KYIʼJ kykyaqil qe naʼj Dios mas ojtzqiʼn kyuʼn xjal, mas ojtzqiʼn aju padrenuestro kyuʼn. Pero atzunju mas mintiʼ in nel kynikʼ xjal tiʼj. Tkyaqil qʼij in najbʼen naʼj Dios lu kyuʼn xjal ex in xi kyqʼamaʼn nim maj maske mintiʼ in nel kynikʼ tiʼj tiʼ t-xilen. Mintiʼ tqʼama Jesús tuʼn tbʼant jlu kyuʼn. ¿Tiquʼn qʼuqli qkʼuʼj tiʼj jlu?

Tuʼnju ax Jesús qʼamante jlu: «Ok kynaʼne Dios, miʼn txi kymaʼne elaʼ maj axju yol» (Mateo 6:7). Mintiʼtoq ttxolil tyol Jesús noqwit tqʼama tuʼn kykyaj qe yol toj qwiʼ ex tuʼn t-xi qqʼamaʼn nimku maj. Sino tajtoq Jesús tuʼn ttzaj t-xnaqʼtzaʼn alkyeqe tiʼchaq mas nim kyoklen tuʼn t-xi qqanin toj qnaʼj Dios. Tuʼntzunju, qo xnaqʼtzan mas tiʼj naʼj Dios lu, aju in kanet quʼn toj Mateo 6:​9 a 13.

Xi tnaʼn Jesús kye t-xnaqʼtzbʼen qa iltoq tiʼj tuʼn kynaʼn Dios te Jehová, aju Ttat. Pero ¿tiquʼn tqʼama qa il tiʼj tuʼn tok tbʼi Tman te xjan?

Tuʼnju atxix tej ttzaj tzyet twitz Txʼotxʼ, o bʼaj kytzʼilsaʼn xjal tbʼi Dios. In tzaj tqʼamaʼn Satanás qa in yolin Jehová tiʼj nya ax tok yol, qa oʼkx in ximen tiʼjx ex qa mintiʼ toklen tuʼn tkawin (Génesis 3:​1-6). Aqeju xjal in che ok lepeʼ tiʼj Satanás, in tzaj kyqʼamaʼn qa mintiʼ in ximen Dios qiʼj, qa nya bʼaʼn tmod, qa in kubʼ tqʼoʼn qkastiw, ex aju mas bʼisbʼajil, in tzaj kyqʼamaʼn qa nya a o kubʼ bʼinchante tkyaqil qe tiʼchaq. Axpe ikx, ateʼ junjun o jatz kyiʼn tbʼi Dios toj Biblia ex o tzʼel kyiʼn ambʼil tuʼn tajbʼen kyuʼn xjal.

Noqtzun tuʼnj, o tzaj ttziyen Dios tuʼn tbʼaj tsaqsaʼn tbʼi (Ezequiel 39:7). Ex aj tbʼant jlu tuʼn, ax ikx kʼelel tiʼn aju nya bʼaʼn in tzaj kyiʼj xjal. ¿Tzeʼn kbʼantel jlu tuʼn? Atzunju jlu kʼelel qnikʼ tiʼj jaʼlo.

Toj ambʼil jaʼlo, junxitl kyximbʼetz nejenel kye okslabʼil at tiʼj Tkawbʼil Dios. Nya ax jlu bʼaj toj ambʼil tej tten Jesús. Ya ojtzqiʼntoq qe profecía kyuʼn aj Judiy, aqeju in che yolin tiʼj jun Mesías, aju kʼokel te aj kawil (Isaías 9:​6, 7; Daniel 2:44). Noq tuʼn tkawbʼil, kjawil nimset tbʼi Jehová ex kʼelel toj qʼanchaʼl qa nya ax tok yol tqʼama Satanás, ex kbʼel tnajsaʼn tkyaqil nya bʼaʼn in bʼant tuʼn. Kyxol qe jlu, kʼelel tiʼn qʼoj, yabʼil, waʼyij ex kyimen (Salmo 46:9; 72:​12-16; Isaías 25:8; 33:24). Aj t-xi qqanin tuʼn tul Tkawbʼil Dios, in xi qqanin tuʼn kyjapun kywiʼ yol lu.

In tzaj kyyekʼin yol lu qa kjapunel twi t-ximbʼetz Dios tzalu twitz Txʼotxʼ ik tzeʼn bʼant tuʼn toj kyaʼj tej tetz tlajoʼn Jesús Tajaw il kyukʼil onil te, ex tej kykutz xoʼn tzalu twitz Txʼotxʼ (Apocalipsis 12:​9-12). Aju txol yol lu, ik tzeʼn qeju kabʼe moqa yolin kyiʼj, in tzaj kyyekʼin qa nim toklen tuʼn qximen tiʼjju tajbʼil Dios ex nya tiʼjju qex qajbʼil. Ex qa ma bʼant tajbʼil Jehová, kʼonil kyiʼj kykyaqil xjal. Axpe ikx tqʼama Jesús jlu maske tzʼaqlitoq: «Kuchiwt miʼn bʼant aju weye wajbʼil, oʼkx aju teya tajbʼila» (Lucas 22:42).

Ax ikx, tqʼama Jesús qa jaku txi qqanin junjuntl tiʼchaq te Jehová. Ik tzeʼn in nel qnikʼ tiʼj, toj tumel qa ma txi qqanin te Jehová tuʼn ttzaj tqʼoʼn qe tiʼchaq at tajbʼen qe junjun qʼij. Aj tbʼant jlu quʼn, in nel qnikʼ tiʼj qa a Jehová «in qʼonte qchwinqlal ex qxew [...] ex tkyaqilju» at tajbʼen qe (Hechos 17:25). In nok tmojbʼaʼn Xjan Uʼj Jehová tukʼil jun mambʼaj at tkʼujlabʼil kyiʼj tkʼwal, aju in xi tqʼoʼn tkyaqilju at tajbʼen kye. Noqtzun tuʼnj, mlay txi tqʼoʼn mambʼaj kykyaqil qe tiʼchaq kye tkʼwal tuʼnju ateʼ junjun jaku tzaj tiʼn nya bʼaʼn kyiʼj.

¿Tiʼtzun qkʼas at twitz Jehová? ¿Tiquʼn qaj tuʼn tkubʼ tnajsaʼn qil? Ateʼ nim xjal in nel kyiʼn tipumal il, pero atzun jlu o tzaj qʼinte nim nya bʼaʼn qiʼj, kyxol jlu, at kamik. Ex tuʼnju aj il qoʼ, nim maj in qo el txalpaj ex tuʼn jlu in tzaj tbʼis Dios. Tuʼn jlu in nel qnikʼ tiʼj qa nim toklen tuʼn tkubʼ tnajsaʼn Dios qil tuʼntzun qanqʼin te jumajx (Romanos 3:23; 5:12; 6:23). Ax ikx, in tzaj tqʼamaʼn Tyol Dios qa tbʼanel te Jehová tmod ex taj tuʼn tkubʼ tnajsaʼn qil (Salmo 86:5).

Qaj tuʼn t-xqʼuqin Dios qiʼj ex tuʼn tkolin qiʼj. Bʼalo ateʼ junjun xjal in kubʼ kyximen qa nya ax tok at Satanás. Pero tqʼama Jesús qa ax tok at ex ok tqʼoʼn tbʼi te «nejenel at twitz txʼotxʼ» (Juan 12:31; 16:11). Mintiʼ in qeʼ tkʼuʼj Satanás tuʼn tkubʼ tbʼinchaʼn nim nya bʼaʼn twitz Txʼotxʼ, sino ax ikx in nok tilil tuʼn tuʼn qok lepeʼ tiʼj tuʼntzun miʼn tten jun tbʼanel qamiwbʼil tukʼil Jehová (1 Pedro 5:8). Pero mintiʼ tuʼn qtzaj xobʼ twitz Satanás tuʼnju mas nim tipumal Jehová at twitz ex taj tuʼn tkolin kyiʼj tmajen.

Noqtzun tuʼnj, ax ikx jaku qo naʼn Dios kyiʼj junjuntl tiʼchaq, tuʼnju in tzaj tqʼamaʼn 1 Juan 5:14 jlu: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn». Toj juntl yol, jaku txi qqʼamaʼn te Dios tkyaqilju in bʼaj qkʼuʼj tiʼj ex mlay kubʼ t-ximen qa mintiʼ kyoklen tiʼchaq in xi qqanin te (1 Pedro 5:7).

¿In tzajpe tqʼamaʼn Xjan Uʼj toj alkye ambʼil qo naʼl Dios ex jatumel? Kxel qqʼoʼn tzaqʼwebʼil tiʼj xjel lu toj juntl xnaqʼtzbʼil.