4 Unsay Angayng Iampo?

GIKAINGON nga sa tanang pag-ampo sa mga Kristohanon, ang sulondang pag-ampo nga gitudlo ni Jesus—nga nailhan usab nga Pag-ampo sa Ginoo o Amahan Namo—mao ang kanunayng gisumay. Apan ang maong pag-ampo wala masabti sa daghang tawo. Milyonmilyon ang balik balik nga naglitok niini adlaw-adlaw. Apan dili tuyo ni Jesus nga sumaysumayon ang maong pag-ampo. Nganong nahibalo kita niana?

Sa wala pa itudlo ni Jesus ang maong pag-ampo, siya miingon: “Sa dihang mag-ampo, ayaw balikbalika pagsulti ang samang mga butang.” (Mateo 6:7) Busa, kon tuyo niya nga ipasag-ulo ug ipasumay ang sulondang pag-ampo, dili ba mosumpaki kana sa iyang giingon? Sa pagkatinuod, buot niya nga tudloan kita kon unsay angayng iampo ug unsay hatagag dakong importansiya sa dihang mag-ampo. Karon atong hisgotan ang maong pag-ampo nga narekord sa Mateo 6:9-13.

“Amahan namo nga anaa sa mga langit, pagabalaanon unta ang imong ngalan.”

Gipahinumdoman ni Jesus ang iyang mga sumusunod nga ang tanang pag-ampo kinahanglang itanyag ngadto sa iyang Amahan, si Jehova. Apan nahibalo ka ba kon nganong hinungdanon kaayo ang ngalan sa Diyos ug kon nganong kinahanglan kining balaanon?

Sukad sa sinugdanan sa kasaysayan sa tawo, ang balaang ngalan sa Diyos gipasipalahan. Ang kaaway ni Jehova, si Satanas, nagbutangbutang kaniya ingong bakakon ug hakog nga Magmamando nga walay katungod sa pagmando sa Iyang mga linalang. (Genesis 3:1-6) Daghang tawo ang midapig kang Satanas, ug sila nagtudlo nga ang Diyos walay pagtagad kanato, mapintas, mapanimaslon, ug nag-ingon pa gani sila nga walay Diyos. Ilang gitangtang ang ngalan ni Jehova diha sa ilang hubad sa Bibliya ug gidili ang paggamit niini.

Ang Bibliya nagpakita nga tul-iron sa Diyos ang tanang inhustisya. (Ezequiel 39:7) Sa ingon iyang itagana ang tanan nimong panginahanglan ug sulbaron ang tanan nimong problema. Sa unsang paagi? Ang tubag anaa sa sunod nga mga pulong sa pag-ampo ni Jesus.

“Paanhia ang imong gingharian.”

Ang relihiyosong mga magtutudlo karon naglibog kon unsa ang Gingharian sa Diyos. Apan sama sa nahibaloan sa mga mamiminaw ni Jesus kaniadto, ang mga propeta sa Diyos dugay nang nagtagna nga ang Mesiyas, ang Manluluwas nga gipili sa Diyos, magmando sa Gingharian nga maoy maghimog kausaban dinhi sa kalibotan. (Isaias 9:6, 7; Daniel 2:44) Pagabalaanon niini ang ngalan sa Diyos pinaagi sa pagyagyag sa bakak nga mga pagtulon-an ni Satanas ug pagtapos sa iyang pagmando. Taposon sa Gingharian sa Diyos ang gubat,  sakit, ug gutom—bisan ang kamatayon. (Salmo 46:9; 72:12-16; Isaias 25:8; 33:24) Sa dihang mag-ampo ka nga moanhi ang Gingharian sa Diyos, kini nagpasabot nga nag-ampo ka nga matuman ang maong mga saad.

“Matuman unta ang imong kabubut-on, maingon sa langit, mao man usab sa yuta.”

Gipakita niining mga pulong ni Jesus nga ang kabubut-on sa Diyos matuman gayod sa yuta, sama nga natuman kini sa langit, diin nagpuyo ang Diyos. Nagmalamposon gayod ang kabubut-on sa Diyos didto sa langit, diin ang Anak sa Diyos nakiggubat kang Satanas ug sa iyang mga demonyo ug nagtambog kanila sa yuta. (Pinadayag 12:9-12) Kining ikatulong hangyo diha sa sulondang pag-ampo, sama sa una ug ikaduhang hangyo, nagtudlo kanato nga hatagag mas dakong pagtagad ang kabubut-on sa Diyos, dili ang atoa. Ang iyang kabubut-on kanunayng maghatag ug kaayohan sa tanang linalang. Busa, bisan ang hingpit nga tawong si Jesus miingon sa iyang Amahan: “Matuman unta dili ang akong kabubut-on, kondili ang imoha.”—Lucas 22:42.

“Ihatag kanamo karong adlawa ang among tinapay.”

Kining sunod nga gisulti ni Jesus nagpakita nga mahimo usab natong iampo ang atong mga panginahanglan. Dili sayop nga iampo ang atong mga panginahanglan sa adlaw-adlaw. Sa pagkatinuod, kana magpahinumdom kanato nga si Jehova maoy “naghatag ngadto sa tanang tawo ug kinabuhi ug gininhawa ug tanang butang.” (Buhat 17:25) Gipadayag sa Bibliya nga siya usa ka mahigugmaong Amahan nga malipay sa pagtagana sa gikinahanglan sa iyang mga anak. Apan sama sa usa ka mahigugmaong ginikanan, dili siya mohatag ug butang nga makadaot kanila.

“Pasayloa kami sa among mga utang.”

Duna ka bay utang sa Diyos? Nagkinahanglang ka ba sa iyang pagpasaylo? Daghan karon wala na maghunahuna nga sila nakasala. Apan ang Bibliya nagtudlo nga ang sala maoy hinungdan sa tanang problema, kay kini ang pangunang hinungdan sa kamatayon sa tawo. Kay natawong makasasala, kita kanunayng makasala, ug kinahanglan kitang pasayloon sa Diyos aron matagamtam ang kinabuhing dayon. (Roma 3:23; 5:12; 6:23) Makapahupay gayod ang giingon sa Bibliya: “Ikaw, Oh Jehova, maayo ug andam sa pagpasaylo.”—Salmo 86:5.

“Luwasa kami gikan sa usa nga daotan.”

Nahibalo ka ba nga ikaw nagkinahanglan gayod sa proteksiyon sa Diyos? Daghan ang dili motuo nga naglungtad si Satanas, ang “usa nga daotan.” Apan si Jesus nagtudlo nga tinuod si Satanas, ug nagtawag pa gani kaniya nga “magmamando niining kalibotana.” (Juan 12:31; 16:11) Gipahisalaag ni Satanas ang mga tawo niining kalibotana, ug determinado siya sa pagpahisalaag kanimo aron dili ka masuod sa imong Amahan nga si Jehova. (1 Pedro 5:8) Apan, si Jehova mas gamhanan kang Satanas ug buot Niyang panalipdan kadtong nahigugma Kaniya.

Kining mubong sumaryo sa dagkong mga punto sa sulondang pag-ampo ni Jesus wala maghisgot sa tanang butang nga mahimo natong iampo. Hinumdomi, ang 1 Juan 5:14 nag-ingon bahin sa Diyos: “Bisan unsay atong pangayoon sumala sa iyang kabubut-on, siya magpatalinghog kanato.” Busa ayaw hunahunaa nga ang imong mga problema dili mahimong iampo kay kini daw gamay ra nga butang.—1 Pedro 5:7.

Sa laing bahin, hinungdanon ba kon kanus-a ug kon asa kita mag-ampo?