Nglunguuch

4 Kede Meluluuch el Kirel a Ngerang?

A ROLEL a nglunguuch el lulechotii a Jesus a kot el merael a chisel el nglunguchir a Rekristiano. Alta e ngklemerang me a lechub e ngdiak, engdi tia el nglunguchel a Jesus el lebebil er a taem e te omekedong er ngii el Nglunguchel a Rubak me a lechub A Demmam, a loruul er ngii a rechad el ngar a cheleuid el rolel. A rebetok el miliol el chad a omelekl el melekoi er tia el nglunguuch el betok el taem er a chelsel a ta el sils. Engdi a Jesus a kmal dimlak lolisechakl er a rechad el mo meruul er tia el tekoi el uaisei. Kede mekerang e mo medengei?

Telkib er a uchei er a lolekoi er tia el nglunguuch e a Jesus a dilu el kmo: “Me sel moluluuch e lak muar Chisentail el omelekl a diak a blkul tekoi.” (Matteus 6:7) Me tiang belkul a kmo a Jesus a millekoi a tekoi el omtok er a uleketmokl el nglunguuch el bla leketmeklii el kired el omelekl er ngii? Ngkmal diak! Ngbai ullisechakl er kid el kmo kede meluluuch el kirel a ngerang,  e dirrek el ullisechakl er kid el mo melatk a meklou a ultutelel el tekoi el kired el meluluuch el kirel. Me bo domes aike el tekoi el lullekoi el kirel a nglunguuch. Tia el nglunguuch a medung er a Matteus 6:9-13.

“A Demmam el ngara eanged, le mechedaol a ngklem.”

A Jesus a ulemeklatk er a rulebengkel el kmo a rokui el nglunguuch a kmal kirel el medung el mo er a Demal el Jehovah. Engdi kau ke medengei el kmo ngera uchul me a ngklel a Dios a kmal klou a ultutelel, e ngera uchul me ngkmal kirel el mukebkall me a lechub el mechedaol?

Ngar a uchelel a reksi er a klechad e tia el mekreos el ngklel a Dios a mlotuub er a blulak el tekoi. Ngike el cherrouel a Dios el Satan a ulemekedong er a Jehovah el kmo ngbulak e merechorech a rengul el Merreder, e dimlak a llemeltel el mengedereder er a reblebelel. (Genesis 3:1-6) Te betok el chad a kilengei a tekingel a Satan e mlo olisechakl el kmo a Dios a diak el betik a rengul e mekngit a tekingel, e dirrek el ultngeklii sel tekoi el kmo Ngii a ngike el Ulemeob. A rebebil a mlo omtok er tia el ngakl el ngilebetii el otebedii er a oidel a Biblia e milengelechel er a rechad me lak lousbech er ngii.

A Biblia a ochotii el kmo a Dios a mo sumechokl el mo melemalt aika el rokui el chelebirukel el tekoi. (Esekiel 39:7) E sel bo losmechokl ngii el tekoi, e aike el tekoi el dousbech a di mo ungilbesul, e dirrek el mo diak a mondai er kid. Me ngmekerang a bo losmechokl er tia el tekoi? A ongingil el tekoi er a nglunguchel a Jesus a mo onger er tia el ker.

“A rengedem le mei.”

Chelecha el taem e ngkmal klou a rraurreng er a delongelir tirke el lolisechakl el chedal a klechelid el kirel a Rengedel a Dios. Engdi tirke el ullerrenges er a Jesus a mle medengei el kmo a reprofet er a Dios er a irechar a di mla omlaoch el kirel a Messias, el ngii a Osobel el mlengilt er a Dios el mo mengedereder er a Renged, el ngii a mo ngodechii a blekeradel er tia el beluulechad. (Isaia 9:6, 7; Daniel 2:44) Ngmo kobkellii a ngklel a Dios e ocholt a blulekngel a Satan e mo okngemedii ngii el Satan me aike el rokui el mekngit el urerel. A Rengedel a Dios a mo torebengii a mekemad e dirrek el okngemed a secher me a bosech er a kall me a dirrek el kodall me ngmo diak. (Psalm 46:9; 72:12-16; Isaia 25:8; 33:24) Me sel moluluuch el olengit er a Rengedel a Dios me lemei, e ngbelkul a kmo ke olengit me bo el sebechel aika el telbiil el mo mera el tekoi.

“Ma uldesuel a rengum le meruul ra belulechad el ua chomerellel ra eanged.”

A belkul a tekingel a Jesus a kmo a moktek er a Dios a ulterekokl el mo meketmokl er tia el chutem el ua blekeradel er a eanged, el ngii a delengcheklel a Dios. Aike el rokui el soal a Dios a mla meketmokl er a eanged e dimlak a sebechel el torob, a Ngelekel a Dios a uluumekemad er a Satan me a remekngit el anghel er ngii e uldikterir er a eanged el mei er a chutem. (Chocholt 12:9-12) Me sel ongedei el tekoi el ngar a nglunguchel a di ua omerellel aike el eru el nglunguchel, el ngii a sebechel el ngosukid el mo ungil el melilt a meklou a ultutelel el tekoi, el diak loltirakl a soad el tekoi e ngbai oltirakl aike el soal a Dios. Aike el tekoi el soal a Dios a di blechoel el mo uchul a klungiaol el mo er a rokui el blebelel. Me ngmo lmuut er ngike el mle cherrungel el chad el Jesus me ngmillekoi er a Demal el kmo: “Ngdi lak le uldesuek, e bai le ngar sel uldesuem.”​—Lukas 22:42.

“E beskemam er chelechal sils a kelel a tal sils.”

A Jesus a dirrek el ulechotii el kmo ngkmal sebeched el olengit er a Dios er aike el dousbech el kirel a klechad er kid er a bek el sils. Ngdiak a kngtil a doluluuch el olengit er a ulekerreuil me aike el dousbech er a bek el sils. A lsekum e kede meruul el uaisei, e ngomeklatk er kid el kmo a Jehovah a ngike el “mesterir a rokuil chad a klengar, ma tellir, ma rokuil tekoi.” (Rellir 17:25) A Biblia a ochotii el kmo Ngii el Jehovah a betik a rengul el chedam el kmal dmeu a rengul el omesterir a rengelekel aike el rokui el lousbech. Ngdi ua ungil el chedam el kerekikl me ngdiak el kengei aike el tekoi el ngii a sebechel el mo uchul a telemellir a rengelekel.

“E dilerrek el mousubes a blsam.”

Kid kede mera el belsel a Dios? Kid kede ousbech er a klausubes er ngii? Te betok el chad er a chelechang a mla mo diak lomdasu el kirel a klengit me a diak lodengelii sel berredel a klengit. Engdi a Biblia a olisechakl el kmo a klengit a uchul a rokui el chelebuul, e dirrek el uchul a kodellir a rechad. Me kid el rokui a mlechell el uldiukes er a klengit a uchul me kede blechoel el mo meruul a mekngit, me a di ta el tekoi el sebechel el meskid a omeltked el kirel a ngar medad el klebesei, a sel bo denguu a klausubes er a Dios. (Rom 3:23; 5:12; 6:23) Me ngdmeu a rengud el kirel sel tekoi el medung er a Biblia el kmo: “Kau [e Jehovah] a ungil, e ousubes a tellemall.”​—Psalm 86:5.

“E mosobelemam era mekngit.”

Kau, ke melechesuar a uchul me ngklou a ultutelel el kirem el ousbech er a ulekerreuil a Dios? A rebetok el chad a diak loumerang el kmo ngmera el ngar ngii “ngikel mekngit” el ngii a Satan. Engdi a Jesus a ullisechakl el kmo a Satan a mera el ngar ngii e dirrek el ulemekedong er ngii el kmo “merreder er tial belulechad.” (Johanes 12:31; 16:11) A Satan a mla tomellii tia el beluulechad el longedereder er ngii, e kmal semeriar el mo merrob er kau me bo lak el sebechem el mekurulii a kmes el deleuill er kau el obengkel a Demam el Jehovah. (1 Petrus 5:8) Me nguaisei, engdi a Jehovah a lmuut el imong el mesisiich er a Satan e kmal semeriar el omekerreu er tirke el betik a rengrir er Ngii.

Tia el kedeb el omesodel a rolel a nglunguuch el lulsaod er ngii a Jesus, a diak losaod a rokui el tekoi el sebeched el meluluuch el kirel. Lak mobes, a 1 Johanes 5:14 a ouchais er kid el kirel a Dios el kmo: “A dolengit a ngiidi le ngeral tekoi el oltirakl a uldesuel a Dios e ngrongesii ngiil ongtid.” Me lak el sebek a rengum el omdasu el kmo a mondai er kau a diak a ultutelel el moluluuch el ouchais er a Dios.​—1 Petrus 5:7.

Me ngngar er a chelsel tia el beluulechad el diak el sebeched el otuil a klaumerang er kid er ngii, e a rebetok a mo sersuul a rengrir el kirel a klungel a ultutelel a nglunguuch. Me ngdirrek el sebechem el mo oker el kmo, ‘A Dios, ngsebechel el orrenges e dirrek el onger a nglunguchek?’