IPEPO lino Yesu wasambilizye, insita zimwi likaamwa ukuti Ipepo Lya Mwene nanti lyakwe Tata witu, ali pepo lino aina Klistu yakapepa sana. Antu aingi yamanya ivya ufi api pepo lii. Antu aingi sana yakaswilizya mazwi yaa cila wanda, ilingi umu nsita ya kasanya. Lelo vivyo asi ali vino Yesu walondanga ukuti ipepo lyaya. Twamanya uli?

Lino Yesu atatala walanda ipepo lilyo, walanzile ati: “Lino ukupepa utaaswilizya kulanda ivili vimwi.” (Mateo 6:7) Uzye Yesu waipilike lino walanzile amazwi yano umuntu angasungila uku mutwe nu kuyaswilizya pa kupepa? Awe! Lelo Yesu watusambilizyanga vino tungapepelapo, nupya watunenanga ivintu vino tulinzile ukukolezya lino tukupepa. Lekini tulande sana pali vino walanzile. Ipepo lii lyalembwa pali Mateo 6:9-13.

Fwandi Yesu wiusyanga alondezi yakwe ukuti mapepo yonsi yalinzile ukuya kuli Isi, Yeova. Nomba uzye mwamanya umulandu uno izina lyakwe Leza lyacindamila sana nu mulandu uno lilinzile ukucindikilwa nanti ukuya ilya muzilo?

Ukufuma pano antu yaumbiilwe, izina lyakwe Leza ilya muzilo lyasaalulwa. Satana umulwani wakwe Leza, walanda ukuti Yeova uwa ufi, a kateeka uwaya na ukaitemwe, ataalinga ukuteeka iviumbwa vyakwe. (Utandiko 3:1-6) Aingi yakazumilizya vino Satana walanda, yakasambilizya ukuti Leza u munkalwe, ataya nu kutemwa, akacuzya antu nupya yasizumila ukuti akaumba. Yauze yene yapata sile ni zina lyakwe, yafumya izina lyakuti Yeova mu Mabaibo nu kulesya antu ukuliomvya.

Baibo ikalanda ukuti Leza alaumyapo ulufyengo luu lonsi. (Ezekelo 39:7) Lino alacita vivyo alamupeela vyonsi vino mukalondekwa alino nu kufumyapo intazi. Alacita uli vivyo? Amazwi alondelelapo umwi pepo lino Yesu wasambilizye yakaasuka iuzyo lii.

Ndakai, kwaya sana icimvulunganya pali vino amu mipepele yakasambilizya pa Wene wakwe Leza. Nomba wakwe vino akutikanga kuli Yesu yamanyile, ya kasesema yakwe Leza yasowile mpiti ukuti Mesiya, Kapususya uwasoololwa na Leza wali nu kuteeka umu Wene uwali nu kusenula ivintu umu nsi. (Ezaya 9:6, 7; Danieli 2:44) Uwene uwo ulacindika izina lyakwe Leza lino ulasokolola ufi wakwe Satana alino nu kumonona kumwi ni vicitwa vyakwe vyonsi. Uwene wakwe Leza ulafumyapo inkondo, kulwala, icipowe kumwi sile ni imfwa. (Masamu 46:9; 72:12-16; Ezaya 25:8; 33:24) Fwandi nga mukupepela uwene wakwe Leza ukwiza, ala mukupepa ukuti malayo yakwe yonsi yace yafikiliziwe.

Amazwi yakwe Yesu yakalangilila ukuti ukulonda kwakwe Leza kulacitika pano nsi wakwe vino kukacitika umwi yulu muno Leza akaikala. Ukulonda kwakwe Leza kukacitika umwi yulu; Umwana wakwe Leza walwile na Satana ni viwa vyakwe nu kuvisumbila pano nsi. (Kusokolola 12:9-12) Ukulenga kuu ukucindame ukwaya umwi pepo lyakwe Yesu, kwakolana na kuno itulandapo, kukatwazwa ukwika mano ku vintu ivicindamisye asi sile ukwika amano kuli vino tukulonda, lelo ku kulonda kwakwe Leza. Ukulonda kwakwe Leza ukukalenga ukuti lyonsi ivintu vyazipila iviumbwa vyonsi. Acino na Yesu kwene uwali umuntu mumalilike waneniile Isi ati: ‘Asi ukulingana nu kulonda kwane suka ukulonda kwako akuno kucitike.’​—Luka 22:42.

Yesu walangilile ukuti tungapepela na pali vino tukulondekwa. Citaipa ukupepa kuli Leza ukuti atupeele vino tukalondekwa cila wanda. Nupya ukucita vivyo kukatwiusya kuti Yeova aliwe “akapeela antu yonsi umi nu muza alino ni vintu vyonsi.” (Milimo 17:25) Baibo ikamulondolola ukuti u muvyazi uwaya nu kutemwa, aakaitemelwa ukupeela ana yakwe vino yakulondekwa. Lelo waya wa muvyazi musuma, aasipeela ana vino yakulenga ivitanga viyazwe.

Uzye ica cumi mwakwata uluyembu kuli Leza? Uzye mukalondekwa ukuti amweleele? Antu aingi ndakai yatamanya uluyembu vino lwaya nupya yatamanya ukuti lwaipa sana. Nomba Baibo ikasambilizya ukuti uluyembu u lukalenga twacula sana, pano ulukalenga antu yafwa. Pa mulandu wakuti twavyalwa nu luyembu, swensi kwene tukayembuka imiku iingi, nupya pakuti tukaye nu umi wa pe, suka sile Leza watwelela. (Loma 3:23; 5:12; 6:23) Cikatukomelezya sana ukumanya vino Baibo ikalanda ukuti: ‘We Yeova, wemo wewe musuma, nupya ukaeleela uluse.’​—Masamu 86:5.

Uzye mwamanya ukuti mukalondekwa sana ukucingililwa na Leza? Aingi yakalanda ukuti umwipe, kuli kuti Satana, atayako. Nomba Yesu wasambilizye ukuti Satana akuno waya, nupya wamwamile nu kuti a “kateeka wa nsi yii.” (Yoani 12:31; 16:11) Satana onona insi yii ino akatungulula, avino akalondesya ukumonona namwe kwene pakuti mutatwalilila ukuya ya cuza yakwe Yeova, Tata winu. (1 Petulo 5:8) Nomba Yeova wakwata sana maka ukucila Satana nupya akalondesya ukucingilila yonsi amutemwa.

Ipepo kwene lii ilipi umwaya ivintu ivicindame lino Yesu wasambilizye, lisilanda pali vyonsi vino tungapepelapo. Iusyini ukuti 1 Yoani 5:14 ikatunena pali Leza ukuti: “Consi cino twamulenga icikuvwana nu kulonda kwakwe, akatuvwa.” Fwandi mutasakamala ukuti intazi zino mukweti i zinono sana zino mungapepelapo kuli Leza.​—1 Petulo 5:7.

Nga pa nsita ni cifulo? Uzye navyo vyacindama pa kupepa?