OKUSHABA kw’eky’okureeberaho nikwo kushaba oku abarikweyeta Abakristaayo barikukira kugarukagarukamu. Okushaba kwa Yesu okurikukira kwetwa Okushaba kwa Mukama Waitu nari eshaara ya Tataitwe, buzima ni kimwe aha bintu ebi abantu barikwetegyereza kubi. Abantu nyamwingi nibagamba ebigambo ebiri omu kushaba okwo buri izooba. Kwonka Yesu akaba atarikwenda ngu okushaba okwo kukoresibwa kutyo. Nitukimanyisa tuta.?

Yesu atakagambire okushaba okwo, akagira ati: “Ku muraabe nimushaba, murekye kushaba nimugarukagaruka omu bigambo bya busha.” (Matayo 6:7) Mbwenu shi Yesu akaba naayekanisa arikutaho ebigambo by’okukwata omu mutwe n’okubigarukagarukamu? Ngaaha buzima! Kureka, Yesu akaba naatwegyesa ebi twine kuta omu kushaba, kandi akaba ariyo naatuha ebi twine kwebembeza twaba nitushaba. Ka tushwijume gye ebi yaagambireho. Okushaba oku kuhandiikirwe omuri Matayo 6:9-13.

Yesu akaba naijutsa abakuratsi be ngu okushaba kwona kwine kuza ahari Tataitwe, Yehova. Kwonka shi obaire noomanya ahabw’enki eiziina rya Ruhanga ni rikuru munonga, kandi ahabw’enki riine kwezibwa, nari kutwarwa nk’eririkwera?

Okwiha obu abantu baahangwa, eiziina rya Ruhanga eririkwera ritwire nirigambwaho ebishuba. Omuzigu wa Ruhanga, Sitaane, naayeta Yehova omubeihi, omutegyeki orikweyendeza kandi otashemereire kwebembera ebi yaahangire. (Okutandika 3:1-6) Baingi beegaitsire ahari Sitaane, barikwegyesa ngu Ruhanga n’enshaarizi, taine saasi, kandi ngu tahikire kutegyeka byona. Abandi babaasize kushiisha eiziina rye, barikwiha eiziina Yehova omu Baibuli kandi barikuzibira abantu kurikoresa.

Baibuli neeyoreka ngu Ruhanga naija kuhwaho obutari buringaaniza bwona. (Ezekieli 39:7) Yaakikora, naija kuhikiiriza ekyetengo kwawe kandi amareho n’oburemeezi. Mu muringo ki? Ebigambo ebirikukurataho omu kushaba kwa Yesu nibiha eky’okugarukamu.

Obunaku obu, abeebembezi b’ediini nibeegyesa ebitarikushushana aha Bukama bwa Ruhanga. Kwonka abakuratsi ba Yesu bakaba nibamanya ngu baanabi ba Ruhanga bakagamba kare ngu Mesia, Omujuni ou Ruhanga yaatooraine, naija kutegyeka omu Bukama oburaahindure ensi. (Isaaya 9:6, 7; Danieli 2:44) Obukama bukaba nibwija kweza eiziina rya Ruhanga burikusheeshuura ebishuba bya Sitaane kandi bucwekyereze Sitaane n’emirimo ye yoona. Obukama bwa Ruhanga nibwija kumaraho entaro, endwara, enjara, nangwa n’okufa. (Zaaburi 46:9; 72:12-16; Isaaya 25:8; 33:24) Waaba nooshaba Ku orikushaba ngu Obukama bwa Ruhanga ngu bwije, nooba oriyo nooshaba ngu ebiraganiso ebyo bihikiirire.

Ebigambo bya Yesu ebyo nibyoreka ngu ebi Ruhanga arikukunda nibiija kukorwa aha omu nsi n’oku birikukorwa omu iguru, ei Ruhanga arikutuura. Ebi Ruhanga arikukunda bibaasize kukorwa omu iguru, ahu Omwana wa Ruhanga yaarwaniise Sitaane n’abarikumushagika, akabanaga omu nsi. (Okushuuruurwa 12:9-12) Enshonga egi omu kushaba ky’eky’okureeberaho, ey’okubanza n’eya kashatu, nizituhwera kwebembeza ebintu ebikuru ebya Ruhanga, beitu bitari ekigyendererwa kyaitu. Butoosha naayendeza ebihangirwe byona ekirikukirayo oburungi. Kwonka, nangwa Yesu omuntu owaabaire ohikiriire akagambira Ishe ati: “Kirekye kuba nk’oku ndikwenda, kureka nka Iwe oku orikwenda.”—Luka 22:42.

Yesu akagaruka yaayoreka ngu titwine kweyendeza omu kushaba kwaitu. Ti kigwire kushaba aha bikwatiraine n’eby’okwebaisaho butoosha ebihikire. Nangwa, okukora ekyo nikitwijutsya ngu Yehova niwe arikuha oburi omwe “amagara n’omwitsyo na buri kintu kyona.” (Ebyakozirwe 17:25) Baibuli neeyoreka ngu n’omuzaire oine rukundo orikukunda kuha abaana ebirikwetengyesa. N’oku muzaire murungi, tarikubaasa kutuha ebitari by’oburungi bwaitu.

Buzima oine eibanja eri oine kushashura Ruhanga? Nooyenda ngu akusaasire? Obunaku obu, baingi nibeebwa obukuru by’okushaba okusaasirwa. Kwonka Baibuli neeyegyesa ngu ekibi nikyo bukomooko bw’oburemeezi bw’amaani, n’okufa. Nituzaarwa twine ekibi, nitushiisha emirundi mingi, nyentsya nungi yaitu neerugiirira aha kusaasira kwa Ruhanga. (Abarooma 3:23; 5:12; 6:23) Nikireeta obuhuumure kumanya ngu Baibuli neegira eti: ‘Iwe [Yehova] ori murungi, noorahuka kusaasira.’—Psalm 86:5.

Nookimanya ngu nooyetengyera kimwe oburinzi bwa Ruhanga? Baingi tibarikwikiriza ngu “omubi,” Sitaane, ariho. Kwonka Yesu akeegyesa ngu Sitaane ahariho n’owaabuzima, nangwa Yesu akamweta “omutegyeki w’ensi egi.” (Yohaana 12:31; 16:11) Sitaane areeteire ensi egi ei arikutegyeka kusiisikara, kandi naayenda kukuhabya, arikukuremesa kugumizamu oine omukago murungi na Tataitwe, Yehova. (1 Petero 5:8) Kwonka, Yehova naakiriza kimwe Sitaane amaani ayeteekateekire kurinda abarikumukunda.

Enshonga enkuru ezi twagambaho omu bugufu eziri omu kushaba kwa Yesu okw’eky’okureeberaho tizo zonka ezi twine kugambaho omu kushaba. Ijuka,  Yohaana 5:14 nihagamba ahari Ruhanga hati: ‘Twashaba ekintu kyona nk’oku arikukunda, naatuhurira.’ N’ahabw’ekyo otakaateekateeka ngu kigwire kugambira Ruhanga oburemeezi bwawe omu kushaba.—1 Petero 5:7.

Kandi shi, obwire n’omwanya? Obu turikushaba n’ahu turikushabira shi ni bikuru?