Iotek

4 Met Sipwe Iotek Usun?

ARAMAS ra ekieki pwe ewe Iotekin Ach Samol, ina ewe iotek a kon chöüfetäl me lein iotekin Chon Kraist. Inaamwo ika mi pwüng are ese pwüng ena pworaus, nge a ffat pwe iei ewe iotek chommong ra kon wewengaweiti. Iteiten rän, fite million aramas ra äpiäpini masouen än Jises na iotek, nge rese ekieki wesewesen weween. Nge esap ina än Jises ekiek ren äeään ena iotek. Ifa usun sia silei?

Me mwen chök än Jises apasa ena iotek, iei met a erä: “Fansoun ami iotek, ousap apiapini.” (Mattu 6:7, TF) Itä Jises a pwisin ü ngeni alon na, atun a äiti ngeni ekkewe aramas ewe Iotekin Ach Samol me itä ina ekiekin pwe repwe amwöchülükün me äpiäpini? Aapwi! Nge lon än Jises na iotek, a äiti ngenikich met sipwe iotek usun me affata met sipwe akkomwa lon ach kewe iotek. Sipwe etittinaöchü ewe iotek mi mak lon Mattu 6:9-13.

“Semem lon läng. Itom epwe pin.”

Jises a ächema ngeni chon tapwelo mwirin pwe iotek meinisin epwe chök ngeni Seman we, Jiowa. Nge en mi silei met popun a mmen aüchea iten Kot me pwata a lamot an epwe pinilo?

Seni le poputään uruwoon aramas, a fen itengawolo iten Kot we mi pin. Ewe chon ü ngeni Kot, Setan ewe Tefil, a erä pwe Jiowa a kapas chofona me I emön mi nemenemengaw me ese wor an pwüüng le nemenem woon förian kewe. (Keneses 3:1-6) Chommong ra peni än Setan eitengawa Jiowa pwe i emön Kot mi kirikiringaw, arochongaw, ese äfänni aramas me ra pwal mwo nge tunalo pwe mi wor emön Chon Föratä. Pwal ekkoch ra pinei än aramas nöünöü iten Jiowa me ra tölawü ena it seni lon nöür Paipel.

Ewe Paipel a pwäratä pwe Kot epwe awena ekkena pwüngüngaw meinisin. (Isikiel 39:7) Ren an föri ena, epwe awora meinisin minne ka osupwang ren, me awesalo om kewe osukosuk. Ifa usun epwe föri ena? Sopwosopwoloon än Jises ei iotek epwe affata pölüwan.

“Mwum epwe war.”

Chommong nöüwisin lamalam ikenäi rese weweöchüti weween Mwuun Kot. Nge, ekkewe mi aüselinga Jises lon na atun ra fen silei me ren ekkewe soufos pwe ewe Messaia, chon Amanau mi filitä me ren Kot, epwe wisen nemeni eü Mwu me epwe  amürinnölo ei fönüfan. (Aisea 9:6, 7; Taniel 2:44) Ena Mwu epwe epinalo iten Kot ren an epwe pwäralo än Setan kewe kapas chofona, iwe epwe nielo Setan me amoielo an kewe angang. Epwe pwal awesalo maun, semwen, lengita, pwal mwo nge mälo. (Kölfel 46:9; 72:12-16; Aisea 25:8; 33:24) Lupwen ka iotek usun warotoon ena Mwu, weween ka iotek fän iten pwönütään ekkeei pwon.

“Letipom epwe fis won fanüfan usun chök lon läng.”

Jises a apasa pwe letipen Kot epwe wesewesen fis woon fönüfan usun chök an a fis lon läng, ikewe ia Kot a nonnom ie. Ese wor met a eppeti pwönüetään letipen Kot lon läng pun Jises a fen oturatiw Setan me pelian kewe ngeni fönüfan. (Pwäratä 12:9-12) Ewe aülüngätin kinikinin ena iotek, usun ekkewe ruu akkomw, a älisikich le akkomwa ekiekich woon letipen Kot, ewe mi kon lamot, nge esap pwisin letipach. Pwönüetään letipan a kan atoto watteen feiöch ngeni förian kewe. Ina minne, pwal mwo nge ewe mwän mi unusöch Jises, a ereni Seman we: “Esap fis letipei pwe letipom.”​—Luk 22:42.

“Kopwe ngenikem anem mongö ikenai.”

Jises a äiti ngenikich pwe sia pwal tongeni iotek fän iten ach kewe osupwang. Ese wor ngawen ach iotek usun met mi lamot ngenikich iteiten rän. Ren ei, a ächema ngenikich pwe Jiowa chon “ngeni aramas manau me ngasangas pwal mettoch meinisin.” (Fofor 17:25) Ewe Paipel a apasa pwe i ewe sam mi tong a pwapwa le awora osupwangen nöün kewe, nge esap apwönüetä än nöün tingor ika mi silei pwe minne a tingor esap atoto feiöch ngeni.

“Kopwe amusala äm tipis.”

Mi lamot ngonuk än Kot omusomusen tipis? Chommong aramas ikenäi rese lükü pwe kich chon tipis me weweiti choun ngawen tipis. Nge ewe Paipel a äiti ngenikich pwe tipis ina populapen ach kükküna watteen osukosuk ikenäi me a atoto mälo ngeni aramas. Kich mi fen tipis seni chök ach uputiw me sia kan tittipis iei, nge ach äpilükülük a chök longolong woon än Kot omusakichelo. (Rom 3:23; 5:12; 6:23) Sia pwapwa pun sia silei alon Paipel ei: “Pun en, ai Samol, ka kirikiröch o amusala tipis.”​—Kölfel 86:5.

“Kopwe angasakem seni ewe mi ngau.”

Ka meefi pwe mi wesewesen lamot ngonuk än Kot tümün? Chommong rese lükü pwe mi wor “emon mi ngaw,” Setan. Nge Jises a änneta pwe Setan wesewesen emön, a pwal mwo nge eita ngeni “ewe samolun ei fanüfan.” (Jon 12:31; 16:11) Setan a angawalo ei fönüfan mi nonnom fän nemenian, me a pwal fokkun achocho an epwe eppetuk pwe kosap eäni ririöch ngeni Jiowa. (1 Piter 5:8) Iwe nge a fokkun watte än Jiowa pöchökkül lap seni Setan, me a apwapwa le tümünü chokkewe mi tongei I.

Lon pworausen menlapen än Jises iotek sise aunusa meinisin met itä sipwe iotek usun. Nge, chechchemeni met 1 Jon 5:14 a erenikich usun Kot: “Sia silei pwe are sia tüngor och mine a fich ngeni letipan, a aüselingakich.” Kosap tipemwaramwar le tingor än Jiowa älillis inaamwo ika ka meefi pwe mi chök kisikis om osukosuk.​—1 Piter 5:7.

Ikenäi lon ei fönüfan, chommong ra kan lükülükümmang me tipemwaramwareiti lamoten iotek. Menip ka pwal eis, ‘Kot epwe aüseling me pölüweni ai kewe iotek?’