XIDAL religión noʼpa tipnés mod ni ronyibu par gonyibu oración. La Biblia dipa rabeʼ loguiaʼni xipa mod gony buñ láani né xipa guisetlaa buñ ló oración. Xalagary ngú rabeʼ loguiaʼni tipnés cós ni más rasac.

Rasetlani de xpiin Dios ni buny oración xidal lagary né de xidal mod. Goyoʼ ór diti bireʼ diitz roʼyibu né goyoʼ ór fuers goniʼyibu. Tipnésyibu golísyibu lóoyibu, né stipnés bigachcadaʼ guic. Ni toib buelt diti biquiinyibu dioxh, ni rosary nili devocionarios. Nosi goniʼyibu ni bireʼ lainy xcalnabanyibu. ¿Xí láani bunyibu par bioladx Dios oración xtunyibu?

Portín nosi gocni par Jehová, ndeʼ nigolú rasac xomod ma bisuidyno. Per ló 1 Juan 5:14 rasetlani stoib razón: «Ndeʼ confianz ni napno láabu: labúu guinabno nitisi cós ni noʼ de acuerdo mod ni nábu né láabu racadiagbu lóono». Scú láani, oración xtunyno non tzoʼ de acuerdo mod ná Jehová. ¿Xí radudy ndeʼ diitz?

Primer non ganno xi láani ná Dios ganno. Por ngú, rasac guisuidyno Xtiitzbu. Jehová diti rabésbu gacno toib buñnan ni rasuidy la Biblia. Per raniiny láabu guienno guirá ni gonybu né guisobno ni nábu (Mateo 7:​21-23). Ni rasuidyno ló la Biblia non guislooyno láani ló oración xtunyno.

Láaca órni más rasuidyno de Jehová né ni nábu gonybu, fe xtunyno raniʼsni más. Nigolú rasac gapno fe par labúu guicadiag Dios lóono, né ngú ni goniʼ Jesús: «Guirá ni guinabto órni gonyto oración, pal napto fe, sacaʼto láani» (Mateo 21:22). Fe radudyni diitz gony buñ crer ló toib cós ni diti labúu rabiʼno, per diti radudyni diitz gonyno crer ló nitisi cós: fe ni bisetlaa Jesús gopni prueby (Hebreos 11:1). Diti labúu rabiʼno Jehová, per la Biblia rasetlaa xidal prueby que nigolú noʼbu, labúu gapno confianz láabu né racapybu oración xtuny buñ ni nap fe. Diti radzuitzbu pal ranabno fe láabu; nainy láabu guidudybu fe ni caquiinno (Lucas 17:5; Santiago 1:17).

Noʼ stoib cós ni raquiin gonyno par guicadiag Dios lóono. Jesús goniʼ ndeʼ: «Ni toib labúu guidxin ronoʼ Bixiosa pal diti nacni por naʼ» (Juan 14:6). Dios nosi raquiimbu Jesús par guibigaxno láabu. ¡Por ngú Jesús bisuidy xpiin ñony oración né naquiinyibu laa Jesús! (Juan 14:13; 15:16). Ni gony buñ oración ló laa Jesús diti radudyni diitz que cayony buñ láani par Jesús. Xalagary ngú radudyni diitz que por láabu, labúu raninéno Bixiosno ni noʼ guibá, toib Dios ni diti nap galkié né ni nayaa.

Toibtica xpiin Jesús gonabdiitz láabu ndeʼ: «Señor, bisuidy lóodo gonydo oración» (Lucas 11:1). ¿Xí láani bidudyibu diitz? Layibu maca nanyibu ximod gonyibu oración. Ni canabdiitzyibu ngú xi labúu guiniʼyibu ló oración.