FIVAVAHAN̈A maro mivolan̈a fa efa misy fomba tsy maintsy arehan̈a izikoa fa mivavaka. An̈isanizen̈y raha koran̈iny izikoa fa mivavaka, atao karakory vatan̈a ndreky fomba tokony hivavahan̈a. Fa mbala bebenizen̈y raha irahiny Baiboly hiverin̈y ho raha ten̈a maventy.

Koran̈iny Baiboly ao fa samy amy tany nivavahany iro panompony Zan̈ahary taloha tan̈y, avio tsy mitovy fipetrakany vatan̈andro. Nisy aby tsy nivolan̈a mare fa nivavaka tan̈atiny fô, arakarakany raha nisy. Sasany nisan̈andra lan̈itry, fa sasany ndraiky nankohoko. Iro tsy nampiasa sary na sampile na boky zen̈y foeky. Iro nivavaka tamy fôndro jiaby, ndreky tamy fomba fivolan̈andro. Fa nan̈ino fo ma Zan̈ahary nitandren̈y vavakandro?

Efa nikoran̈intsika tamy lahatsoratra taloha tio in̈y fa Jehovah zaraiky fo nivavahandro. Fa mbala misy raha ten̈a maventy koa. Karaha ty koran̈iny 1 Jaona 5:14: “Ty raha atokisantsika amy Zan̈ahary: Zay raha angatahintsika aminany, izikoa mifan̈araka amy sitraponany, izy mitandren̈y atsika.” Dikanizen̈y, vavaka ataontsika tokony hifan̈araka amy sitrapony Zan̈ahary. Karakory ma zen̈y?

Mila mahay sitrapony Zan̈ahary atsika, baka atsika han̈ano vavaka mifan̈araka amy sitraponany. Ke mila mianatra Baiboly atsika, baka hahaizantsika zen̈y. Fa zen̈y ma mivolan̈a fa tsy hitandrin̈esany Zan̈ahary atsika, izikoa tsy mahay Baiboly mare? Ehe, tsy zen̈y. Tiany Zan̈ahary atsika hianatra ino sitraponany io, avio man̈ano raha mifan̈araka amy zen̈y. (Matio 7:21-23) Dikanizen̈y, atsika tokony hivavaka mifan̈araka amy raha ianarantsika.

Izikoa atsika mahay raha momba Jehovah ndreky sitraponany, hahaihitombo fo finoan̈antsika. Karaha ty ho Jesosy: ‘Izikoa anaro manan̈a finoan̈a, ho azonaro zay raha angatahinaro amy vavaka.’ (Matio 21:22) Zen̈y tsy mivolan̈a fa olo mino zen̈y minomino karaha io fo. Dikany mino zen̈y, man̈eky fa ten̈a misy ankitin̈y raha araiky, nata izio tsy hitany maso, fotony misy porofo mazava tsarabe mankamarin̈y izio. (Hebreo 11:1) Amy Baiboly ao misy porofo maro ivolan̈ana fa Jehovah io nata tsy hitantsika, izy ten̈a misy, atokisan̈a, avio von̈ono hamaly vavakanolo mino izy. Atsika koa mety mangataka amy Jehovah fo, baka izy hampitombo finoan̈antsika, ke ho ravoravo izy han̈amia raha ilaintsika.​—Lioka 17:5; Jakoba 1:17.

Fa momba vavaka io, karaha ty koa raha nikoran̈iny Jesosy: “Tsisy olo mahavita man̈aton̈o Baba andan̈itry an̈y, izikoa tsy mandalo aminaka.” (Jaona 14:6) Aminy alalany Jesosy ahavitantsika mifandray amy Jehovah Babantsika io. Baka amy zen̈y nahavy Jesosy nivolan̈a tamy pan̈aradia izy aby io fa tokony hatao aminy an̈arany Jesosy vavaka ataontsika. (Jaona 14:13; 15:16) Fa zen̈y tsy mivolan̈a fa atsika tokony hivavaka amy Jesosy. Mila mivavaka aminy an̈arany Jesosy atsika, ke mangala onon̈o fa nohony Jesosy ahafahantsika mifandray amy Babantsika masin̈y ndreky lavorary io.

Fa iro pan̈aradia Jesosy aby io nivolan̈a karaha ty taminany: ‘Mba ampianara mivavaka kony zahay, Tompo.’ (Lioka 11:1) Raha tiandro hay taminio tsy iro raha aby nikoran̈intsika tio in̈y. Tiandro hay: ‘Ino ma raha tokony hivolan̈iny, atsika koa fa mivavaka?’