Samba

4 Sambu na Nki Mambu Beto Fwete?

BANTU metubaka nde kisambu ya mbandu ya Yezu​—yina bo kebingaka bantangu yankaka Kisambu ya Mfumu to Kisambu ya Tata na Beto—​kele mosi na kati ya bisambu yina Bakristu yonso kevutukilaka mingi kuluta. Yo vanda buna to ve, ntembe kele ve nde yo kele na kati ya bisambu yina bantu mingi kebakisaka ve. Bamilio ya bantu kevutukilaka bangogo na yo konso kilumbu, ziku mbala mingi na kilumbu. Kansi, dibanza ya Yezu kuvandaka ve nde bo sadila kisambu yango na mutindu yina. Inki mutindu beto mezaba yo?

Ntangu fyoti na ntwala ya kupesa kisambu yina ya mbandu, Yezu kutubaka nde: “Kana beno kesamba, beno tuba ve kima yo yina mosi mbala na mbala.” (Matayo 6:7, NW) Keti Yezu kusadilaka minoko zole na kutubaka bangogo yina beto fwete kanga na ntu mpi kuvutukila mbala na mbala? Ata fyoti ve! Kansi Yezu vandaka kulonga beto mambu ya beto fwete lomba na kisambu, mpi yandi vandaka kusadisa beto na kubakisa mambu ya mfunu ya beto fwete yibuka ntangu beto kesamba. Bika beto tadila mbotembote mambu yina yandi tubaka. Kisambu yango kele na Matayo 6:9-13.

“Tata na beto kele na zulu, zina na nge ya santu kuvanda ya lukumu.”

Na bangogo yai, Yezu vandaka kuyibusa balongoki na yandi nde bo fwete samba kaka Tata na yandi, Yehowa. Kansi, keti nge kezaba sambu na nki zina ya Nzambi kele mfunu mingi mpi sambu na nki beto fwete santisa yo, to kusala nde yo vanda ya santu?

Banda na luyantiku ya disolo ya luzingu ya bantu, zina ya santu ya Nzambi mefingamaka. Satana, mbeni ya Nzambi, kubingaka Yehowa muntu ya luvunu mpi Mfumu ya bwimi yina kele mpenza ve ti kiyeka ya kuyala bigangwa na yandi. (Kuyantika 3:1-6) Bantu mingi mebakaka lweka ya Satana na kulongaka nde Nzambi kele ntima-mbi, nku, mpi kevandaka makambu ngolo to bantu yango kendimaka ve nde Yandi kele Ngangi. Bankaka nkutu menwanisaka zina ya Nzambi Yehowa na kukatulaka yo na bambalula ya Biblia mpi na kubuyisaka bantu na kusadila yo.

Biblia kemonisa nde Nzambi tasungika mambu yai yonso ya kukonda lunungu. (Ezekiele 39:7) Na kusalaka mutindu yina, yandi talungisa bampusa na nge yonso mpi tamanisa makambu na nge yonso. Inki mutindu? Bangogo ya kelanda na kisambu ya Yezu kepesa mvutu.

“Kimfumu na nge kwisa.”

Bubu yai, bangindu kele kisakasaka na kati ya balongi ya mabundu na yina metala Kimfumu ya Nzambi. Kansi, mutindu bawi ya Yezu kuzabaka yo, baprofete ya Nzambi kutubaka ntama na ntwala nde Mesia, Ngulusi yina Nzambi kuponaka, zolaka kuyala Kimfumu mosi ya tasoba nsi-ntoto. (Yezaya 9:5, 6; Daniele 2:44) Kimfumu yango tasantisa zina ya Nzambi na  kutungululaka luvunu ya Satana mpi na nima yo tafwa Satana ti bisalu na yandi yonso. Kimfumu ya Nzambi tasukisa bitumba, maladi, nzala, mpi nkutu lufwa yo mosi. (Nkunga 46:10; 72:12-16; Yezaya 25:8; 33:24) Ntangu nge kelombaka na kisambu nde Kimfumu ya Nzambi kukwisa, nge kesambaka sambu balusilu yai yonso kulungana.

“Luzolo na nge kusalama awa na ntoto bonso na zulu.”

Bangogo ya Yezu kemonisa nde luzolo ya Nzambi tasalama mpenza na ntoto mutindu yo kele na zulu, kisika Nzambi kezingaka. Yo memonanaka nde ata muntu mosi ve menungaka na kukanga luzolo ya Nzambi nzila sambu yo salama ve na zulu; kuna Mwana ya Nzambi kunwanaka ti Satana mpi bantu na yandi ebuna yandi losaka bo na ntoto. (Kusonga 12:9-12) Dyambu yai ya tatu ya beto kelombaka na kisambu ya mbandu, ti mambu zole ya ntete, kesadisaka beto na kutula dikebi na beto na mambu ya meluta mfunu​—luzolo na beto mosi ve, kansi ya Nzambi. Luzolo na yandi kele kima yina kenataka ntangu yonso mambote ya kuluta mingi na lugangu na yandi yonso. Yo yina, ata Yezu muntu ya kukuka kutubaka na Tata na yandi nde: “Kulanda luzolo na mono ve, kansi luzolo na nge.”​—Luka 22:42.

“Pesa beto bubu yai madia yina ya beto ke na yo mfunu.”

Na nima, Yezu kumonisaka nde beto lenda samba mpi sambu na bampusa na beto. Yo kele mbi ve na kusamba Nzambi sambu na bampusa na beto ya mfunu mpi ya konso kilumbu. Nkutu, kusala mutindu yina keyibusaka beto nde Yehowa kele muntu yina “ke pesaka bantu yonso moyo, mupepe ya kupema, ti bima yonso.” (Bisalu 17:25) Biblia kemonisa nde yandi kele kibuti mosi ya zola yina kesepelaka na kupesa bana na yandi bima yina bo kele ti yo mfunu. Kansi, bonso kibuti mosi ya mbote, yandi tapesa ve mvutu na balombilu yina kele ve sambu na mambote na bo.

“Lolula beto bantu ya masumu.”

Keti nge kele ti mfunu ya ndolula ya Nzambi? Bantu mingi bubu yai kebakisaka dyaka ve kana disumu kele inki mpi bunene ya disumu. Kansi, Biblia kelonga nde disumu kele na kisina ya makambu ya kuluta mbi, sambu yo kele kisina ya ntetentete ya lufwa ya bantu. Sambu beto kebutukaka bantu ya masumu, beto yonso kesalaka masumu mbala na mbala, mpi kivuvu mosi mpamba ya beto kele na yo sambu na makwisa ya kukonda nsuka mesimbama na ndolula ya Nzambi. (Roma 3:23; 5:12; 6:23) Yo kelembika ntima na kuzaba nde Biblia ketuba nde: “Mfumu Nzambi, nge kele muntu ya mbote, nge ke wilaka bantu mpi mawa.”​—Nkunga 86:5.

“Katula beto na maboko ya muntu ya mbi.”

Keti nge kebakisa nde nge kele mpenza ti mfunu ya lutaninu ya Nzambi, kukonda kusukinina? Bantu mingi kebuyaka na kundima nde “muntu ya mbi,” Satana, kele mpenza. Kansi, Yezu kulongaka nde Satana kele muntu ya kyeleka, nkutu Yezu kubingaka yandi “mfumu ya nsi-ntoto yai.” (Yoane 12:31; 16:11) Satana mebebisaka nsi-ntoto yai ya yandi keyalaka, mpi yandi kele ti mpusa ya ngolo ya kubebisa nge, ya kukanga nge nzila ya kuyedisa bangwisana ya ngolo ti Tata na nge, Yehowa. (1 Piere 5:8) Kansi, Yehowa kele ngolo mingi kuluta Satana mpi yandi kesepelaka na kutanina bantu yina kezolaka Yandi.

Bangindu ya mfunu ya kisambu ya mbandu ya Yezu ya beto metadila na bunkufi na mwa ntangu fyoti metubila ve mambu yonso yina beto fwete tuba na kisambu. Yibuka nde 1 Yoane 5:14 ketela beto na yina metala Nzambi nde: “Kana beto ke lomba konso kima bonso kele luzolo na yandi, beto zaba mbote nde yandi ke wila beto.” Yo yina, kudiyangisa ve nde makambu na nge kele mfunu ve sambu nge tubila yo na kisambu.​—1 Piere 5:7.

Kansi, nki beto lenda tuba sambu na ntangu mpi kisika? Keti ntangu mpi kisika ya beto fwete samba kele mfunu?