Sambu

4 Nkia Mambu Tufwete Lomba Muna Sambu?

ULOLO wa wantu bebadikilanga e sambu ki’eseto nze sambu kisundidi vangwa ova nza. E mvovo miami miakala mialudi yovo ve, e sambu ki’eseto kina kavanga Yesu eki kiyikilwanga mpe vo Sambu kia Mfumu, ke kibakulwanga ko kwa wantu ayingi. Ndonga bevovololanga e mvovo miami lumbu yawonso yovo nkumbu miayingi muna lumbu. O Yesu kakana ko vo e sambu kiaki kiavangilwa mu mpila yayi. Aweyi tuzayidi wo?

Una kayikidi ko e mvovo miami, Yesu wavova vo: “Ovo se nusamba, ke nuvovolola ko.” (Matai 6:7) Nga Yesu vunisa kayivunisa mu yika ulolo wa mambu mafwete siwa mu ntu yovo vutukilwa ntangwa zawonso? Ve kikilu. Yesu wazola kutulonga dina tufwete lomba ye dina tufwete sia va fulu kiantete vava tusambanga. Yambula twabadika dimosi dimosi mu mana kavova. E sambu kiaki kiasonama muna Matai 6:9-13.

 E sambu kiaki kia S’eto ezulu kayika Yesu ke kiyikanga mawonso ko tuvwidi o mfunu mu kuma kia sambu. Sungamena dina sono kia 1 Yoane 5:14 kikutuzayisanga mu kuma kia Nzambi: “Konso una tulombela muna luzolo luandi, wa kekutuwá.” Muna kuma kiaki, kuyindudi ko vo mambu onwananga mau makete kwandi kemafwanwa sunzulwa kwa Nzambi ko muna sambu.—1 Petelo 5:7.

Kansi, adieyi tuvova mu kuma kia fulu ye ntangwa tufwete sambila? Nga tufwete sola fulu ye ntangwa muna samba?

“E S’eto koko’zulu, yambula nkumbu aku yazitiswa.”

Muna sadila e mvovo miami, Yesu wasungamesa alongoki andi vo e sambu yau yawonso ifwete filwa kwa Yave w’Esandi. Nga ozeye ekuma nkumbu a Nzambi inina yamfunu kikilu y’ekuma ifwete zitisilwa yovo veleleswa?

Tuka lubantiku lwa lusansu lwa wantu, e nkumbu avauka ya Nzambi yisafulwanga. Satana wa ntantu a Nzambi, oyikilanga Yave vo Nyadi a luvunu, nkw’eloko ye kena ye nswa ko wa yala vangwa Yandi. (Etuku 3:1-6) Wantu ayingi bekuyisianga kuna sambu dia Satana yo longa vo Nzambi nkwa nsoki, nlandi a kunda ye kekutuvwanga mfunu ko. Akaka nkutu ke bekwikilanga ko vo vena ye Mvangi. Akaka bakatula e nkumbu Yave muna nsekola zakaka za Nkand’a Nzambi yo sima wantu mu lembi yo sadila.

Nkand’a Nzambi usonganga vo Nzambi osingika vilwa wau wawonso. (Yezekele 39:7) Vava kevanga wo, olungisa nsatu zeto yo fokola e mpasi zawonso. Mu nkia mpila? E mvovo milende, mia sambu kia Yesu mivananga e mvutu.

“E kintinu kiaku kiza.”

O unu kiaki, alongi a mabundu besianga mavwanga mayingi mu kuma kia Kintinu kia Nzambi. Kansi alongoki a Yesu bazaya wo vo ngunza za Nzambi tuka kolo basakula vo o Masia wa Mvuluzi ona wasolwa kwa Nzambi, oyala Kintinu eki kisoba mambu ova nza yayi. (Yesaya 9:6, 7; Daniele 2:44) E Kintinu kiaki kivelelesa e nkumbu a Nzambi yo senzeka luvunu lwa Satana ye mavangu mandi mawonso. E Kintinu kia Nzambi kifokola vita, mayela, mvengele yo lufwa. (Nkunga 46:9; 72:12-16; Yesaya 25:8; 33:24) Vava osambanga vo Kintinu kia Nzambi kiza, olombanga vo nsilu miami mawonso mialungana.

“O luzolo luaku luavangam’ova nza nze koko’zulu.”

E mvovo mia Yesu misonganga vo luzolo lwa Nzambi luvangama ova ntoto nze una luvangamanga kun’ezulu kuna kezingilanga Nzambi. O luzolo lwa Nzambi luvangamanga kaka kun’ezulu, kadi i kwakuna Mwan’a Nzambi kanwanina vita yo Satana kumosi y’awana bekunyikamanga ye wabaveta ova ntoto. (Lusengomono 12:9-12) E ndomba yayi ya tatu ya sambu ki’es’eto kumosi ye ndomba yantete ye yazole, yikutusadisanga mu sia e sungididi kieto muna luzolo lwa Nzambi ke mu luzolo lwa yeto kibeni ko. Luzolo lwa Nzambi i lwau lutwasanga nluta kwa vangwa yawonso. Kana nkutu Yesu wa muntu alunga wavova kwa S’andi vo: ‘Luzolo luame ke luau ko, oluaku kaka luavangama.’—Luka 22:42.

“O dia kweto kwa lumbu ya lumbu utuvana ko o unu.”

I bosi Yesu wasonga vo ke diambi kwandi ko mu samba mu kuma kia nsatu zeto za lumbu ke lumbu. Ovanga wo dikutusungamesanga vo Yave ‘ovananga kw’awonso o moyo, yo fulumwinu ye ma yawonso.’ (Mavangu 17:25) Nkand’a Nzambi usonganga vo yandi i se dianzodi ona olungisanga e nsatu za wan’andi. Nze se diambote, Yave kevananga mvutu za sambu ko yilenda twasa mfwilu kwa wan’andi.

“Utuyambulwila mfuka.”

Nga mfuka una yau kuna kwa Nzambi? Nga luloloko lwandi ovwidi o mfunu? O unu kiaki, ndonga ke bebakulanga ko nki i sumu yo lembi kwikila vo esumu diambu dia vonza kikilu. Kansi, Nkand’a Nzambi ulonganga vo esumu i tuku dia mpasi zeto zawonso, i diau mpe diatwasa lufwa kwa wantu. Wau vo mun’esumu twawutukila, tusumukanga ntangwa zayingi, muna kala ye vuvu kia moyo a mvu ya mvu, luloloko lwa Nzambi kaka tuvwanga o mfunu. (Roma 3:23; 5:12; 6:23) Tufiaulwiswanga vava tulongokanga muna Nkand’a Nzambi vo: “E Mfumu, wambote, wa ngyambulwidi.”—Nkunga 86:5.

“Utuvuluza muna mbi.”

Nga obakulanga una ovwididi lutaninu lwa Nzambi o mfunu? Ndonga ke bekwikilanga ko muna ‘ndiona wambi’ una vo i Satana. Kansi o Yesu walonga vo Satana una kikilu ye wanyikila nkutu vo ‘nyadi a nza yayi.’ (Yoane 12:31; 16:11) Satana oyivisanga e nza yayi ina muna wisa kiandi, ozolele mpe kutuyivisa kimana twafwasa e ngwizani eto yo Yave wa S’eto. (1 Petelo 5:8) Kansi o Yave osundidi Satana e nkuma, ye ozolele tanina awana Bekunzolanga.