KALA NUAN ninga pasal sampi Apai Kami? Mayuh orang Kristian ba serata dunya nemu pasal tu, lalu ngingat sereta ngena iya ninting hari. Tang mayuh orang semina ngulang lalu enda nemu reti iya. Kati nya tuju Jesus meri chunto sampi tu ngagai kitai? Enda!

Enda lama sebedau nya, Jesus madah, “Lebuh kita besampi, anang besebutka mayuh macham leka jaku ti nadai reti.” (Matthew 6:7) Enti Jesus enggai kitai ngingat sereta ngulang sampi tu, nama tuju iya meri kitai sampi tu? Iya benung ngajar kitai pasal utai ti penting ke patut disampika. Aram kitai mansik sampi tu ke ba Matthew 6:9-13.

Jesus benung ngingatka bala murid iya, sida patut besampi semina ngagai Apai Jehovah aja. Tang, nama kebuah nama Jehovah amat penting, sereta patut dikuduska?

Kenyau ari pun sejarah mensia, nama Petara udah dipejaika. Munsuh Petara, iya nya Sitan, udah nuduh Petara bula sereta ngenanka utai ti manah ari mensia. (Pemungkal 3:1-6) Sekeda orang ngasuh orang bukai pechaya, Petara nya amat jai. Bisi mega penyalin Bup Kudus ngeluarka nama Petara ari salin sida. Bisi mega nagang ngena nama Jehovah, tauka ngajar Petara nya enda wujud.

Tang Petara deka nentuka nama Iya dikuduska. (Esekiel 39:7) Ukai nya aja, Iya deka muai semua penanggul kitai kemayaharitu. Baka ni? Jaku Jesus ke nangkanka tu deka meri saut iya.

Mayuh tuai pengarap charut, reti Perintah Petara. Tang kenyau ari suba, murid Jesus udah nemu Perintah tu deka ngubah gaya bumi, sereta Mesiah deka nyadi Raja ba Perintah tu. (Isaiah 9:6, 7; Daniel 2:44) Perintah tu deka nguduska nama Jehovah, sereta munaska Sitan. Perintah tu mega deka ngetuka lapar pungkang, penyakit, perang, lalu indah pemati. (Masmur 46:9; 72:12-16; Isaiah 25:8; 33:24) Nya alai, lebuh nuan besampi, nuan nyebut, “Datai meh Perintah Nuan” reti iya nuan minta semaya Petara tu dikeamatka.

Leka jaku tu nyadika jamin, peneka Petara ba bumi deka nyadi laban peneka Iya ba serega udah dikeamatka. Ba serega, Jesus udah beperang ngelaban Sitan enggau bala melikat ke jai, lalu muai sida ke bumi. (Pemandang 12:9-12) Tiga peminta keterubah dalam sampi Jesus nunjukka, peneka Petara utai ti pemadu penting. Kelimpah ari nya, peneka Petara seruran mai penguntung ngagai semua utai ke ditempa Iya. Nya alai, Jesus besampi, ‘Ukai nitihka peneka aku, tang awakka peneka Nuan nyadi.’—Luke 22:42.

Enda salah enti kitai besampi ngambika utai ke diguna kitai dijaga. Bup Kudus madah, Jehovah meh “ke meri pengidup enggau seput, enggau semua utai bukai, ngagai semua mensia.” (Surat Kereja Rasul 17:25) Iya endang apai ti pengerindu, ke seruran nyaga utai ke diguna bala anak Iya. Tang, Iya enda nyaut peminta ke ulih ngemediska kitai.

Kati kitai amat-amat begunaka pengampun ari Petara? Bisi orang enda sedar, kitai endang diadaka bedosa. Dosa nya urat ngagai semua penanggul kitai, sereta ulih ngujungka pemati. Tang ketegal pengampun ari Petara, kitai bepeluang ngembuan pengadang ti manah. (Rome 3:23; 5:12; 6:23) Kati Petara sanggup ngampunka dosa kitai? Bup Kudus madah, “Nuan [Jehovah], endang manah enggau kami, sereta ngampun.”—Masmur 86:5.

Mayuh orang enda pechaya, Sitan endang amat bisi. Tang Jesus madah, iya endang amat bisi, lalu iya meh “merintah dunya tu.” (John 12:31; 16:11) Sitan benung nesatka serata dunya, ngambika mensia jauh ari Petara. (1 Peter 5:8) Tang Jehovah bekuasa agi ari Sitan, lalu Iya deka ngelindung orang ke tetap ati “ari penyai.”

Kati sampi kitai semina nyengkaum utai ke udah dikerandauka kitai? Ukai. Ayat ba 1 John 5:14 madahka, “Enti kitai minta sebarang utai nitihka peneka Iya [Petara], Iya ninga kitai.” Jehovah ngasuh kitai nyerahka semua pengirau kitai ngagai Iya.—1 Peter 5:7.

Tang, kati kitai semina besampi ba maya sereta endur ke ditetapka? Aram kitai meda saut iya.