateo 7:21-23) Ri fanela u rabela u tendelana na zwe ra zwi guda.

Musi ri tshi guda nga ha Yehova na zwine a funa zwi tshi itwa, ri a aluwa lutendoni nahone zwenezwo ndi zwa ndeme vhukuma musi ri tshi rabela. Yesu o ri: “Na zwoṱhe zwiné na ḓo humbela nga thabelo ni tshi tenda, ni ḓo zwi wana.” (Mateo 21:22, maḽeḓeretsendama ndi ashu.) U vha na lutendo a zwi ambi u sokou vha muya murwela hoṱhe. Nṱhani hazwo, zwi amba u vha na fulufhelo kha zwithu ni sa athu zwi vhona, zwine zwa tikedzwa nga vhuṱanzi ho khwaṱhaho vhukuma. (Vha-Heberu 11:1) Bivhili i na vhuṱanzi vhunzhi ha uri Yehova, ane ra sa kone u mu vhona, ndi wa vhukuma, ri nga mu fulufhela, nahone o ḓiimisela u fhindula thabelo dza vha re na lutendo khae. Zwiṅwe hafhu, ri nga humbela lutendo lwo engedzeaho tshifhinga tshoṱhe, nahone Yehova u a funa u ri ṋea zwine ra zwi ṱoḓa.—Luka 17:5; Yakobo 1:17.

Hu dovha ha vha na tshiṅwe tshithu tsha ndeme malugana na nḓila ine ra nga rabela ngayo. Yesu o ri: “A huna ane a ḓa ha Khotsi, arali á sa ḓi nga nṋe.” (Yohane 14:6) Nga zwenezwo, Yesu ndi ene nḓila ine ra  nga kona ngayo u rabela Khotsi, Yehova. Yesu o vhudza vhatevheli vhawe uri vha rabele dzinani ḽawe. (Yohane 14:13; 15:16) Zwenezwo a zwi ambi uri ri fanela u rabela Yesu. Nṱhani hazwo, ri rabela dzinani ḽa Yesu, ri tshi humbula uri Yesu ndi ene o itaho uri ri kone u rabela Khotsi ashu a re mukhethwa na o fhelelaho.

Vhatevheli vha Yesu vha tsini-tsini vho vhuya vha mu humbela vha ri: “Murena, ri funze u rabela.” (Luka 11:1) Zwi tou pfala uri vho vha vha sa khou mu humbela uri a vha funze zwithu zwine ra kha ḓi tou bva u zwi haseledza. Vho vha vha tshi ṱoḓa u ḓivha zwa vhukuma uri ndi mafhungo afhio e vha vha vha tshi fanela u rabela nga hao, zwine zwa amba uri, ‘Ri fanela u rabela nga ha mini?’

[Maipfi o ṱumbulwaho kha siaṱari 6]

Thabelo dzi bvelelaho dzi tendelana na zwine Mudzimu a funa zwi tshi itwa, muthu u fanela u vha na lutendo musi a tshi rabela nahone a rabele dzinani ḽa Yesu