4

 Ki Lika Mañi ze lu Swanela ku Lapelela?

KWA litapelo kaufela za Bakreste, tapelo ya Mulena ki yona ye kuta-kutelwanga hahulu. Ibe kuli ki niti kamba kutokwa, buñata bwa batu ha ba utwisisangi tapelo ya Jesu ye li mutala—ye bizwanga hape kuli Tapelo ya Mulena kamba ya Ndataa Luna. Zazi ni zazi, batu ba bañata ba bulelanga manzwi a mwa tapelo ye, ba sa nahani taluso luli ya manzwi a, mi mwendi hañata ba ezanga cwalo mwahalaa lizazi. Kono Jesu na si ka lela kuli batu ba bulelange manzwi a mwa tapelo ye ka nzila yeo. Lu ziba cwañi cwalo?

Jesu a si ka bulela kale za tapelo yeo, na bulezi kuli: ‘Ha mu lapela, mu si ke mwa bulela-bulela kamba ku kuta-kutela manzwi a swana.’ (Mateu 6:7) Kana Jesu na itwanisa isali yena ka ku toma manzwi a kuli a petiwe ni ku kuta-kutelwa? Kutokwa! Jesu na lu luta litaba ze lu swanela ku lapelela, mi na lu taluseza lika za butokwa ze lu swanela ku hupulanga ha lu lapela. Ha lu nyakisiseñi ka tokomelo za na bulezi. Tapelo yeo i fumaneha kwa Mateu 6:9-13.

“Ndataa luna ya kwa lihalimu, Libizo la hao a li be le li kenile.”

Jesu fo, na hupulisa balateleli ba hae kuli litapelo kaufela li swanela ku libiswa ku Ndatahe, yena Jehova. Kono kana mwa ziba libaka libizo la Mulimu ha li li la butokwa hahulu ni libaka ha li swanela ku keniswa?

Ku zwa feela kwa makalelo, libizo la Mulimu le li kenile, li sawanilwe. Satani sila sa Mulimu, u bizize Jehova kuli ki Mubusi ya li lihata, ya na ni buitati ili ya si na maata a ku busa pupo ya Hae. (Genese 3:1-6) Batu ba bañata ba swalisani ni Satani ka ku luta kuli Mulimu ha na taba ni batu, u situhu, mi u yolisanga misuha kamba kuli Mubupi ha yo. Ba bañwi mane ba lwanisize libizo la hae ka sibili, la Jehova, ili ku li zwisa mwa litoloko za Bibele ni ku hanisa batu ku itusisa lona.

Bibele i bonisa kuli Mulimu u ka lukisa mafosisa a kaufela. (Ezekiele 39:7) Ka ku eza cwalo, Mulimu u ka mi fa lika kaufela ze mu tokwa ni ku feza matata a mina kaufela. Kamukwaufi? Manzwi a tatama a mwa tapelo ya Jesu a fa kalabo.

“Ku tahe mubuso wa hao.”

Kacenu, ba bahulu ba likeleke ba luta lituto ze lwanisana ka za Mubuso wa Mulimu. Kono sina mo ne ba zibela bateelezi ba Jesu, bapolofita ba Mulimu ne ba polofitile kale kuli Mesia,  yena Mupulusi ya ketilwe ki Mulimu, u ka busa mwa Mubuso o ka tahisa licinceho fa lifasi. (Isaya 9:6, 7; Daniele 2:44) Mubuso wo u ka kenisa libizo la Mulimu ka ku patulula buhata bwa Satani mi cwale kihona u ka tanyela Satani ni misebezi ya hae kaufela. Mubuso wa Mulimu u ka felisa lindwa, matuku, lukupwe, mane ni lifu. (Samu 46:9; 72:12-16; Isaya 25:8; 33:24) Ha mu lapela kuli Mubuso wa Mulimu u tahe, mu kupa kuli lisepiso zeo kaufela li talelezwe.

“Se si latwa ki Wena si ezwe mwa lifasi, mo si ezezwa kwa lihalimu.”

Manzwi ao a Jesu a bonisa kuli tato ya Mulimu kaniti i ka eziwa fa lifasi sina mo i ezezwa kwa lihalimu, kona kwa pila Mulimu. Tato ya Mulimu ha i si ka tibelwa ku ezwa mwa lihalimu, ili mo Mwanaa Mulimu na lwanisize Satani ni bayemeli ba hae, ni ku ba nepela fa lifasi. (Sinulo 12:9-12) Ka ku swana ni kupo ya pili ni ya bubeli, kupo ya bulalu ye ya tapelo ye li mutala i lu tusa ku isa mamelelo kwa lika za butokwa hahulu, isi ka mo lu latela luna, kono ka mwa latela Mulimu. Kamita libupiwa li fumananga lika ze nde ka ku lata kwa hae. Mane Jesu, mutu ya petehile na bulelezi Ndatahe kuli: “Ku si ke kwa ezwa se si latwa ki na, ku ezwe se si latwa ki Wena.”—Luka 22:42.

“U lu fe kacenu buhobe bwa luna.”

Jesu hape na bulezi kuli lwa kona ku kupa lika za kwa mubili ze lu tokwa. Ha ku na se si fosahalile ku kupa Mulimu kuli a lu fe lika ze lu tokwa ka zazi ni zazi kuli lu ipabalele. Mane ku eza cwalo ku lu hupuza kuli Jehova ki “Yena ya fa ze pila kamukana bupilo, ni ku buyela, ni lika kaufela.” (Likezo 17:25) Bibele i patulula kuli Mulimu ki mushemi ya lilato ya tabela ku fa bana ba hae ze ba tokwa. Kono ka ku swana ni mushemi yo munde, Mulimu ha na ku fa bana ba hae lika ze si na tuso.

“U lu swalele milatu ya luna.”

Kana mu tokwa kuli Mulimu a mi swalele? Batu ba bañata kacenu ha ba sa utwisisa kuli sibi kiñi ni kuli ku eza sibi ki mulatu o mutuna. Kono Bibele i luta kuli sibi ki sona se si tahisa matata a luna kaufela, mi mane ki sona se si tahiseza batu lifu. Bakeñisa kuli lu pepezwi mwa sibi, hañata kaufela luna lwa ezanga sibi, mi sepo feela ya bupilo bwa luna bwa kwapili bwa ku ya ku ile i itingile fa ku swalelwa ki Mulimu. (Maroma 3:23; 5:12; 6:23) Kwa tabisa ku ziba kuli Bibele i bulela kuli: “Wena Muñaa Bupilo u na ni musa, mi wa lata ku swalela.”—Samu 86:5.

“U lu lamulele ku ya maswe.”

Kana mwa utwisisa kuli mu tokwa hahulu silelezo ya Mulimu kapili-pili? Batu ba bañata ba lumela kuli “ya maswe,” yena Satani ha yo. Kono Jesu na lutile kuli Satani u teñi luli, mane na mu bizize kuli ki “mulena wa lifasi le.” (Joani 12:31; 16:11) Satani u sinyize lifasi le la sweli ku busa, mane u tabela hahulu ku mi lyanganisa ni mina kuli mu si ke mwa ikeza silikani ni Ndataa mina, Jehova. (1 Pitrosi 5:8) Kono Jehova u na ni maata hahulu ku fita Satani mi u tabela ku sileleza batu ba ba mu lata.

Lisupo ze tuna ze lu nyakisisize ka bukuswani za mwa tapelo ya Jesu ye li mutala haki zona feela litaba ze lu kona ku lapelela. Mu hupule manzwi a kwa liñolo la 1 Joani 5:14 ka za Mulimu, a li: “Ha lu kupa nto ka ku lata kwa hae, wa lu utwa.” Kacwalo mu si ke mwa palelwa ku zibisa Mulimu matata a mina ka ku nahana kuli haki a butokwa hahulu.—1 Pitrosi 5:7.

Kono ki nako mañi ye mu swanela ku lapelanga, mi mu swanela ku lapelela mwa sibaka se si cwañi? Kono kana nako ni sibaka ko lu swanela ku lapelela ki za butokwa?