Peete—Iwer Was?
FIILE saan tas tas Fater-Unser kepeet tas kepeet is woo ti layt uf te kans welt tsum meyerst mache. Tas khan pis woer sin, awer sicher tas is tas kepeet woo ti layt weeniche ferxteen. Milioone tuun noo un noo yeete taach in een mekanix aat aus xpreche, fiilaycht fiil mools te taach iwer. Awer Yeesus wolt nii hon tas tas kepeet in soo een aat kemacht wëre solt. Wii wise mer tas?
Eep Yeesus tas kepeet aus xpreche, hot eyer kesaat: “Wëns tuu peetst, tuu net imer ti selwiche tinge noo un noo saan.” (Matheus 6:7) Meecht Yeesus sich selepst fersaat hon wii eyer tëne tiise wërter in kelërnt hot, tas se tas lërne solte, fer noo un noo peete? Kewis net! In woerheet, Yeesus waar in aan lërne iwer was fer tinge khene mer peete un hot ketsaycht was mus tas wichtiches sin wën mer peete. Wole mer een pisye iwer tas xpreche was Yeesus kesaat hot. Tas kepeet is in Mateus 6:9-13.
“Unser Fater im himel, tayn naame sol kehaylicht wëre.”
Mit tiise wërter, hot Yeesus tëm sayn tisipele aan erinert tas ti kanse kepeete mise kemacht wëre fer te Fater, Yeehoowa. Awer weest tuu warom is Kot sayn naame soo wichtich un mus kehaylicht wëre?
Sayt te aanfang fom mënxe kexicht, is te hayliche naame fon Kot trekich kemacht kep mit liieray. Kot sayn faynt, te Taywel, saat tas Yeehoowa een ekoystich Kowernant is, woo liie tuut, woo net tas recht hot fer sayn kriatsioone rechiire. (Xeenesis 3:1-6) Fiile hon te Taywel sayn sayt raus kesuucht un tuun in lërne tas Kot krop, xlecht un winkatiiw is, orer tuun soo kaar saan tas es khee Kriatoer kept. Anere hon soo kaar Kot sayn naame fon te Piipele raus kehool un saan tas te naame net kexproch kepe sol.
Ti Piipel tsaycht tas Kot tiise kanse unkerëchtichkheete fermacht. (Esekyël 39:7) Wën Kot tas macht, tuu Eyer unser kanse neetichkheete pesoriche un unser kanse propleeme resolwiire. Wii? Ti neekste wërter fon Yeesus sayn kepeet kepe uns ti antwort.
“Tayn Raych sol khome.”
Hayt se taach kepts fiil unerxiit unich ti relichieese leerer iwer was is Kot sayn Raych. Awer tii woo Yeesus aan keheert hon, wuste tas ti profeete foer heyer kesaat hon, tas te Mesias, een Retner woo Kot raus kesuucht hot, te rechiirer sin teet fon een Kheenich Raych woo ti welt ënere teet. ( Isaiias 9:6, 7; Tanyël 2:44) Tas Raych tuut Kot sayn naame ferhayliche wayl tuut tsayche tas te Taywel iwer Yeehoowa keloo hot. Nochter, tuut tiise Raych te Taywel fernichte un ales fom xlechtes fermache. Kot sayn Raych tuut ti kriiche, krankheete, hunger un soo kaar te toot tsum ën pringe. (Psalm 46:9; 72:12-16; Isaiias 25:8; 33:24) Wënst tuu peete tuust tas Kot sayn Raych khome sol, tuust tuu ferlange tas tiise kanse tinge pasiire sole.
“Tayn wile sol kemacht wëre, wii im himel, soo aach uf te eyert.”
Tiise wërter fon Yeesus tsayche tas Kot sayn wile wërt uf te eyert kemacht, soo wii im himel, woo Kot woont. Im himel hon imer ti meyerste Kot sayn wile kemacht, wayl waar tat, woo Kot sayn Soon, keeche te Taywel un tii woo tee pay kextan hon, kekhëmpft hot, un tsu ti eyert keworef. (Apokalipsis 12:9-12) Tiise trit tings fon tas kepeet, soo wii ti tswaay eyerste, helfe uns siin was wichticher is: Kot sayn wile un net unser. Is Kot sayn wile woo imer tas pestes fer al mache tuut. Soo kaar Yeesus, woo perfëkt waar, hot fer sayn Fater kesaat: “Net soo wii ich wil, awer was tayn wile is.” (Lukas 22:42)
“Kep uns hayt unser proot fer tiise taach.”
Noochte hot Yeesus ketsaycht tas es net ferkheert is, iwer unser neetichkheet in tas kepeet xpreche. Wën mer tas mache, tuun mer uns erinere tas is Yeehoowa woo ‘fer yeete eene leepe, luft un ale tinge kept’. (Aphostele sayn kexicht 17:25) Ti Piipel tsaycht tas Yeehoowa is een liipliche fater woo mit frooheet fer sayn khiner kept, was se prayche. Awer, soo wii een kuute papa, tuut Yeehoowa niks mache woo sayn khiner ferletse khënt.
“Ferkep unsere xulte.”
Pist tuu was xultich fer Kot? Must tich entxultiche? Fiile layt hon kaar khee aanung tas ti sint eksistiirt un tas tas was ërnstes is. Awer ti Piipel tuut in lërne tas ti sint is te wortsel fon unser kreeste propleeme, wayl is ti sint woo uns tsum toot nëmt. Wayl mer xon mit te sint uf te welt khome, tuun meyer al, ale kepot, in sinte pekeen, un unser eensich hofnung fon een peste tsukhunft is tas Kot uns fertsayt. (Romaaner 3:23; 5:12; 6:23) Es is aarich kuut wise tas ti Piipel saat: “Wayl tuu, oo Yeehoowa, pist kuut un imer fërtich fer se fertsaye”. (Psalm 86:5)
“Mach uns fom xlechte fray.”
Khanst tuu siin wii mer al Kot sayn hilef mise hon? Fiil klaape net tas te Taywel, te “xlechter”, eksistiirt. Awer Yeesus hot in kelërnt tas te Taywel, yaa, tee eksistiirt un hot soo kaar kesaat tas te Taywel te ‘kowernant fon tiise welt is’. (Yoohan 12:31; 16:11) Te Taywel hot tiise kans welt, woo unich tëm sayn macht is, fersaut, un teet kërn uns aach ap lënke, un uns xteere fer een kuut froyntxaft mit unser Fater Yeehoowa hon. (1te Pheeter 5:8) Awer Yeehoowa is kans xtërke wii te Taywel un tuut tii woo tëm liipe, xitse.
Tas khortse pexprechung iwer ti haupste phunkte fon tas Fater-Unser kepeet fon Yeesus, tuut net iwer ti kanse phunkte xpreche, woo mer in kepeet ferlange khene. Eriner tich was 1 Yoohan 5:14 iwer Kot saat: “Tas is een tuun was mer ferlange, eyer heert uns”. Tes weeche, tuu net tenke tas tayn propleeme tsu kleen sin fer tas in kepeet fer Kot xpreche. (1 Pheeter 5:7)
Un was saan iwer tas plats un uertsayt? Meecht tas ekaal sin woo un wën mer peete?
Fiilaycht tuust tuu aach kërn hon
TE WACHTHORM
Peete—Macht tas unerxiit woo un wan?
Fin raus op ti Piipel saan tas mer ploos aan spetsiifixe pletse orer aan etliche xtune fon taache peete khene.
WICHTICHE PIIPLIXE INLËRNUNGE
Was is Kot sayn Raych?
Kot sayn Raych waar tas haupste theema fon Yeesus sayn preetich aarwayt too uf te eyert. Fon tat aan, tuun al woo Yeesus noo keen, peete tas tas Raych khome sol.