Mpaabɔ—Ebɛnadze Na Ɔwɔ Dɛ Yɛbɔ Ho Mpaa?
WƆTAA frɛ no Christianfo hɔn mpaa a wɔabɔ sen biara. Dɛ ɔyɛ nokwar anaa ɔnnyɛ nokwar no, nyimpa pii nntse Jesus ne mpaabɔ a binom frɛ no Ewuradze Asɔr, Ewuradze Mpaabɔ anaa Hɛn Egya A Ewɔ Sor no ase. Nyimpa ɔpepem pii kã dɛm mpaabɔ yi mpɛn pii da biara da a wonsusu ho. Naaso nna ɔnnyɛ Jesus n’adwen nye dɛ wɔbɔbɔ mpaa no wɔ dɛm kwan no do. Yesi dɛn hu dɛm?
Ansaana Jesus rebɛkã dɛm mpaabɔ no ho asɛm no, nna oedzi kan akã dɛ: “[Sɛ] hom rosɔr a, mma hom nnyɛ kasansanmu gyan.” (Matthew 6:7) Ana Jesus bɛkã dɛ yɛnkyer nsɛmfua ahorow bi ngu hɛn tsirmu na yentsĩ mu nkã ber a nankasa kasa tsia adzeyɛ a ɔtse dɛm no? Oho! Mbom no, nna Jesus rekyerɛ hɛn dza yɛmbɔ ho mpaa, na ɔmaa hɛn nsɛm bi a no ho hia a ɔsɛ dɛ yɛma ɔtsena hɛn adwen mu aber a yɛrobɔ mpaa no. Hom mma yensusu dza ɔkãe no ho yie nhwɛ. Wɔayɛ mpaabɔ no ho kyerɛwtohɔ wɔ Matthew 6:9-13.
“Hɛn Egya a ewɔ sor, wo dzin ho ntsew.”
Jesus nam iyi do kyerɛɛ n’ekyirdzifo no dɛ ɔwɔ dɛ wɔbɔ n’Egya Jehovah, nkotoo mpaa. Naaso ana inyim siantsir a Nyankopɔn ne dzin ho hia dɛm, nye siantsir a ohia dɛ wɔtsew ho, anaa wobu no krɔnkrɔn no?
Ofi nyimpa abakɔsɛm ahyɛse nyina, wɔdze atorsɛm egu Nyankopɔn ne dzin krɔnkrɔn no ho fĩ. Nyankopɔn ne tamfo Satan akã Jehovah ho asɛm dɛ ɔyɛ tumdzifo a ɔyɛ ɔtorfo nye pɛsɛankonya a onnyi ho kwan biara dɛ odzi n’abɔdze do. (Genesis 3:1-6) Nyimpa pii ekegyina Satan n’ekyir na wɔkyerɛkyerɛ dɛ Nyankopɔn nnyi tsema, ne tsirmu yɛ dzen na ɔmmfa bɔn nnkyɛ, anaa wɔngye nndzi dɛ ɔno nye Ɔbɔadze no. Binom so ama Nyankopɔn ne dzin ho aba asɛm, woeyi dzin Jehovah no efi Bible nkyerɛase ahorow mu na wɔabra dɛ mma wɔmmfa nndzi dwuma.
Bible no ma yehu dɛ Nyankopɔn besiesie dɛm atsɛnkyew yi nyina. (Ezekiel 39:7) Ɔnam iyi do bedzi w’ehiadze nye wo haw biara so ho dwuma. Ɔbɛyɛ no dɛn? Jesus ne mpaabɔ mu nsɛm a odzi hɔ no bɛma iyi ho mbuae.
“W’ahendzi mbra.”
Ndɛ, Nyamesom akyerɛkyerɛfo adwen etu afora wɔ Nyankopɔn n’Ahendzi no ho. Naaso dɛ mbrɛ nna Jesus n’etsiefo no nyim dada no, nna Nyankopɔn ne nkɔnhyɛfo fi ber tsentsen ahyɛ nkɔm dɛ Messiah, Agyenkwa a Nyankopɔn asan mu eyi no no bedzi Ahendzi bi a ɔbɛsesa wiadze yi no do. (Isaiah 9:6, 7; Daniel 2:44) Ɔbɛma ator a Satan dzi no ho ada hɔ na obeyi Satan ne ndwuma nyina efi hɔ. Ɔbɛyɛ dɛm dze atsew Nyankopɔn ne dzin ho. Nyankopɔn n’Ahendzi no beyi akodzi, yarba nye ɔkɔm efi hɔ. Afei, owu so befi hɔ. (Ndwom 46:9; 72:12-16; Isaiah 25:8; 33:24) Sɛ ebɔ mpaa dɛ Nyankopɔn n’Ahendzi no mbra a, nna erobɔ mpaa dɛ dɛm anohoba no nyina mbra mu.
“Wɔnyɛ wo pɛ wɔ asaase do dɛ ɔsor.”
Jesus ne nsɛm yi kyerɛ dɛ wɔbɛyɛ Nyankopɔn n’apɛdze wɔ asaase do dɛ mbrɛ wɔyɛ no wɔ ɔsor, beebi a Nyankopɔn wɔ no. Biribiara nnkotum esiw Nyankopɔn n’apɛdze kwan wɔ ɔsor; hɔ na Nyankopɔn ne Ba no nye Satan na n’esunsum fĩ dzii akõ na ɔtoow hɔn guu asaase do. (Nyikyerɛ 12:9-12) Adzeserɛ a otsĩa ebiasa wɔ dɛm mpaabɔ yi mu no tse dɛ ebien a odzi kan no ara, na ɔboa ma yɛdze hɛn adwen si nsɛm a no ho hia kɛse do—na nnyɛ dza yɛpɛ, na mbom dza Nyankopɔn pɛ. Nyankopɔn n’apɛdze na aber nyina ɔdze ndzepa brɛ n’abɔdze nyina. Ntsi Jesus a odzi mũ mpo kãa kyerɛɛ n’Egya dɛ: “Nnyɛ me pɛ a, na wodze na ɔnyɛ.”—Luke 22:42.
‘Ma hɛn edziban a yehia wɔ da yi mu.’
Afei Jesus ma yehu dɛ yebotum abɔ hɛn ehiadze ho mpaa. Ɔnnyɛ mfom dɛ yɛbɔbɔ Nyankopɔn mpaa ebisa no dɛ ɔmfa hɛn ehiadze mma hɛn daa. Nokwasɛm nye dɛ yɛyɛ dɛm a ɔbɛkaa hɛn dɛ Jehovah na “ɔma nyimpa nyina nkwa nye ahom nye adze nyina.” (Asomafo Ndwuma 17:25) Bible no ma yehu dɛ Jehovah yɛ ɔbaatan a ɔwɔ ɔdɔ na n’enyi gye ho dɛ ɔdze dza ne mba hia bɛma hɔn. Naaso dɛ ɔbaatan pa no, ɔremma ne mba adze a obepira hɔn.
“Fa hɛn akaw kyɛ hɛn.”
Ana edze Nyankopɔn kaw ankasa? Ana epɛ dɛ ɔdze wo bɔn kyɛ wo? Ndɛ nyimpa pii nntse ndzɛmba a ɔyɛ bɔn no ase na wommbu no enyibersɛm. Naaso Bible no kyerɛkyerɛ dɛ bɔn na ɔdze hɛn haw a no mu yɛ dzen no nyina aba, na ɔno nye adze tsitsir a ɔma nyimpa wu. Osiandɛ wɔwoo hɛn wɔ bɔn mu ntsi, hɛn nyina taa yɛ bɔn, na sɛ yebenya daakye a onnyiewiei a, gyedɛ Nyankopɔn dze hɛn bɔn kyɛ hɛn ana. (Romefo 3:23; 5:12; 6:23) Bible mu asɛm yi ma akomatɔyamu, ɔkã dɛ: “Ɔwo Ewuradze, iye na edze fir.”—Ndwom 86:5.
“Yi hɛn fi ɔbɔn no mu.”
Ana ihu mbrɛ ihia Nyankopɔn ne bambɔ dzendzenndzen no? Nyimpa pii nngye nnto mu koraa dɛ ‘ɔbɔnfo’ a ɔyɛ Satan no yɛ obi a ɔwɔ hɔ ankasa. Naaso Jesus kyerɛkyerɛɛ dɛ Satan wɔ hɔ ankasa, na ɔfrɛɛ no “wiadze yi hen” mpo. (John 12:31; 16:11) Satan asɛɛ wiadze a odzi do yi na ɔpɛ dɛ ɔsɛɛ ɔwo so kwan biara do, na ɔtwe wo fi w’Egya Jehovah ho. (1 Peter 5:8) Naaso Jehovah wɔ tum sen Satan koraa, na n’enyi gye ho dɛ ɔbɔbɔ hɔn a wɔdɔ no no ho ban.
Ɔnnyɛ tsebea biara mu na yebotum afa Jesus ne mpaabɔ a yɛakã ho asɛm tsiabaa yi mu nsɛntsitsir abɔ ho mpaa. Kaa dɛ, 1 John 5:14 kã fa Nyankopɔn ho dɛ: “Sɛ yɛserɛ biribiara mbrɛ ɔpɛ a, otsie hɛn.” Ntsi mma nnhaw wo dɛ wo haw yi suar dodoodow dɛ edze bɔkɔ Nyankopɔn enyim.—1 Peter 5:7.
Bio so, ɔdze fa mber a yɛdze bɔ mpaa nye beebi a ɔsɛ dɛ yegyina bɔ mpaa no ho so ɛ? Aso no ho hia?
Bi A W'enyi Bɛgye Iyi So Ho
ƆWEƆN-ABAN
Mpaabɔ—Aso Ber Na Beebi A Yɛbɔ Mpaa No Hia?
Hwɛ dɛ ana Bible kyerɛ beebi na ber pɔtsee a ɔsɛ dɛ yɛbɔ mpaa.
ESSENTIAL BIBLE TEACHINGS
Nyankopɔn N’ahendzi No, Ɔyɛ Ebɛnadze?
Jesus baa asaase do no, ɔkãa Nyankopɔn n’Ahendzi ho asɛm kyɛɛn asɛm fofor biara. Mfe ɔhaha pii nye yi, Jesus n’ekyirdzifo abɔ mpaa dɛ dɛm Ahendzi no mbra.