Мо нерген кумалаш кӱлеш?
ШУКО еҥ «Отче наш» манме Иисусын кумалтыш мутшым пала. Христиан-влак коклаште тиде кумалтыш мут эн палыме. Туге гынат шукышт тиде кумалтыш мутым йоҥылыш умылат. Миллионло еҥ тудым сайын пала да кажне кечын, а можыч, кечеш икмыняр гана тудым ойла. Но еҥ-влак тиде кумалтыш мутым уэш-пачаш ойлышт манын, Иисусын кумылжо лийын огыл. Кушеч ме тидым палена?
Тиде кумалтыш мутым ойлымо деч ончыч Иисус каласен: «Кумалмыда годым... уэш-пачаш иктымак ида ойло» (Матфейын 6:7, УТ). Тиде кумалтыш мутым тунемаш да уэш-пачаш ойлаш кӱлеш ыле гын, Иисус «иктымак ида ойло» манын каласа ыле мо? Конешне, уке! Иисус тиде кумалтыш мут гоч ончыктынеже ыле, мо нерген кумалаш кӱлеш. Айста тиде кумалтыш мутым ончен лектына. Тудым Матфейын 6:9—13 возымо.
«Пылпомышто улшо мемнан Ачана! Тыйын святой лӱмет мокталтше».
Иисус шке тунемшыж-влаклан шарныктен: чыла кумалше-влак тудын Ачажлан, Иеговалан, кумалшаш улыт. А те паледа, молан Юмын лӱмжӧ тынар чот кӱлешан да молан тудо моктымо лийшаш?
Айдеме тукым историйын тӱҥалтыштыжак Юмын святой лӱмжӧ амыртыме лийын. Сатана, Юмын тушманже, каласен, пуйто Иегова шояче да шке нерген гына шонышо вуйлатыше да пуйто тудын вуйлаташ праваже уке (Тӱҥалтыш 3:1—6). Шукышт Сатанан могырыш шогалыныт. Кушеч тиде коеш? Иктышт Юмым торжалан да ӱчым шуктышылан шотлат. Весышт Юмо уке манын ойлат. А южышт, Юмын Иегова лӱмжӧ ваштареш шогалын, тиде лӱмым Библийын кусарымаш-влак гыч кораҥденыт да тудым кучылташ чареныт.
Библийыште возымо почеш Юмо чыла тиде чын огыл ыштымым кораҥда (Иезекииль 39:7). Тидым ыштен, тудо чыла кӱлешлыкнам ситара да чыла проблемына-влакым пытара. Кузе Юмо тидым ышта? Вашмутым тиде кумалтыш мутын вес шомакше гыч пален налына.
«Тыйын Кугыжанышет толжо».
Таче религиозный туныктышо-влак тӱрлӧ семын шонат, мо тыгай Юмын Кугыжаныш. Но Иисусым колыштшо-влак паленыт: Юмын пророкшо-влакын ончылгоч каласымашышт дене келшышын, Мессий, Юмын ойырен налме Утарыше, Кугыжанышым вуйлаташ тӱҥалеш, кудыжо тӱням тӱрыснек вашталта (Исайя 9:6, 7; Даниил 2:44). Тиде Кугыжаныш Сатанан шояклымыжым тӱжвак лукмыж дене Юмын лӱмжым чапландара, тыгак тиде тушманым да тудын пашажым пытара. Юмын Кугыжаныш сарлан, черлан, шужымашлан да колымашланат мучашым пышта (Псалом 45:10; 71:12—16; Исайя 25:8; 33:24). Юмын Кугыжанышын толмыжо нерген кумалын, те чыла нине сӧрымаш-влакын шукталтмышт нерген кумалыда.
«Тыйын эрыкет мланде ӱмбалнат пылпомышсо гаяк лийже».
Иисусын мутшым шотыш налын, раш ужына: Юмын эрыкше каваште (кушто Юмо ила) шукталтме семынак мландыштат шукталтшаш. Каваште Юмын эрыкшын шукталтмыжлан нимо мешаен кертын огыл: тушто Юмын Эргыже Сатана ден суксыж-влак дене кредалын да нуным мландышке сӱмырал шуэн (Почмаш 12:9—12). Тиде Иисусын кумалтыш мутын кумшо йодмашыже. Тудо первый кок йодмашыже семынак икымше верыш шкенан огыл, а Юмын эрыкшым шындаш мемнам тарата. Юмын эрыкшын шукталтмыже уло тӱнялан эре суапландарымашым конда, сандене Иисусат, сулыкдымо айдеме, Ачажлан каласен: «Тек Мыйын шонымо семын огыл, а Тыйын эрыкет семын лиеш» (Лукан 22:42).
«Киндым, тачылыкым, мыланна пу».
Тыгак Иисусын туныктымыжо почеш ме шкенан кӱлешлыкна нергенат кумалын кертына. Кажне кечысе паша ден тургыжланымашна нерген кумалаш уда огыл. Тыгай кумалтыш мут-влак мыланна шарныктат: Иегова «чылалан илышым, шӱлышым да молымат пуа» (Апост. пашашт 17:25). Библий Юмым йӧратыше ача семын сӱретла. Тудо шке йочаж-влаклан илышлан мо кӱлешым уло кумылын пуа. Но йодмашышт нунылан эҥгекым конден кертеш гын, тудо сай ача семын нунын йодмыштым шукташ огеш тӱҥал.
«Мемнан языкнамат кудалте».
Мыланна Юмын проститлымашыже кӱлеш мо? Таче шукышт огыт умыло, мо тыгай язык да мыняр чот уда тудын лектышыже. Но Библий дене келшышын, язык — тиде чыла нелылыкнан эн тӱҥ амалже, да тудлан кӧра еҥ-влак колат. Ме чыланат языкан шочына, сандене чӱчкыдын йоҥылышым ыштена. Курымашлык ончыкылыклан ӱшаным мыланна Юмын проститлымашыже гына пуа (Римлян-влаклан 3:23; 5:12; 6:23). Тиде шотышто Библийыште тыгай лыпландарыше шонымашым возымо: «О Иегова, тый поро да проститлаш ямде улат»! (Псалом 86:5, УТ).
«Осал дечын мемнам утаре».
Мыланна Юмын аралымашыже чот кӱлеш. Те тидын дене келшеда мо? Шукыштын Осалын, Сатанан, улмыжлан ӱшанымышт ок шу. Но Иисусын ойлымыжо почеш Сатана чынжымак уло да тудо тиде тӱнян тӧраже улеш (Иоаннын 12:31; 16:11). Сатана тиде тӱняште еҥ-влакым пужаш да тыланда Иегова Юмо деке лишеммаште чаракым шындаш тырша (1 Петрын 5:8). Но Иегова Сатана деч ятырлан виян да тудым йӧратыше-влакым уло кумылын арала.
Ме Иисусын кумалтыш мутым кӱчыкын ончен лектынна. Но тидын нерген гына огыл кумалын кертына. 1 Иоаннын 5:14 почеламутышто Юмо нерген возымым шарныза. Тушто ойлалтеш: «Тудын эрыкше почеш кунам ме иктаж-мом йодына, Юмо мемнам колеш». Сандене ида шоно, пуйто проблемыда кугу огыл гын, нунын нерген Юмылан ойлаш огеш кӱл (1 Петрын 5:7).
А кунам да кушто кумалаш кӱлеш?
Вас также может заинтересовать
ОРОЛ БАШНЕ
Кунам да кушто кумалаш кӱлеш?
Кумалаш иктаж могай посна верыште да жапыште гына лиеш мо? Библийысе вашмутым пален налза.
ТӰҤ БИБЛИЙЫСЕ ТУНЫКТЫМАШ-ВЛАК
Мо тыгай Юмын Кугыжаныш?
Калыкым туныктымыж годым Иисус Христос эн шукыжо Юмын Кугыжаныш нерген ойлен. Курымла мучко тудын почеш кайыше-влак тиде Кугыжанышын толмыж нерген кумалыт.