AN ATIKLÁBCHIK in t’ajál yan i oláb, pero wa’ats jun axi in lej eyendhál. Játs axi in uluw a Jesús: an padre nuestro. Bélits antsaná’, yan i atikláb yab in éxbayal. Yan i atikláb in t’ajál axé’ xi oláb chudhél chudhél, ani talchik in ulal yaníl ta k’icháj. Pero a Jesús yab tu exóbchij ki t’aja’ antsaná’. ¿Jale’ ti exlál nixé’?

Ók’xidh kin exóbchij in aykolil ti ól, a Jesús in ucha’chik: «Tam kit ólonchik, yab kit alkʼidh wichʼkʼon ka uluw jayétsejkʼij» (Mateo 6:7). A Jesús yab in lé’ak abal in aykólil kin uluw jayétsejk’ij an kaw axi jajá’ in eyendha’ tin olábil. Jawa’ in lé’ak kin exóbchij pel jant’oj játs axi más exbadh axi kwa’al ki konoy ti olábil. Xowé’ ki exóbna’ an oláb axi in t’aja’ a Jesús, axé’ k’wajat ti Mateo 6:9-13.

Jawa’ k’a’ál in exóbchij in aykólil játs abal expidh kwa’al ki ólonchij in Tátaj, a Jehová. Pero, ¿jale’ tin uluw talbél abal kwa’al ka t’okej in bij a Jehová?

Kom ma tam ti tujey an xe’tsintaláb, lej kawiliyámej a Dios. A Satanás in ulal abal a Jehová pel i janamkaw, abal expidh in tsálpayal tin kwetémtal ani abal yab u abatnom alwa’ (Génesis 3:1-6). Ma wa’ats i atikláb axi jayej in ulal i janamtaláb tin kwéntaj a Dios. In ulalchik abal a Dios lej pójkax, tu odhnál ani yab in ts’ejkamal patal jawa’ wa’ats. Ma in tixk’ámalchik in bij a Dios ti Biblia ani in k’anchal axi k’e’atchik abal kin eyendha’.

Pero an Biblia in ulal abal a Dios ne’ets kin t’aja’ abal yabáts ka uluwat axé’ xi janamtaláb (Ezequiel 39:7). Ani jayej ne’ets kin tixk’a’ patal an k’ibataláb, ¿jant’ini’ ti ne’ets kin t’aja’? Ki t’aja’ ti kwéntaj jawa’ in uluw a Jesús.

Xowé’ ta k’icháj, an atiklábchik axi in ok’nál jun i belomtaláb yab in lej éjtowalchik kin wilk’a’ jant’oj játs in Eyaltal a Dios. Pero tam ti k’wajiy a Jesús tejé’ ban Tsabál, an judíos in éxbayalak alwa’ an k’ej kaw axi u kaw tin kwéntaj an Mesías. In exlálakchik abal játs axi takuyámej k’al a Dios abal ti abatnom ani kin tixka’ patal an k’ibataláb (Isaías 9:6, 7; Daniel 2:44). Játs axé’ xi eyaltaláb axi ne’ets kin t’aja’ abal ka t’okej in bij a Dios. Ani abal kin t’okedha’ in bij a Dios, ne’ets kin tejwamédha’ abal an janamkaw pel a Satanás, jaxtám ne’ets kin talabédha’. Jayej ne’ets kin talabédha’ an pextaláb, an yaw’láts, an jayil ani an tsemláj (Salmo 46:9; 72:12-16; Isaías 25:8; 33:24). Tam i konchal a Dios ka chich in Eyaltal, jawa’ k’wajat i konchal játs abal ka putun in tsalápil.

Axé’ xi kaw in tejwamedhál abal ne’ets ka putun in tsalápil a Dios tejé’ ti Tsabál, antsaná’ jant’ini’ k’wajat ti putnal tiwa’ ti éb. Axé’ tujey ti putnal tam ti a Jesús in pet’na’ a Satanás ani in tolmiwálchik tejé’ ban Tsabál (Revelación [Apocalipsis] 12:9-12). Axé’ xi ox i tsalap tu tejwamédhanchal abal jawa’ más exbadh pel in tsalápil a Dios ani yab axi wawá’ i k’ál. Ani axé’ játs kom jawa’ ne’ets tu ku pidha’ más i alwa’taláb játs ka t’ajan in kulbétal a Jehová. A Jesús pelak jun i inik t’okat, pero bélits antsaná’ in uluw: «U lej lé’ tu t’ajchij a kulbétal ani yab u kwete’ ­kulbétal» (Lucas 22:42).

A Jesús jayej tu exóbchij abal i éjtowal ki konchij a Dios k’e’at jant’oj axi wawá’ i yéjenchal. Tam, yab kidháb ki konchij a Dios chudhél chudhél jawa’ i yéjenchal. Max ki t’aja’ antsaná’, i tejwamedhál abal expidh a Jehová «játs axi tu pidhál i ejataláb, ani i ixak’ ani patal jawa’ i kwa’al» (Hechos 17:25). An Biblia in ulal abal a Jehová pel ejtíl jun i tataláb axi lej k’anidhom ani in pidhál in tsakámil patal jawa’ in yéjenchal. Jayej i exlál abal an tataláb yab ne’ets kin pidha’ in tsakámil jant’oj axi in exlál abal ne’ets ka odhnáj.

¿Jant’oj játs axi i lé’ abal a Jehová tu ku pákwlanchij? ¿Ani jale’ i yéjenchal abal tu ku pákwlanchij? ­Yan i atikláb yab in t’ajál ti kwéntaj o yab in lé’ kin bela’ abal an walabtaláb játs axi in t’ajámal abal ka wa’tsin yan i k’ibataláb ani ku tsemets. Patal u wálbidh, jaxtám wilk’idh u uk’pinal ani i k’ibchal a Dios. Abal ki ejtow ku k’wajiy abal ets’ey, i yéjenchal abal a Dios tu ku pákwlanchij i wálab (Romanos 3:23; 5:12; 6:23). Pero an Biblia in ulal abal a Jehová lej alwa’ inik ani in lé’ tu ku pákwlanchij (Salmo 86:5).

Patal i yéjenchal abal a Dios tu ku béletna’. Walám wa’ats i atikláb axi yab in belál abal an tenekláb chubax ejat. A Jesús in exlálak abal chubax ejat, jaxtám ma in uluw abal a Satanás «pel i abatnom k’al an inikchik» (Juan 12:31; 16:11). A Satanás yab expidh in lé’ kin abatna’ an xe’tsintaláb, jayej in lé’ abal wawá’ ki t’aja’ jawa’ kidháb ani ku ow­méj k’al a Jehová (1 Pedro 5:8). Pero yab in tomnál ki ts’ejna’ a Satanás. A Jehová más tsapik ani in lé’ tu ku béletna’.

Pero wa’ats yan jant’oj más axi i éjtowal ki konchij a Dios ti olábil. 1 Juan 5:14 in ulal: «I éjtowal ki konoy jawa’ ki lé’na’, kom i tso’obits abal max ki konchij jawa’ Jajá’ in kulbetnál, Jajá’ tu ats’ál». Axé’ tu exóbchal abal i éjtowal ki ólchij a Dios patal jawa’ tu t’e’pindhál ani Jajá’ ne’ets tu ku t’ajchij ti kwéntaj (1 Pedro 5:7).

Xowé’ ki tsalpay k’al axé’, ¿jayk’i’ tin tomnál ku oláts ani ju’táj? ¿Jant’oj in ulal an Biblia tin kwéntaj axé’? Ne’ets ki exóbna’ tin aytal an exobintaláb.