Prea—Wetin Wi Fɔ Pre Fɔ?
DI AWA Fada prea na prea we Kristian dɛn ɔlsay na di wɔl kin pre. Ilɛk na tru ɔ nɔto tru, Jizɔs in prea we sɔntɛnde dɛn kin kɔl di Awa Fada prea, na prea we bɔku pipul nɔ ɔndastand. Bɔku bɔku pipul dɛn kin se di Awa Fada prea ɛvride, sɔntɛm dɛn kin ripit am bɔku tɛm fɔ di de. Bɔt Jizɔs nɔ bin ɛva want mek dɛn yuz di Awa Fada prea da we de. Aw wi no dat?
Jɔs bifo Jizɔs sho in disaypul dɛn da prea de, i bin tɛl dɛn se: “We [una] de pre, [una] nɔ se di sem tin igen ɛn igen.” (Matyu 6:7) Fɔ se Jizɔs bin kɔntinyu fɔ se sɔntin we difrɛn frɔm wetin i bin dɔn tɔk bay we i yuz wɔd dɛn we in disaypul dɛn go mɛmba ɛn ripit? Nɔ, nɔto so i bi. Jizɔs bin de tich wi wetin fɔ pre bɔt, ɛn i bin ɛp wi fɔ no klia wan di impɔtant tin dɛn we wi fɔ tink bɔt we wi de pre. Lɛ wi tek tɛm luk wetin i bin se. Di prea de na Matyu 6:9-13.
“Wi Papa we de na ɛvin, lɛ ɔlman tek yu nem as sɔntin we oli.”
Jizɔs bin mɛmba di wan dɛn we bin de fala am se na to in Papa Jiova dɛn fɔ pre to. Bɔt yu no wetin mek Gɔd in nem impɔtant ɛn wetin mek wi nid fɔ tek am as sɔntin we oli?
Frɔm we Gɔd mek mɔtalman, dɛn dɔn de tɔk bɔku lay lay tin dɛn bɔt in oli nem. Gɔd in ɛnimi we na Setan, tɔk se Jiova de lay, in na Rula we jɔs bisin bɔt insɛf ɛn we nɔ gɛt rayt fɔ rul di wan dɛn we i mek. (Jɛnɛsis 3:1-6) Bɔku pipul dɛn de sɔpɔt Setan, bay we dɛn de tich se Gɔd wikɛd, ɔ dɛn tɔk se nɔto In mek wi. Ɔda wan dɛn dɔn atak in nem bay we dɛn pul di nem Jiova frɔm Baybul transleshɔn dɛn ɛn tɔk se i bad fɔ yuz am.
Di Baybul sho se Gɔd go kɔrɛkt ɔl di lay lay tin dɛn we dɛn dɔn tɔk bɔt am. (Izikɛl 39:7) We i du dat, i go gi yu ɔl wetin yu nid ɛn kɔrɛkt yu prɔblɛm dɛn bak. Aw i go du dat? Di nɛks wɔd dɛn we Jizɔs tɔk na in prea gi wi di ansa.
“Lɛ yu Kiŋdɔm kam.”
Tide, di bigman dɛn pan Gɔd biznɛs nɔ ɔndastand wetin na Gɔd in Kiŋdɔm. Bɔt di wan dɛn we bin de lisin to Jizɔs bin no se Gɔd in prɔfɛt dɛn bin dɔn de tɔk se di Mɛsaya, we na di Wan we Gɔd dɔn pik fɔ sev in pipul dɛn, go rul na wan Kiŋdɔm we go chenj di wɔl. (Ayzaya 9:6, 7; Daniɛl 2:44) I go mek Gɔd in nem oli bay we i go mek ɔlman no di lay we Setan de lay ɛn bay we i go dɔnawe wit Setan ɛn ɔl di tin dɛn we i de du. Gɔd in Kiŋdɔm go stɔp wɔ, sik, angri, ɛn ivin day. (Sam 46:9; 72:12-16; Ayzaya 25:8; 33:24) We yu de pre fɔ mek Gɔd in Kiŋdɔm kam, yu de pre fɔ mek ɔl dɛn prɔmis dɛn de kam tru.
“Lɛ wetin yu want, bi na dis wɔl lɛk aw i de bi na ɛvin.”
Jizɔs in wɔd dɛn sho se wetin Gɔd want go bi na di wɔl jɔs lɛk aw i de bi na ɛvin usay Gɔd de. Natin nɔ go stɔp wetin Gɔd want fɔ bi na ɛvin; Gɔd in Pikin bin dɔn fɛt agens Setan ɛn di wan dɛn we jɔyn am ɛn drɛb dɛn kam dɔŋ na di wɔl. (Rɛvɛleshɔn 12:9-12) Dis tɔd tin we wi fɔ pre fɔ we de na di Awa Fada prea, jɔs lɛk di fɔs tu, go ɛp wi fɔ pe atɛnshɔn mɔ pan wetin rili impɔtant we na wetin Gɔd want, nɔto wetin wi want. Na wetin Gɔd want de mek gud tin apin to ɔl di tin dɛn we i mek. Ɛn ivin di pafɛkt man we na Jizɔs bin tɛl in Papa se: “Nɔ mek wetin mi want apin, mek wetin yu want apin.”—Lyuk 22:42.
“Gi wi di it we wi nid fɔ dis de.”
Di ɔda tin we Jizɔs sho na dat wi kin pre bak fɔ wetin wi nid. Natin nɔ rɔŋ fɔ pre to Gɔd fɔ wetin wi nid fɔ di de. Infakt we wi du dat, i de mɛmba wi se Jiova na di wan we “gi ɔlman layf, briz fɔ blo, ɛn ɔltin.” (Akt 17:25) Di Baybul sho se in na papa we gɛt lɔv we kin gladi fɔ gi in pikin dɛn wetin dɛn nid. Bɔt jɔs lɛk ɛni gud papa in nɔ go gi in pikin dɛn wetin nɔ go bɛnifit dɛn.
“Fɔgiv wi fɔ wi sin dɛn.”
Yu tink se Gɔd nid fɔ fɔgiv wi? Bɔku pipul dɛn tide nɔ ɔndastand igen wetin na sin ɛn wetin mek i rili siriɔs. Bɔt di Baybul de tich se na sin de mek bad bad tin dɛn de apin to wi, ɛn na di men rizin we mek mɔtalman de day. Bikɔs dɛn bɔn wi wit sin, i izi fɔ mek wi ɔl sin, ɛn na we Gɔd fɔgiv wi sin dɛn na dat nɔmɔ go mek wi gɛt layf we go de sote go. (Romans 3:23; 5:12; 6:23) Wi rili gladi fɔ lan se di Baybul se: Jiova, “yu na gud PAPA GƆD ɛn yu de fɔgiv.”—Sam 86:5.
“Sev wi frɔm di wikɛd wan.”
Yu rili no wetin mek i impɔtant ɛn ɔjɛnt fɔ mek Gɔd protɛkt yu? Bɔku pipul dɛn nɔ biliv se “di wikɛd wan,” we na Setan de. Bɔt Jizɔs bin tich se Setan na rial pɔsin i ivin kɔl am “di wan we de rul dis wɔl.” (Jɔn 12:31; 16:11) Setan dɔn kɔrɔpt dis wɔl we i de kɔntrol, ɛn i want fɔ kɔrɔpt yusɛf fɔ mek yu nɔ gɛt tayt padi biznɛs wit yu Papa, Jiova. (1 Pita 5:8) Bɔt Jiova gɛt pawa pas Setan ɛn i de gladi fɔ protɛkt di wan dɛn we lɛk am.
Dis smɔl tin we wi dɔn lan bɔt di men pɔynt na Jizɔs in prea nɔ tɔk bɔt ɔltin we wi fɔ pre fɔ. Mɛmba se 1 Jɔn 5:14 tɛl wi bɔt Gɔd se: “Ilɛk wetin wi aks am fɔ, wans na dat i want, i de yɛri wi.” So nɔ wɔri se yu prɔblɛm dɛn tu smɔl fɔ pre to Gɔd bɔt am.—1 Pita 5:7.
Bɔt wetin wi go se bɔt di tɛm ɛn ples we wi fɔ pre? Yu tink se i impɔtant ustɛm ɛn usay fɔ pre?
You May Also Like
DI WACHTAWA
Prea—Usay ɛn Ustɛm Wi Fɔ Pre?
Lan mɔ fɔ si if di Baybul tɔk bɔt patikyula tɛm ɛn ples we wi fɔ pre.
ESSENTIAL BIBLE TEACHINGS
Wetin na Gɔd in Kiŋdɔm?
Di tɛm we Jizɔs bin de na di wɔl, i bin tɔk bɔt Gɔd in Kiŋdɔm pas ɛni ɔda tin. Fɔ lɔng tɛm, di wan dɛn we de fala Jizɔs dɔn pre fɔ mek da Kiŋdɔm de kam.