Pikakasi

4 Anto so Ipikasi?

DIAD amin a tatawagen dan dasal na saray Kristiano, say Pikakasi na Katawan odino Ama Mi so sankabetbetan kunon dadasalen. Tua man itan o andi, sayan pikakasi ya imbangat nen Jesus et agnatatalosan na dakel. Nipatlep itan na minilyon a totoo, tan diad inagew-agew et maminpigapiga dan dadasalen. Balet ta ag-itan imbangat nen Jesus pian ulit-uliten. Panon tayon amta ya ag-itan nepeg ya ulit-uliten?

Antis ya imbangat itan nen Jesus, oniay imbaga to: “Sano manpipikasi ka, agmo uulit-uliten ya ibaga iray apasakey a bengatla.” (Mateo 6:7) Kasin kontraen nen Jesus iyan kapkapangibaga to diad pangibangat to na pikakasin nepeg ya ipatlep tan ulit-uliten? Siempre andi! Imbes, say imbangat nen Jesus et no antoray nepeg ya ipikasi, tan angiter iya na ideya no antoray nepeg a manunan ipikasi tayo. Imanoen tayo pan maong iyan pikakasi ya akarekord ed Mateo 6:9-13.

“Ama mi a walad tawen, napasanto komon so ngaran mo.”

Diad saya et pinanonotan nen Jesus iray patumbok to a say nepeg a pampikasian et say Ama to, si Jehova. Balet, antam ta no akin ya importante so ngaran na Dios tan no akin a kaukolan itan a napasanto?

Say ngaran na Dios et pinauges manlapu la’d inkapalsay too. Unong ed kabusol na Dios a si Satanas, si Jehova kuno et matila tan masiblet, tan anggapoy kanepegan ton uleyan iray pinalsa to. (Genesis 3:1-6) Ontan met so ibabaga na karaklan, ya ibabangat dan say Dios et agmaaro, maruksa, tan anggapoy panangasi to, tan agda ni ingen bibidbiren a sikato so Amalsa ed amin a bengatla. Wala met iramay say pinuntirya ra et say mismon ngaran na Dios, ya inekal da so ngaran a Jehova ed saray bersion na Biblia tan insebel dan usaren itan a ngaran.

Ibabaga na Biblia ya onsabi panaon et pasantosen nen Jehova so ngaran to. (Ezequiel 39:7) Diad panggawa to’d satan, iter to so amin a pankaukolan tayo tan solusyonan to ray problema tayo. Panon ton gawaen itan? Naamtaan tayoy ebat ed tinmumbok ya imbaga nen Jesus.

“Onsabi komon so panarian mo.”

Nanduruma so ibabangat na saray lider na relihyon nipaakar ed Panarian na Dios. Balet ta amta na saramay dinmengel ed si Jesus ya abayag lan impasakbay na saray propeta ya manuley so Mesias, say Manangilaban a pinili na Dios, ed Panarian odino gobierno a makapanguman ed mundo. (Isaias 9:6, 7; Daniel 2:44) Saya so mamaneknek a matila si Satanas, tan  maneral ed sikato tan ed amin a gawa to, kanian napasanto so ngaran na Dios. Panampoten na Panarian na Dios so guerra, sakit, eras, tan anggan say patey ni ingen. (Salmo 46:9; 72:12-16; Isaias 25:8; 33:24) Sano ipikasim ya onsabi la komoy Panarian na Dios, ipipikasim ya komon et nagawa la irayan amin a sipan.

“Nagawa komon so linawam, a singa ed tawen, ontan met diad dalin.”

Ipapanengneng na sayan imbaga nen Jesus ya seguradon nagawa so linawa na Dios diad dalin, a singa ed tawen, a ditan so kawalaan na Dios. Ag-apatunda so impakagawa na linawa na Dios ed tawen sanen akilaban so Anak na Dios ed si Satanas tan saray demonyo to tan imbantak to ra diad dalin. (Apocalipsis 12:9-12) Singa met ed saramay inmunan duaran imbaga nen Jesus ya ipikasi, sayan mikatlo et ontulong pian mansiansian akasentroy bilay tayo ed panggaway linaway Dios, aliwan say dilin panlabayan tayo. Say linawa to labat so makapangiter lawas na sankaabigan ed amin a pinalsa. Kanian anggan say perpekton too a si Jesus et oniay imbaga to’d Ama to: “Aliwan say linawak so nagawa, noag say linawam.”​—Lucas 22:42.

“Iter mo ed sikami so kanen mi ed sayan agew.”

Diad saya et impanengneng nen Jesus a nayari met so onkerew parad sarili tayo. Anggapoy uges na pampikasi ed Dios parad saray pankaukolan tayo’d inagew-agew. Diad tua, satan so mangipanonot ed sikatayo a si Jehova so “mangiiter na bilay tan linawa tan amin a bengatla diad amin a totoo.” (Gawa 17:25) Ibabaga na Biblia a si Jehova et maaron ateng ya labalabay ton iter ed saray anak to iray pankaukolan da. Balet lapud maaro lanti, agto iter so kerew tayo no agtayo itan pankaabigan.

“Perdonam iray utang mi.”

Talaga ta’n walay utang mo’d Dios? Kaukolan mo ta’y panamerdona to? Dakel a totoo natan et agda natatalosan no anto so kasalanan tan agda amtan talagan seryoso itan a bengatla. Balet ta ibabangat na Biblia a say kasalanan so sengegan na sankagrabian iran problema, ta lapud satan et ompapatey so totoo. Amin tayo et akatawir na kasalanan, kanian mabetbet itayon mankakasalanan. Say alenleneg sirin ya ilalo tayo ed arapen et akadepende ed panamerdona na Dios. (Roma 3:23; 5:12; 6:23) Maong labat ta oniay ibabaga na Biblia: “Sika, Katawan, maong ka tan [akaparaan] ka a mamerdona.”​—Salmo 86:5.

“Iliktar mo kami ed samay sakey a mauges.”

Antam ta a kakkaukolan moy proteksion na Dios? Dakel so agmanisian walay “sakey a mauges,” si Satanas. Balet ta imbangat nen Jesus a talagan walay Satanas, a tinawag to ni ingen ya “manuley na sayan mundo.” (Juan 12:31; 16:11) Iimpluensyaan nen Satanas iyan mundo ta kontrolado to itan, tan labalabay to ka met ya impluensyaan pian agka onapit ed Ama tayon si Jehova. (1 Pedro 5:8) Balet, tandaan mon agbalot naparaan nen Satanas so biskeg nen Jehova, tan labalabay nen Jehova ya protektaan iramay mangaaro’d sikato.

Diad sayan sumaryo na saray manunan punto ed pikakasin imbangat nen Jesus et ag-abitla so amin a nayari tayon ipikasi. Tandaan tayo imay ibabaga na 1 Juan 5:14: “Antokaman so kerewen tayo unong ed linawa to, dengelen to itayo.” Kanian antokaman iray problemam, iyasingger mo iratan ed Dios tan agmo iisipen ya aliwan importante iratan ed sikato.​—1 Pedro 5:7.

No nipaakar balet ed kapigay pampikasi ey tan iner? Importante ni kasi iratan?