Le oracionoʼ

3 ¿Bix unaj k-orar?

YAʼAB religionoʼobeʼ ku yaʼalikoʼobeʼ utiaʼal ka uʼuyaʼak a oración tumen Dioseʼ, unaj a kanik de memoriai jujunpʼéel tʼaanoʼob, a xoltal wa a wantal junpʼéeliʼ bixi. Baʼaleʼ le Bibliaoʼ ku yaʼalikeʼ yaan baʼaloʼob maas kʼaʼabéet k-ilik k-beetik.

Le Bibliaoʼ ku tʼaan tiʼ jujuntúul máaxoʼob tu meyajtoʼob Dios orarnajoʼob jejeláas tuʼuxoʼob yéetel jejeláas bix yaniloʼob. Yanoʼobeʼ kʼaʼam úuchik u oraroʼob yéetel uláakʼoʼobeʼ chéen ichil u tuukuloʼob. Jujuntúuloʼobeʼ tu jawaj u yichoʼob yéetel uláakʼoʼobeʼ chinlajoʼob. Baʼaleʼ jach junpuliʼ maʼ meyajnajtiʼob imagenoʼob, rosarioʼob mix libroʼob utiaʼal u xokik u oracionoʼobiʼ. Letiʼobeʼ tu yaʼaloʼob le baʼax yaan ichil u puksiʼikʼaloʼoboʼ. ¿Baʼaxten uʼuyaʼab u oracionoʼob?

Yáaxeʼ tumen tu chʼaʼchiʼitoʼob u kʼaabaʼ Jéeoba, junpʼéel baʼax jach kʼaʼabéet jeʼex t-iloʼ. Baʼaleʼ tu tsʼíibil 1 Juan 5:14 ku yaʼalik baʼax uláakʼ kʼaʼabéet: «Toʼoneʼ k-ojleʼ jeʼel baʼalak ka k-kʼáat tiʼ Dioseʼ, wa maʼ tu bin tu contra u voluntadeʼ, letiʼeʼ yaan u yuʼubik». Bey túunoʼ k-oracionoʼobeʼ unaj k-beetik jeʼex utstutʼaan Dioseʼ. ¿Baʼax u kʼáat u yaʼal lelaʼ?

Yáaxeʼ unaj k-ojéeltik baʼax u kʼáat Dios ka k-beete. Le oʼolaleʼ unaj k-xokik le Bibliaoʼ. Baʼaleʼ lelaʼ maʼ u kʼáat u yaʼal wa táan u páaʼtik Jéeoba ka k-kan tuláakal le baʼax ku kaʼansik le Bibliaoʼ. Baʼax u kʼáateʼ ka k-naʼat tubeel le baʼaxoʼob u tukulmaj u beetkoʼ yéetel k-beetik baʼax ku yaʼaliktoʼon (Mateo 7:21-23). Bey túunoʼ le baʼaxoʼob k-kanik teʼ Bibliaoʼ unaj u chíikpajal tiʼ le baʼaxoʼob k-aʼalik ichil k-oracionoʼ.

Tsʼoʼoleʼ jeʼex u bin k-maas kaanbal tiʼ Jéeoba yéetel tiʼ baʼax u tukulmaj u beetkeʼ, ku maas muʼukʼaʼantal k-fe. Lelaʼ uláakʼ junpʼéel baʼal kʼaʼabéet utiaʼal ka uʼuyaʼak k-oración, tumen tak Jesuseʼ tu yaʼalaj: «Wa yaan a fejeʼexeʼ tuláakal baʼax ka a kʼáateʼex ich oracióneʼ yaan u tsʼaʼabalteʼex» (Mateo 21:22). U yantal fe tiʼ máakeʼ u kʼáat u yaʼal u creertik máak junpʼéel baʼax kex maʼatech u yilaʼal, baʼaleʼ maʼ u kʼáat u yaʼal u creertik máak tuláakal baʼaliʼ: le fe tu chʼaʼchiʼitaj Jesusoʼ u kʼáat u yaʼal u creertik máak baʼaxoʼob jaajtak (Hebreos 11:1). U jaajileʼ maʼ tu páajtal k-ilik Jéeoba, baʼaleʼ ichil le Bibliaoʼ yaʼab baʼaloʼob eʼesik yaan, jeʼel u páajtal k-kʼubik óol tiʼeʼ yéetel ku núukik u oración le máaxoʼob yaan u fejoʼoboʼ. Letiʼeʼ maʼ u pʼeek u kʼáataʼal fe tiʼiʼ; letiʼeʼ mantatsʼ u kʼáat u tsʼáa baʼax kʼaʼabéettoʼon (Lucas 17:5; Santiago 1:17).

Baʼaleʼ yaan uláakʼ junpʼéel baʼax jach kʼaʼabéet utiaʼal ka u yuʼuboʼon Dios. Jesuseʼ tu yaʼalaj:  «Mix máak ku náatsʼal tu yiknal le Taata wa maʼ tin woʼolaloʼ» (Juan 14:6). Lelaʼ u kʼáat u yaʼaleʼ chéen tu yoʼolal Jesús jeʼel u béeytal k-náatsʼal tiʼ le Taataoʼ. Le oʼolal Jesuseʼ tu kaʼansaj u disipuloʼob orar tu kʼaabaʼ (Juan 14:13; 15:16.) Baʼaleʼ u orar máak tu kʼaabaʼ Jesuseʼ maʼ u kʼáat u yaʼal wa tiʼ letiʼ táan k-orariʼ. Baʼaxeʼ u kʼáat u yaʼaleʼ k-naʼatik chéen tu yoʼolal ku béeytal k-orar tiʼ le Dios jach kiliʼichoʼ.

Juntéenjeakeʼ juntúul disipuloeʼ tu yaʼalaj tiʼ Jesús: «Yuumtsil, kaʼansoʼon orar» (Lucas 11:1). ¿Baʼax tu yóotaj u yaʼale? Letiʼob kaʼacheʼ u yoojloʼob orar. Baʼaleʼ taak kaʼach u yojéeltkoʼob baʼax unaj u yaʼalikoʼob ken orarnakoʼob.

[U tsolajil le oochel teʼ táan juʼun 6]

Utiaʼal ka uʼuyaʼakoʼon tumen Dioseʼ, ken orarnakoʼoneʼ unaj k-kʼáatik baʼax uts tu tʼaan, u yantaltoʼon fe yéetel k-orar tu kʼaabaʼ Jesús