E BE e dutše e bitšwa thapelo e rapetšwego gantši ke Bakriste. Go sa šetšwe gore seo ke therešo goba go se bjalo, thapelo ya Jesu ya mohlala—yeo ka nako e nngwe e bitšwago Thapelo ya Morena goba Tatawešo—ka ntle le pelaelo e gare ga dithapelo tšeo di sa kwešišwego. Batho ba dimilione ba bolela mantšu a yona ka ge a le bjalo letšatši le lengwe le le lengwe, mohlomongwe gantši ka letšatši. Eupša Jesu o be a se a rera gore thapelo ye e dirišwe ka tsela yeo. Re tseba bjang?

Pele ga ge Jesu a ka bolela thapelo yeo, o itše: “Ge o rapela, o se ke wa boa-boetša dilo tše di swanago.” (Mateo 6:7) Na Jesu o ile a ikganetša ka go bolela mantšu ao a swanetšego go swarwa ka hlogo le go boa-boetšwa? Ga go bjalo le gatee! Go e na le moo, Jesu o be a re ruta seo re swanetšego go se rapelela, le gona o be a re nea lelokelelo la dilo tšeo di tlago pele tšeo re swanetšego go di gopola ge re rapela. A re hlahlobeng seo a se boletšego. Thapelo ye e tšwelela go Mateo 6:9-13.

Ka baka leo, Jesu o gopoditše balatedi ba gagwe gore dithapelo ka moka di swanetše go lebišwa go Tate, Jehofa. Eupša na o tseba gore ke ka baka la’ng leina la Modimo le le bohlokwa le gore ke ka baka la’ng le swanetše go kgethagatšwa?

Go tloga mathomong a histori ya motho, leina la Modimo le lekgethwa le ile la pharwa ka maaka. Sathane, lenaba la Modimo, o biditše Jehofa gore ke Mmuši wa maaka le yo a nago le boithati yoo a se nago tshwanelo ya go buša tlholo ya Gagwe. (Genesi 3:1-6) Ba bantši ba thekga Sathane, ba ruta gore Modimo ga a borutho, ke yo kgopo le yo a itefeletšago goba ba gana gore ke Mmopi. Ba bangwe ba bile ba hlasetše leina la gagwe ka bolona, ba tloša leina Jehofa ka diphetolelong tša Beibele gomme ba gana ge le dirišwa.

Beibele e bontšha gore Modimo o tla lokiša boemo bjo bja go hloka toka. (Hesekiele 39:7) Ka go dira bjalo, o tla go nea dilo ka moka tšeo o di nyakago le go rarolla mathata ka moka. Bjang? Mantšu a latelago thapelong ya Jesu a tla nea karabo.

Lehono, go na le kgakanego e kgolo gare ga barutiši ba bodumedi mabapi le Mmušo wa Modimo. Eupša ka ge balatedi ba Jesu ba tseba, baporofeta ba Modimo ba boletše e sa le pele gore Mesia, Mophološi yo a kgethilwego ke Modimo, o tla buša Mmušong woo o tlago  go fetoša lefase. (Jesaya 9:6, 7; Daniele 2:44) O tla kgethagatša leina la Modimo ka go pepentšha maaka a Sathane gomme wa fediša Sathane le mediro ya gagwe ka moka. Mmušo wa Modimo o tla fediša ntwa, bolwetši le tlala—gaešita le lehu ka bolona. (Psalme 46:9; 72:12-16; Jesaya 25:8; 33:24) Ge o rapelela gore Mmušo wa Modimo o tle, o rapelela gore dikholofetšo tšeo ka moka di phethagale.

Mantšu a Jesu a šišinya gore thato ya Modimo e tla direga mo lefaseng go fo swana le ge e direga legodimong, moo Modimo a dulago gona. Thato ya Modimo ga se ya ka ya thibelwa legodimong; moo, Morwa wa Modimo o ile a lwa le Sathane le madira a gagwe, a ba lahlela lefaseng. (Kutollo 12:9-12) Kgopelo ye ya boraro thapelong ya mohlala, go swana le tše pedi tša pele, e re thuša go dula re lebišitše tlhokomelo dilong tše bohlokwa kudu—go dira thato ya Modimo e sego ya rena. Ke thato ya gagwe yeo ka mehla e tla tlišetšago dibopša tša gagwe dilo tše dibotse. Ke ka baka leo, gaešita le motho yo a phethagetšego Jesu a boditšego Tatagwe gore: “Go se phethege thato ya-ka eupša go phethege ya gago.”—Luka 22:42.

Se se latelago Jesu o bontšhitše gore re ka rapelela le dinyakwa tša rena. Ga se phošo ge re rapela Modimo mabapi le dinyakwa tša rena tša letšatši le letšatši. Ge e le gabotse, go dira bjalo go re gopotša gore Jehofa o “nea batho ka moka bophelo le mohemo le dilo ka moka.” (Ditiro 17:25) Beibele e utolla gore ke motswadi yo lerato yo a thabelago go nea bana ba gagwe seo ba se nyakago. Lega go le bjalo, go swana le motswadi yo a lokilego, a ka se ke a nea bana ba gagwe dilo tšeo di ka se ba holego.

Na ruri o kolota Modimo? Na o nyaka gore a go lebalele? Ba bantši lehono ba lahlegetšwe ke kwešišo ya gore sebe ke eng le bogolo bja sona. Eupša Beibele e ruta gore sebe ke modu wa mathata a rena a magolo, ka ge e le sebaki se segolo sa lehu la batho. Ka ge re belegetšwe sebeng, re dira dibe gantši, gomme kholofelo ya rena e nnoši ya bokamoso bjo bo sa felego e ithekgile ka go lebalelwa dibe ke Modimo. (Baroma 3:23; 5:12; 6:23) Ke mo go imollago go ithuta gore Beibele e re: “Wene Morêna O yo botho, O molebaledi.”—Psalme 86:5.

Na o lemoga gore go akgofile gakaakang gore o hwetše tšhireletšo ya Modimo? Batho ba bantši ba gana go dumela gore “yo kgopo,” e lego Sathane, o gona e le ka kgonthe. Eupša Jesu o rutile gore Sathane ke wa kgonthe, a ba a mmitša “mmuši wa lefase le.” (Johane 12:31; 16:11) Sathane o sentše lefase le leo a le laolago gomme o fišegela go senya le wena, go go šitiša gore o se be le tswalano ya kgaufsi le Tatago, Jehofa. (1 Petro 5:8) Lega go le bjalo, Jehofa o feta Sathane kgole ka matla e bile o thabela go šireletša bao ba Mo ratago.

Kakaretšo ye ya dintlha tše dikgolo tša thapelo ya Jesu ya mohlala ga e akaretše ditaba ka moka tšeo re ka di rapelelago. Gopola, 1 Johane 5:14 e re botša mabapi le Modimo gore: “Go sa šetšwe seo re se kgopelago go ya ka thato ya gagwe, o a re kwa.” O se ke wa nagana gore mathata a gago ke a manyenyane kudu gore o ka a botša Modimo ka thapelo.—1 Petro 5:7.

Lega go le bjalo, go thwe’ng ka nako le lefelo? Na go na le taba gore re rapela neng, gona kae?