МОЛИТВА Господня алай Отче наш тіп адалчатхан пазырыснаң христианнар иң удаа пазырчалар тіп саналча. Андағ даа полза, кӧп кізі ол пазырыстың смыслын саба оңнапча. Миллионнар аны наизусть пілчелер, кӱннің сай, кӱнде нинҷе-де хати, ол пазырыснаң айланчалар. Че Иисус ол пазырысты хатап-хатап хығырзыннар тіп хынмаан. Анзын хайдаң пілчебіс?

Ол пазырысты чоохтир алнында, Иисус теен: «Пазырчатсар, пір нимені хатап-хатап чоохтанмаңар» (Матфей 6:7, НТ). Иисус, нинҷе-де сӧс наизусть ӱгрен саларға паза оларны хатап-хатап чоохтанарға пиріп, позы позына тоғырланарҷых па? Чох! Сынында Иисус нимедеңер пазырарға кӧзідім пирген. Ол пазырыс Матфей 6:9—13-те пазыл парған, аны тиксі арах кӧрібізеелер.

Иисус позының Пабазына, Иеговаа, пазырарға кирек полчатханын ӱгренҷілерінің сағыстарына кирген. Че ноға Худайның ады анҷа аарлығ паза ноға ол ат сабланарға кирек?

Пастағы кізілер чуртаан тустох Худайның ызых адын уйатха сух салғаннар. Худайның ыырҷызы, Сайтан, Иегованы чой, позынаңар ла сағынчатхан Устағҷы тіп хомайлаан. Позының чайаахтарынаң устирға правозы чоғыл теен (Бытие 3:1—6). Кізілернің кӧбізі, Худайны кізее кирегі халбас, хазыр, паза ӧс алаачы тіп санап, алай Худай чоғыл тіп, Сайтанның саринзар турыбысхан. Пасхалары, Худайның адын постарының Библияларынаң чох идібізіп паза аны адирға чаратпин, Худайның адынаң, Иеговадаң, тоғыр пар сыхханнар.

Библияда Худай андағ хомай киректі тӱзет салар тіп пазылча (Иезекииль 39:7). Позының адын сабландырып, ол пістің прай кирексіністерібісті толдыр салар паза прай сидіктерні чох идер. Хайди? Нандырығ Иисус пирген пазырыстың пу сӧстерінде.

Худайның Хан-ӱлгӱзі нимедір ол? Пу сурыға религиознай устағҷылар пасха-пасха нандырығлар пирчелер. Че Иисусты искен кізілер Худайның пурунғы ухаанҷыларының ниме чоохтааннарын пілгеннер. Олар Мессий, Худай таллап алған Арачылағҷы, чир-чалбахты саңай алыстырыбызар Хан-ӱлгӱнең устир тіп ухаанҷылааннар (Исаия 9:6, 7; Даниил 2:44). Ол Хан-ӱлгӱ, Сайтанның чойын ілезіне сығарып паза аны аның киректерінең хада чох идібізіп, Худайның адын саблир. Худайның Хан-ӱлгӱзі чааларны, ағырығларны, ӧзӧгісті, ӧлімні дее чох идібізер (Псалом 46:9; 72:12—16; Исаия 25:8; 33:24). Хан-ӱлгӱ килзін тіп пазырчатсар, прай ол молҷағлар толзыннар тіп сурынчазар.

Иисустың сӧстерінең кӧрінче: тигірде, Худай чуртапчатхан орында, прай ниме аның кӧңнінҷе полча. Чирде дее аның кӧңнінҷе прай ниме поларға кирек. Тигірде Худайның кӧңні толарына пір дее ниме харығ пол полбаан: аның Оолғы, Сайтаннаң паза аның айналарынаң тоғыр чаалазып, оларны чирзер тастабысхан (Азых чоох 12:9—12). Пу пазырыстағы ӱзінҷі сурыныс, пастағы ікі сурынысох чіли, иң аарлығ нимедеңер — позыбыстың нимес, Худайның кӧңнінеңер — сағынарға полысча. Худайның кӧңні толғаны хаҷан даа прай чайаахтарға туза полча. Аннаңар чазых чох кізі, Иисус, позының Пабазына піди теен: «Минің кӧңнімҷе нимес, Сининҷе ползын» (Лука 22:42).

Аннаң андар Иисус кӧзіт пирген: пазырчатсабыс, позыбыстаңар даа ундутпасха кирек. Кӱннің сай полчатхан киректердеңер паза сағыссырастардаңар Худайға пазырарға чарир. Андағ пазырыстар Иегова «прай нимее тын, чуртас паза нинҷе ниме пар прай пирчеткенін» ундутпасха полысчалар (Илҷілернің 17:25). Библияда Худай позының палаларына олар кирексінчеткен нимелерні хынып пирчеткен Паба тіп пазылча. Хайди чахсы паба палаларының оларға хорығыс ағылчатхан сурыныстарын толдырбинча, андағ сурыныстарны Худай ідӧк толдырбас.

Худайның алнында пістің алым пар ба? Пістің пыробысты тастирға кирек пе? Чазых нимедір ол паза ол нинҷе аар салтарларға ағылчатханын пӱӱн кӧп кізі пілбинче. Че Библия хоостыра, прай сидіктер чазых ӱчӱн полчалар паза кізілер чазых ӱчӱн ӧлчелер. Чазых піске ӱлӱске пирілген, аннаңар прайзыбыс алҷаастар итчебіс. Худай пыроларыбысты тастаза ла, мӧгі чуртасха чидіп аларбыс (Римдегілерге 3:23; 5:12; 6:23). Библияда анзынаңар ниме чоохталчатханын пілерге хайдағ часхарыстығ: «О Иегова, син паарсастығзың паза пыро тастирға тимдезің!» (Псалом 86:5).

Худайдаң арачылас сірерге тың кирек полчатханын пілінчезер бе? «Чабал» алай Сайтан парына кізілер киртінерге хынминчалар. Че Иисус Сайтанны «чир-чалбахтың кнезі» тіп адаан (Иоанн 12:31; 16:11). Сайтан позы устапчатхан чир-чалбахты ардатча, сірерні дее ардадарға хынча паза сірерге Пабаңарзар, Иеговазар, чағдирға харығ поларға кӱстенче (1 Петрның 5:8). Че Иегова Сайтаннаң хай-хай кӱстіг паза ағаа хынчатханнарны ол ӧрініснең арачылапча.

Иисус пирген кӧзідігліг пазырысты хысхаҷахти ӱзӱрібістібіс. Че піске пасха даа нимелердеңер пазырарға чарир. 1 Иоанның 5:14-те ниме пазылчатханын сағысха кир кӧреелер: «Піс Худайның кӧңніне кірчеткен нимелернің хайзын даа сурзабыс, Ол пісті исче». Аннаңар хайдағ даа сидікте Худайдаң полызығ сурыныңар. Минің сидіктеріме Худайның кирегі халбас тіп сағынмаңар (1 Петрның 5:7).

Че хаҷан паза хайда пазырарға?