MIAKEJ maseualmej katli kiijtouaj kineltokaj Cristo, kiixmatij nopa padrenuestro. Maske kimatij uan mojmostla kiompauiaj, amo kikuamachiliaj. Jesús amo kinekiyaya kiampa ma tijchiuakaj. ¿Kenke kiampa tikijtouaj?

Pampa kema nechka momaijtoskia, ya kiijtok: “Uan kema inmomaijtouaj ika toTeko Dios, amo xijchiuakaj keja tlakamej tlen axkiixmatij toTeko. Yajuantij san kiompauiaj miak uelta se tlajtoli” (Mateo 6:⁠7). Uajka, Jesús amo kinekiyaya san ma tijtsontekontlalikaj nopa tlamaijtoli yon ma tikompauikaj mojmostla. Ya kinekiyaya techmachtis tlake tlamantli tlen tlauel ipati ueliskia titlajtlanisej. Ma tikitakaj tlake techmachtia nopa tlamaijtoli tlen eltok ipan Mateo 6:​9-13.

Ika ni tlajtoli Jesús kinmachtik itokilijkauaj monekiyaya kinojnotsasej san toTeotsij Jehová kema momaijtoskiaj. ¿Kenke kiijtoua teipa ma kiueyichiuakaj itoka?

Pampa uejkajkia ipa kiistlakauiyayaj toTeotsij itoka. Satanás kiijtoua Jehová san istlakati, amo kineki techpaleuis uan amo kinamiki tlanauatis (Génesis 3:​1-6). Katli kitokiliaj Satanás kiijtouaj toTeotsij amo kiyolkokoua kema titlaijiyouiaj, tetlatsakuiltia, momakuepa uan amo ya kichijchijki nochi tlen onka. Miakej kiixpolojtokej itoka ipan Biblia uan amo kinkauiliaj maseualmej ma kitekiuikaj.

Biblia kiijtoua toTeotsij kintsontlamiltis nochi katli kiampa kichiuaj (Ezequiel 39:⁠7). Uan nojkia kichiuas kuali ma itstokaj maseualmej. ¿Kenijkatsa kichiuas? Jesús kiijtok kenijkatsa.

Ipan ni tonali katli tlayakanaj ipan religión amo kuali kikuamachiliaj tlake kiijtosneki toTeotsij iTlanauatijkayo. Kema Jesús itstoya amo kiampa panoyaya pampa judeaeuanij kuali kimatiyayaj ipan se keski tlajtolpanextili kiijtouayaya nopa Mesías kinmakixtiskia, uan kema tlanauatiskia kitlamiltiskia nochi tlen amo kuali (Isaías 9:​6, 7; Daniel 2:44). Ika nopa tlanauatijkayotl Jesús kiueyichiuas Jehová itoka, kinextis Satanás san tlakajkayaua, ayokmo kikauas ma tlanauati uan kitlamiltis nochi tlen kichijtok. Ayokmo onkas uejueyi tlauilankayotl, kokolistli, mayantli yon mikilistli (Salmo 46:9; 72:​12-16; Isaías 25:8; 33:24). Uajka kema tikiljuiaj Jehová ma tlanauatiki, tikiljuiaj ma kichiua nochi tlen kitenkajtok.

Nopa tlajtoli kinextia nelia mochiuas tlen toTeotsij mosentlalijtok kichiuas ipan Tlaltipaktli sanse kej mochijtok ipan iluikak. Ya kitekiuik Jesús uan kiampa kikixtik tlen iluikak Satanás uan iajakauaj uan kinmajkajki ipan Tlaltipaktli (Apocalipsis 12:​9-12). Ni eyi tlamantli tlen Jesús kiijtok kema momaijtok techilnamikilia moneki timosentlalisej ipan tlen Jehová kipaktia uan amo ipan tlen tojuantij techpaktia. Kema mochiua toTeotsij ipakilis tlauel techpaleuia uan amo kema mochiua tlen sekinok kinekij. Maske Jesús amo eliyaya tlajtlakole, kiijtok: “Amo xijchiua tlen na nijneki, san xijchiua tlen ta mopakilis” (Lucas 22:42).

Jesús kiijtok nojkia uelis titlajtlanisej tlen techpoloua. Uajka amo kenijki tlaj tijtlajtlaniaj toTeotsij tlen ika timopanoltisej. Kema kiampa tijchiuaj, tijnextiaj toTeotsij “kichiua para nochi tlen titlaijiyotilanaj ma titlaijiyotilanakaj” (Hechos 17:25). Biblia kiijtoua toTeotsij eli kej se tetaj katli kinmaka ikoneuaj nochi tlen kinpoloua, uan amo kema kinmakas se tlamantli tlen kintlanauis.

¿Nelnelia tikixpanotokej toTeotsij? ¿Kenke moneki techtlapojpoljuis? Maske ipan ni tonali miakej maseualmej kiijtouaj amo titlajtlakolejkej uan amo ya nopa kichiua ma titlaijiyouikaj, Biblia kiijtoua tojuantij titlaijiyouiaj uan timikij pampa titlajtlakolejkej. Kema titlakatij, ya tijpiaj tlajtlakoli, yeka tikixpanoj toTeotsij. Uajka, tlaj tijnekij tijpiasej nopa nemilistli tlen axkema tlamis, moneki tijchiuasej kampeka ma techtlapojpoljui toTeotsij (Romanos 3:23; 5:12; 6:23). Biblia nojkia techiljuia toTeotsij kipia kuali iyolo uan kineki techtlapojpoljuis (Salmo 86:⁠5).

Nochi tijnekij kuali ma techmokuitlaui toTeotsij. Maske miakej maseualmej moiljuiaj amo itstok Satanás, Jesús kiijtok nelnelia itstok, eli “tlen tlanauatia ipan ni Tlaltipaktli” (Juan 12:31; 16:11). Satanás amo san kichiua sekinok amo kuali ma monejnemiltikaj, nojkia kiampa kichiua ika katli kitekipanouaj toTeotsij pampa kineki ayokmo kuali ma mouikakaj iuaya (1 Pedro 5:⁠8). Uan maske kiampa kichiua, amo kinamiki timajmauisej pampa toTeotsij kipia miak chikaualistli uan ya nochipa kinpaleuis katli kiikneliaj.

Onka miak tlamantli tlen uelis tikiljuisej Jehová kema timomaijtosej. Ipan 1 Juan 5:14 kiijtoua uelis titlajtlanisej sekinok tlamantli. Nopaya kiijtoua: “Intla tijtlajtlaniaj toTeko tlen kinamiki ika tlen yajaya kineki, yajaya techtlakakilia”. Nochipa ma tikiljuikaj toTeotsij tlen techtekipachoua, uan ya techtlakakilis maske timoiljuiaj amo tlauel ipati tlen tikiljuiaj (1 Pedro 5:⁠7).

¿Kema uan kanke uelis timomaijtosej? ¿Biblia kiijtoua tlake uelis tijchiuasej? Ni tijnankilisej ipan nopa seyok tlamachtili.