Ipepo

4 Finshi Tulingile Ukupepela?

IPEPO Yesu apepele pa kusambilisha abasambi bakwe ifya kupepa, e pepo ilyo Abena Kristu abengi bapepa libili libili. Na kuba, abengi tabaishiba umo Yesu aloseshe ilyo apepele lilya ipepo, ilyo beta ukuti Ipepo lya kwa Shikulu nelyo Ipepo lya we Shifwe. Abantu abengi nga nshi balisungila lilya ipepo kabili balalibwekeshapo libili libili, maka maka mu nshita ya kasuba. Lelo, umu te mo Yesu aloseshe. Twaishiba shani ifi?

Ilyo ashilabasambilisha ifya kupepa, Yesu atile: “Ilyo ulepepa, wilabwekeshapo ukusosa fimo fine.” (Mateo 6:7) Bushe Yesu alepilika ifyo umwine alandile no kweba abasambi amashiwi ayo bali no kusungila no kulabwekeshapo libili libili? Iyo! Lelo, aletusambilisha ifyo tulingile ukupepela, kabili aletulanga ifintu ifyacindamisha ifyo tufwile ukubikako amano ilyo tulepepa. Natulande sana pa fintu Yesu alandile muli lilya ipepo. Ili pepo lyaba pali Mateo 6:9-13.

“Shifwe wa mu muulu, ishina lyenu libe ilya mushilo.”

Yesu acinkwileko abasambi bakwe ukuti abantu balingile ukupepa fye kuli Wishi, Yehova. Nomba bushe mwalishiba umulandu ishina lya kwa Lesa lyacindamina nga nshi no mulandu lilingile ukubela ilya mushilo?

Ukutula fye pa kutendeka, ishina lya mushilo ilya kwa Lesa balilipontela. Umulwani wa kwa Lesa, Satana, atile Yehova wa bufi, tatemwa abantunse kabili takwata ne nsambu sha kuteka ifyo abumba. (Ukutendeka 3:1-6) Abengi balyumfwila ubufi bwa kwa Satana, basambilisha ukuti Lesa munkalwe, tasakamana abantu, kabili alitemwa ukukanda abantu, e lyo bambi balakaana ukuti te wabumbile ifintu fyonse. Bambi bapata fye ne shina lyakwe, balifumya ishina lya kuti Yehova mu maBaibolo kabili balakaanya na bantu ukulalibomfya.

Baibolo yalanda ukuti Lesa akafumyapo ulu lufyengo lonse. (Esekiele 39:7) Ilyo akacita ifi, akamupeela na fyonse ifyo mukabila kabili akapwisha na mafya mwakwata. Akacita shani ifyo? Amashiwi Yesu akonkeshepo ukusosa muli lilya ipepo yalilondolola ifyo akacita.

“Ubufumu bwenu bwise.”

Muno nshiku, bashimapepo tabaishiba icishinka pa Bufumu bwa kwa Lesa. Lelo nge fyo abalekutika kuli Yesu baishibe, bakasesema ba kwa Lesa balisobele kale sana ukuti Mesia, Umupusushi uwasalwa na Lesa, ali no kuba Imfumu iya Bufumu ubwali no kuwamya ifintu mu calo. (Esaya 9:6, 7; Daniele 2:44) Bukalenga ishina lya kwa Lesa ukuba ilya  mushilo lintu bukasansalika ubufi bwa kwa Satana no kumonaula kumo ne milimo yakwe. Ubufumu bwa kwa Lesa bukafumyapo inkondo, amalwele, ifikuko, ukubikako fye ne mfwa. (Amalumbo 46:9; 72:12-16; Esaya 25:8; 33:24) Kanshi nga mulepepa ukuti Ubufumu bwa kwa Lesa bwise, ninshi mulepepa ukuti aya malayo yonse yakafikilishiwe.

“Ukufwaya kwenu kucitwe pano isonde nga mu muulu.”

Amashiwi Yesu asosele yalanga ukuti ukufwaya kwa kwa Lesa nangu cibe shani kukacitwa pano calo nga mu muulu, umo ekala. Takwaba nangu cimo icacilikila ukufwaya kwa kwa Lesa mu muulu; Umwana wa kwa Lesa alilwile inkondo na Satana na bamalaika bakwe no kubapoosa pano calo. (Ukusokolola 12:9-12) Ici icalenga butatu ico Yesu asosele muli lilya ipepo, kumo na filya fibili ifya kubalilapo ifyo tulandilepo, fitwafwa ukubika amano ku fintu ifyacindama nga nshi, e kutila ku kufwaya kwa kwa Lesa, te kufwaya kwesu iyo. Kufwaya kwa kwa Lesa e kuwamina ifibumbwa fyonse. E mulandu wine no muntu uwapwililika Yesu asosele kuli Wishi ukuti: “Ukufwaya kwenu e ko kucitwe, te kwandi iyo.”—Luka 22:42.

“Tupeeleni lelo ifya kulya ifya buno bushiku.”

Amashiwi Yesu akonkeshepo ukusosa yalanga ukuti kuti twapepela na pa fintu ifyo tulekabila. Tacalubana ukulomba kuli Lesa ukuti atupeele ifyo tulekabila pali ubo bushiku. Na kuba, ukucita ifi kutucinkulako ukuti Yehova “e upeela abantu bonse umweo no mupu na fyonse.” (Imilimo 17:25) Baibolo imulondolola ukuti mufyashi umusuma uwatemwa sana ukupeela abana bakwe ifyo balekabila. Na kabili, nga filya fine umufyashi umusuma acita, Yehova na o tapeela abana bakwe ifishingabanonsha.

“Tubeleleni uluse pa membu shesu.”

Bushe mulafwaya ukuti Lesa amwelele imembu? Abengi muno nshiku tabaishiba ulubembu kabili tabamona ukuti ukucita ulubembu kwalibipa. Lelo Baibolo isambilisha ukuti ulubembu e lwalenga amafya yonse ayo tupitamo, pantu e lwalenga ukuti abantu balefwa. Apo tufyalwa ababembu, bonse fye tulabembuka imiku iingi, kabili nga ca kuti fye Lesa atwelela imembu shesu e lyo twingaba no mweo wa muyayaya. (Abena Roma 3:23; 5:12; 6:23) Lelo, aya mashiwi ya mu Baibolo yalatusansamusha, ayatila: “Imwe, mwe Yehova, muli basuma kabili mwali-iteyanya ukwelela.”—Amalumbo 86:5.

“Tupokololeni ku mubifi.”

Bushe mwalishiba ukuti mulakabila ukuti Lesa alemucingilila pali ino ine nshita? Abengi balakaana ukuti “umubifi,” Satana, tabako. Lelo Yesu alesambilisha ukuti Satana e ko aba, kabili alemwita no kuti “kateka wa pano calo.” (Yohane 12:31; 16:11) Satana alilufya abantu aba muli cino calo ico atungulula, kabili alafwaisha no kuti amulufye pa kuti mwikapanga bucibusa na Shinwe, Yehova. (1 Petro 5:8) Lelo Yehova alikwatisha amaka ukucila Satana kabili alatemwa sana ukucingilila abamutemwa.

Aya mashiwi yanono ayalondolola ifyo Yesu alandilepo mwi pepo tayalandile pa fintu fyonse ifyo twingapepela. Mwilaba ukuti pali 1 Yohane 5:14 Lesa bamulondolola ukuti: “Conse ico twalomba, cikulu fye nacilingana no kufwaya kwakwe, alatumfwa.” E ico, mwilamona kwati amafya yenu yanono sana ica kuti te kuti muyalumbule na mu mapepo mupepa kuli Lesa.—1 Petro 5:7.

Inga incende umuntu aliko ne nshita apepelapo, bushe na fyo fyalicindama?